Hipopótamo

especie de mamifero
Hipopótamo
Hippopotamus amphibius - Homosassa Springs Wildlife State Park, Florida - 2010-01-13.jpg
Estado de conservación
Vulnerable
Vulnerable[1]
Clasificación científica
Reino: Animalia
Filo: Chordata
Clase: Mammalia
Orde: Artiodactyla
Familia: Hippopotamidae
Xénero: Hippopotamus
Especie: H. amphibius
Nome binomial
'Hippopotamus amphibius'
(Linné, 1758)
Mapa distribución actual e pasada.[1]

Mapa distribución actual e pasada.[1]
Cranio dun hipopótamo. Nótense os seus grandes cabeiros.

O hipopótamo[2] (nome científico: Hippopotamus amphibius) é un gran mamífero artiodáctilo que é fundamentalmente herbívoro e se atopa na África subsahariana. É, xunto ao hipopótamo anano (Choeropsis liberiensis), un dos dous únicos membros actuais da familia Hippopotamidae.

CaracterísticasEditar

É un animal semiacuático que mora en ríos e lagos, e onde os machos adultos territoriais con grupos de cinco a trinta femias e hipopótamos novos controlan unha zona do río. Durante o día repousan na auga ou na lama, e tanto a cópula coma o parto deste animal suceden na auga. Ao anoitecer vólvense máis activos e saen comer herbas terrestres. Aínda que os hipopótamos descansan xuntos na auga, o pasto é unha actividade solitaria, e non son moi territoriais na terra. Son máis perigosos e territoriais cando están na auga.

Malia o seu parecido físico cos porcos e outros ungulados terrestres, os seus parentes vivos máis próximos son os cetáceos (Balaenidae, Phocoenidae, etc.) dos que diverxeron hai aproximadamente cincuenta e cinco millóns de anos.[3] O devanceiro común de baleas e hipopótamos separouse doutros ungulados hai aproximadamente sesenta millóns de anos.[4] Os fósiles de hipopótamo máis antigos que se coñecen pertencen ao xénero Kenyapotamus, atopados en África e datados coma de hai aproximadamente dezaséis millóns de anos.

O hipopótamo é doadamente recoñecíbel polo seu tronco en forma de barril, enorme boca e dentes, cabeza grande truncada nun fociño ancho e arredondado, corpo coa pel grosa, lisa e case sen pelo, patas curtas e bochudas e o seu grande tamaño. É o terceiro animal terrestre polo seu peso (entre 1½ e 3 toneladas), detrás do rinoceronte branco (1½ a 3½ toneladas) e os dous xéneros de elefantes (3 a 9 toneladas).

O hipopótamo é considerado un dos animais máis perigosos de África; matan a centos de persoas ao ano.[5][6]

Aínda que non o pareza, polo seu peso e as súas pequenas patas, os hipopótamos poden chegar a correr a velocidades de 30 km/h ou máis.[7][8]

A súa esperanza de vida é de entre 40 e 50 anos; en catividade mesmo poden vivir máis anos. O hipopótamo que máis anos viviu foi unha femia chamada Bertha, que morreu aos 65 anos.[9]

DistribuciónEditar

O hipopótamo estendíase por Europa e África do Norte durante o Eemiense e o Plistoceno tardío até fai aproximadamente trinta mil anos.[10] Era común na rexión do Nilo en Exipto ata tempos históricos, mais foi extirpada dende entón desa rexión. Plinio o Vello escribiu que, no seu tempo, a mellor zona para cazar a este animal estaba no nomo de Sais;[11] o hipopótamo aínda podería atoparse en torno a Damieta despois da conquista árabe en 639. Ata o período glacial, os hipopótamos estaban presentes no sueste asiático e no sur de Europa. O Behemot da Biblia non é outra cousa que o hipopótamo que habitaba entón o val do río Xordán.

O hipopótamo distribúese irregularmente na actualidade nos ríos e lagos da África subsahariana: Uganda, Sudán, Somalia, Quenia, norte do Congo e Etiopía, no oeste dende Ghana a Gambia e en África austral (Botsuana, Suráfrica, Cimbabue, Zambia). Existe unha poboación illada en Tanzania e Mozambique. Gústalle vivir en zonas de augas permanentes e non demasiado profundas.

NotasEditar

  1. 1,0 1,1 Oliver, W.R.T.; et al. (2017). "Hippopotamus amphibius". Red List of Threatened Species. Versión 2018-1 (en inglés). IUCN. Consultado o 15 de xullo de 2018. 
  2. Definicións no Dicionario da Real Academia Galega e no Portal das Palabras para hipopótamo.
  3. "Query Taxa: Cetacea/Hippopotamidae". The TimeTree of Life (en inglés). Time Tree. Consultado o 27 de xuño de 2010. 
  4. "Query Taxa: Suidae/Hippopotamidae". The TimeTree of Life (en inglés). Time Tree. Consultado o 27 de xuño de 2010. 
  5. "Estos son los 15 animales que más matan y están más cerca de lo que crees". El español (en castelán). 26 de abril de 2019. Consultado o 21 de maio de 2020. 
  6. "What are the world's deadliest animals?". BBC News. 15 de xuño de 2016. Consultado o 22 de maio de 2020. 
  7. Hipopótamo común. www.parquedecabarceno.com. Consultado o 21 de maio de 2020.
  8. Por qué son peligrosos los hipopótamos. Misanimales.com. Consultado o 21 de maio de 2020.
  9. Bertha, hipopótamo mais velho do mundo, morre aos 65 anos (en portugués). Veja.abril.com.br. Consultado o 23 de xullo de 2020.
  10. van Kolfschoten, Th. (2000). "The Eemian mammal fauna of central Europe" (PDF). Netherlands Journal of Geosciences (en inglés) 79 (2/3): 269–281. Arquivado dende o orixinal (PDF) o 24 de xullo de 2011. Consultado o 09 de xullo de 2020. 
  11. Plinio o Vello. "capítulo 15, libro VIII". Naturalis historia (en latín). tradución ao inglés aquí 

Véxase taménEditar

Ligazóns externasEditar