Xesús Golmar

Xesús Golmar Rodríguez, nado en Santiso (Lalín) o 11 de setembro de 1908 e finado na mesma parroquia o 20 de xaneiro de 1962, foi un mestre, xornalista e político lalinense, e o derradeiro alcalde republicano de Lalín.

Xesús Golmar
Nacemento	11 de setembro de 1908
Lugar de nacemento	Santiso
Falecemento	20 de xaneiro de 1962
Lugar de falecemento	Santiso
Nacionalidade	España
Ocupación	mestre, xornalista e político
[ editar datos en Wikidata ]

Traxectoria

Era fillo de Manuel Golmar Cacheda. Estudou o Bacharelato en Lugo e fíxose mestre na Normal de Santiago de Compostela animado polo seu parente e mentor Ramón Salgado Toimil. Foi mestre en Silvela (1931-33), Corvelle (1933-34) e Méixome (1934-36).

Colaborou nos periódicos El Ideal Gallego, La Provincia, Eco de Galicia, Heraldo de Galicia, El Pueblo Gallego, Atrás, Vida Escolar, Faro Villalbés, Razón, A Nosa Terra e Escuela Vivida, onde escribiu artigos pedagóxicos e políticos.

En 1934 ingresou no Partido Galeguista, e converteuse ao ano seguinte en presidente do Grupo Galeguista de Lalín (1935-36). Logo da destitución de Manuel Ferreiro, foi nomeado alcalde de Lalín o 11 de abril de 1936. A raíz do golpe de Estado do 18 de xullo de 1936 foi destituído o 24 de xullo. Detido e xulgado en Pontevedra por auxilio á rebelión o 18 de novembro con José Crespo Torres e Miguel Lamas Iglesias, foi condenado a cadea perpetua. Preso primeiro en San Simón, foi trasladado á Prisión de San Cristóbal (Pamplona), onde permaneceu ata 1941. En liberdade provisional, pero inhabilitado para o Maxisterio, regresou a Santiso onde casou. Morreu sen ser rehabilitado como mestre.

Predecesor: Manuel Ferreiro Panadeiro

Alcalde de Lalín  11-4-1936 - 24-7-1936

Sucesor: Bernardo Madriñán González

Recoñecementos

Na actualidade leva o seu nome un centro escolar, o CEIP Xesús Golmar de Lalín.

Véxase tamén

Bibliografía

• Igrexas, Manuel (2005). Xesús Golmar. A Estrada: Fervenza. ISBN 84-96368-12-2. 

Ligazóns externas

• Xesús Golmar na páxina web Nomes e Voces.