Abrir o menú principal

A Man Negra (en árabe: al-Kaff al-Aswad) foi unha organización armada clandestina de corte islamista que operou no Mandato británico de Palestina. Foi fundada en 1930 e dirixida polo Xeque sirio Izz ad-Din al-Qassam até a súa morte en 1935.

Logo do fracaso da revolta siria de 1921 que el liderara, al-Qassam escapou a Haifa e ocupouse de recrutar e preparar militarmente a campesiños árabes. As células clandestinas non estaban compostas por máis de cinco persoas. Esta organización comezou a coñecerse co nome de Man Negra. En total, chegou a ter entre 200 e 800 homes. En varios atentados tiveron como obxectivo a civís xudeus no norte de Palestina entre 1930 e 1935 e mataron canto menos a oito deles.[1] Nun ataque foron asasinados tres membros do kibbutz Yagur, e noutro un pai e o seu fillo foron asasinados en Nahalal. O grupo tamén actuou contra as árbores plantadas polos xudeus e contra as vías férreas colocadas polos británicos.[2]

Al-Qassam xustificaba a violencia baseada na relixión. Logo da Masacre de Hebrón de 1929, intensificou a súa axitación anti-británica e anti-sionista e obtivo unha fatwa do Xeque Badr al-Din al-Taji al-Hasani, o Muftí de Damasco, autorizando o uso da violencia contra os británicos e os xudeus.

O 20 de novembro de 1935, logo de matar a un oficial da Forza de Policía de Palestina, al-Qassam foi rodeado pola policía británica nunha cova preto de Jenin e morto nun tiroteo xunto con tres dos seus compañeiros. Algúns dos veteráns da Man Negra participaron na Revolta árabe de Palestina de 1936.[2]

NotasEditar

  1. Lozowick, Yaacov (2003). Right to Exist: A Moral Defense of Israel's Wars. Doubleday. p. 48. 
  2. 2,0 2,1 Segev, Tom (1999). One Palestine, Complete. Metropolitan Books. pp. pp. 360–362. ISBN 0805048480. 

Véxase taménEditar

Ligazóns externasEditar