Empanada galega
A empanada galega é unha variedade de empanada moi popular na cociña galega e forma parte dunha das súas identidades. A primeira empanada á que se fai referencia é de polo e champiñóns.[1][2] É unha preparación culinaria que se ofrece nos concellos de Galicia nas ocasións de festa e romaría. Adóitase preparar con diversos contidos no interior, todos eles procedentes da costa e terras galegas. Pódese servir fría ou quente.
Historia editar
As empanadas son coñecidas en Galicia dende a época dos godos no século VII onde se decretaron regras para a súa elaboración.[3] A empanada era comida ideal para viaxeiros, porque é unha preparación xa cuberta e que permitía evitar o contacto do interior co po das estradas. As empanadas galegas aparecen xa esculpidas no século XII no Pórtico da Gloria de Santiago de Compostela.[4]
Características editar
A masa da empanada leva fariña de trigo (similar á que se emprega para facer pan), manteca e auga.[1] Esta masa é fina. Normalmente faise nun molde duns vinte ou trinta centímetros de diámetro. Nalgunhas ocasións, a masa pode ser feita con fariña de millo (principalmente nalgúns concellos das Rías Baixas). O recheo faise de diferentes contidos, pero habitualmente faise antes un sofrito de cebola e pementos. A diferenza doutras empanadas, a empanada galega non adoita ter tomate no sofrito. Ao pecharse no molde introdúcense no forno. As formas das empanadas son diversas, normalmente rectangulares ou redondas. Adoita servirse acabada de facer ou fría, cortarse en porcións e servirse como aperitivo ou tapa.
Recheos habituais editar
As empanadas galegas están feitas tradicionalmente con ingredientes rexionais. Por regra xeral, a empanada galega emprega varias carnes de vaca e porco (como a zorza), peixes como atún e xoubas, mariscos, etc. Estes ingredientes adoitan cociñarse previamente.
As empanadas máis elaboradas en Galicia adoitan ser de:
Peixe editar
- Bonito - atún que normalmente se presenta esmiuzado.[5] Ás veces procedente de conserva .
- Bacallau - normalmente procedente dun guiso anterior. Ás veces combínase con pasas.
- Xoubas - levan unha salsa de tomate (chamada zaragallada), pementos verdes e cebola.
- Anguía - típica de Lugo e as zonas galegas próximas aos ríos.
- Congrio - habitual na Mariña de Lugo.
- Lamprea - moi famosas as de Arbo e tamén as de Caldas de Reis
Marisco editar
- Zamburiñas, é unha das máis populares.[2]
- Polbo - que usa polbo cocido.
- Berberechos.
- Mexillóns.
- Choco - (normalmente en masa de millo).
Carne editar
- Zorza - con pimentón, allo e sal. Esta empanada non adoita levar cebola.
- Carne de porco picada.[6]
- Papuxa - tradicionalmente na zona de Monforte de Lemos, aínda que a especie, unha pequena ave migratoria, está practicamente extinta.
- Coello - que en moitos casos do interior de Galicia se aromatiza con anís.
Notas editar
- ↑ 1,0 1,1 Cunqueiro. Cocina Gallega (en español) (1ª ed.).
- ↑ 2,0 2,1 Fina Casaderrey Fraga, Mariano García González, (2007), El libro de la empanada, Madrid, Alianza Editorial, ISBN 8420607576, pag.23
- ↑ Tejeiro. De la comida y otras sensualidades.
- ↑ López Ferreiro. Pico Sacro, ed. El Portico de la Gloria, Platerias y el Primitivo Altar Mayor de la catedral de Santiago.La primera empanada de la historia fue de Pollo y Champiñones (1ª ed.). Santiago de Compostela.
- ↑ José Jiménez Ortega,David Lorenzo Sánchez, (2006), Las mejores recetas de las mejores ventas, tabernas y restaurantes de España, La Tierra Hoy S.L, pag. 189
- ↑ Manuel Corral Vide, (2006), Cocina Celta, Ed. LEA, pag. 52
Ligazóns externas editar
Wikimedia Commons ten máis contidos multimedia na categoría: Empanada galega  |