Tamandua mexicana
Tamandua mexicana é unha especie de mamífero placentario da orde dos pilosos e familia dos mirmecofáxidos, unha das dúas que integran o xénero Tamandua.
| Tamandua mexicana Tamanduá mexicana, tamanduá setentrional | |||||||||||||||||||||
|---|---|---|---|---|---|---|---|---|---|---|---|---|---|---|---|---|---|---|---|---|---|
| |||||||||||||||||||||
| Estado de conservación | |||||||||||||||||||||
 Pouco preocupante | |||||||||||||||||||||
| Clasificación científica | |||||||||||||||||||||
| |||||||||||||||||||||
| Nome binomial | |||||||||||||||||||||
| Tamandua mexicana Saussure 1860 | |||||||||||||||||||||
 Distribución de Tamandua mexicana
| |||||||||||||||||||||
| Sinonimia | |||||||||||||||||||||
| |||||||||||||||||||||
É un oso formigueiro propio de Centroamérica e o norte de Suramérica, solitario, que se encontra en numerosos hábitats de selvas e de sabanas áridas, e que se alimenta de formigas e térmites, que atrapa coa súa longa e pegañente lingua. Coñécese vulgarmente como tamanduá mexicano ou tamanduá setentrional.
Descrición editar
É de tamaño mediano, ollos pequenos, orellas relativamenmte grandes e fociño longo, aínda que non tanto como o do oso formigueiro xigante . Mide entre 50 e 80 cm de lonxitude (cabeza e tronco), máis entre 40 e 65 cm do cola. Pesa entre 3,5 e 8,5 kg. A cola é prénsil, adaptación á súa vida arborícola.
A súa pelaxe, curta, mesta e áspera, é de cor amarela pálida na maior parte do corpo, cun parche distintivo de pelaxe negra nos costados, as costas e os ombros, cuxa forma semella un chaleco. A presenza deste patrón de coloración fai posíbel distinguir esta especie do seu parente do sur, Tamandua tetradactyla, o tamanduá meridional, que ten unha cor máis uniforme.[1]
A cola só ten pelo na parte superior sobre aproximadamente un terzo da súa lonxitude.[2]
As patas dianteiras teñen catro dedos rematados en uñas fortes, que utiliza para romper os niños de formigas e térmites, e para defenderse; as traseiras teñen cinco dedos, coas uñas menos potentes.[2]
Comportamento editar
É un animal non agresivo, que case sempre foxe ante un perigo. Solitario, ten hábitos nocturnos e arbóreos. Pasa a maior parte do tempo nas árbores, e o seu desprazamento en terra é bastante dificultoso.[2]
Porén, ás veces, cando está ameazado en terra, pódese defender erguéndose sobre as patas traseiras e golpear ao agresor coas fortes gadoupas das patas dianteiras.
Aliméntase basicamente de formigas e térmites, pero tamén doutros insectos, e das súas larvas, que localizan baixo a codia dos troncos e pólas das árbores.[2]
A xestación dura 5 meses, tras os cales a femia pare unha cría.
Distribución editar
O oso formigueiro mexicano distribúese desde México até o norte de América do Sur. En México encóntrase na vertente do Pacífico, desde Michoacán e a Huasteca Potosina, e na vertente do Golfo, até Chiapas e a península do Iucatán. No estado de Guerrero rexistrouse nas zonas de San Marcos, Acahuizotla e Chapolapa.[3]
Taxonomía editar
Descrición editar
A especie foi descrita en 1860 polo científico suízo Henri Louis Frédéric de Saussure nun traballo publicado na Rev. Mag. Zool. París, ser. 2, 12: 9.[4]
Sinónimos editar
Ademais de polo nome que lle adxudicou Saussure, e que é o válido actualmente, foi coñecido polos sinónimos:[4]
En verde: Tamandua mexicana instabilis.
En amarelo: Tamandua mexicana punensis.
En vermello: Tamandua mexicana mexicana.
En azul: Tamandua mexicana opistholeuca.
Etimoloxías editar
O nome xenérico, Tamandua, procede do tupí-guaraní tamanduá, que significa "comedor de formigas", é dicir, "oso formigueiro".[5] O específico, mexicana, fai referencia á súa distribución xeográfica.
Subespecies editar
Na actualidade recoñécense as seguintes subespecies:[4]
- Tamandua mexicana mexicana Saussure, 1860 - México, Guatemala, Belize, Honduras, O Salvador
- Tamandua mexicana instabilis J. A. Allen, 1904 - Venezuela, Norte de Colombia
- Tamandua mexicana opistholeuca Gray, 1873 - Nicaragua, Costa Rica, Panamá, Colombia
- Tamandua mexicana punensis J. A. Allen, 1916 - Ecuador, Perú
Status de conservación editar
En 2014 a Unión Internacional para a Conservación da Natureza e dos Recursos Naturais (UICN) cualificou o status de Tamandua mexicana como LC (pouco preocupante) debido á súa ampla distribución, a suposta amplitude da súa poboación, a que se encontra nunha serie de áreas protexidas, á súa tolerancia a pequenas modificacións do seu hábitat, e porque é pouco probábel que a súa poboación estea diminuíndo o suficiente como para cualificala nunha categoría ameazada.[6]
Galería de imaxes editar
-
Desprazándose nunha árbore -
Dous espécimes fotografados en Panamá -
Alimentándose en terra -
Ergueito, en postura defensiva
.jpg)
Notas editar
- ↑ San Diego Zoo's Animal Bytes: Tamandua or Lesser Anteater. Consultada o 17-01-2016.
- ↑ 2,0 2,1 2,2 2,3 VV. AA. (1968): Enciclopedia Salvat de las ciencias. Tomo 6. Animales vertebrados. Pamplona: Salvat, S. A. de Ediciones, p. 81.
- ↑ "El oso hormiguero". Consultado o 17-01-2016.
- ↑ 4,0 4,1 4,2 Tamandua mexicana en MSW.
- ↑ tamanduá no DRAE.
- ↑ Tamandua mexicana na Lista vermella de especies ameazadas da UICN.
Véxase tamén editar
| Wikispecies posúe unha páxina sobre: Tamandua mexicana |
Wikimedia Commons ten máis contidos multimedia na categoría: Tamandua mexicana  |
Bibliografía editar
- Kowalski, Kazimierz (1981): Mamíferos. Manual de teriología. Madrid: H. Blume Ediciones. ISBN 84-7214-229-9, p. 341.
- McKenna, Malcolm C. & Bell, Susan K. (1997): Classification of Mammals Above the Species Level. Nova York: Columbia University Press. ISBN 0-231-11013-8.
- Nowak, Ronald M. (1999): Walker's Mammals of the World. 6ª ed. Baltimore, Maryland, EE. UU.: The Johns Hopkins University Press. ISBN 978-0-8018-5789-8.
- Wilson, D. E. & Reeder, D. M., eds. (2005): Mammal Species of the World: A Taxonomic and Geographic Reference 3rd ed. Baltimore, Maryland, USA: The Johns Hopkins University Press. ISBN 978-0-8018-8221-0.
- VV. AA. (1968): Enciclopedia Salvat de las ciencias. Tomo 6. Animales vertebrados. Pamplona: Salvat, S. A. de Ediciones, pp. 78–83.
Outros artigos editar
Ligazóns externas editar
- Tamandua mexicana na ADW. Abundante imnformación, imaxes, mapas de distribución e bibliografía (en inglés)
- Tamandua mexicana na EOL.