Pablo López Jiménez

Para outras páxinas con títulos homónimos véxase: Pablo López.

Pablo José López Jiménez, nado en Fuengirola (Málaga) o 11 de marzo de 1984, máis coñecido como Pablo López, é un cantante e músico español. O seu xénero musical é pop. Deuse a coñecer a nivel nacional tras o seu paso pola sexta edición do programa de televisión Operación Triunfo 2008 (OT), onde quedou como finalista en segunda posición e tamén é coñecido polo éxito do seu primeiro sinxelo «Vi», do álbum Once historias y un piano, que chegou a ser disco de ouro en España.

Pablo López Jiménez

Biografía
Nacemento	11 de marzo de 1984 (40 anos) Fuengirola, España
Actividade
Ocupación	cantante
Tesitura	Tenor
Instrumento	Piano, guitarra e voz
Selo discográfico	Universal Music Group
Participou en
2008	Operación Triunfo 2008 (pt)
Páxina web	pablolopezmusic.com

En 2015 volveu ao panorama musical e televisivo español co lanzamento do seu disco El mundo y los amantes inocentes.

Traxectoria

Inicios e formación

Nado na cidade andaluza de Málaga o día 11 de marzo de 1984, foi criado no municipio malagueño de Fuengirola. Desde moi neno tivo unha grandísima paixón pola música e á idade de cinco anos a súa nai regaloulle a súa primeira guitarra española, grazas á cal desde ese momento tivo claro que se quería dedicar ao mundo musical. Con oito anos, xunto a uns amigos xa participou no concurso nacional Veo, veo. Durante esa época, tamén comezou a tocar o piano no Conservatorio de Música de El Ejido, onde chegou ata sexto grao. Ao mesmo tempo, formouse en música rock, harmonía, solfexo e música de cámara, disciplinas ás que dedicou un total de dez anos. Durante esa etapa tamén tivo en mente a carreira de Periodismo, pero finalmente decantouse completamente pola música.

Aos seus 17 anos comezou a gañar a vida tocando nos hoteis da Costa do Sol. Seguidamente trasladouse a Londres, onde traballou como camareiro nun pub. Ao ser insuficiente para a súa estancia conseguiu cubrir o resto dos seus gastos tocando cancións no Metro de Londres, presionado polos seus amigos.

Niño Raro

No ano 2007 xunto aos músicos e amigos Juanjo Martín e Antonio Carlos Miñán coa batería, formaron o grupo musical Niño Raro, cuxo estilo era pop pero con algunhas mesturas de reggae, algúns elementos de flamenco, música latina, rock e en diversas ocasións cun pouco de rap a mans do gaditano Félix Sánchez, completaba o grupo no baixo o músico cubano Yohany Suárez e coa guitarra —tanto eléctrica, acústica como española— José Marín.

En 2009 lanzaron o seu primeiro álbum, Trentaytrés, cuxo primeiro sinxelo era «No puedes escaparte», que foi gravado polo produtor Antonio Escobar Núñez e Tony Romero; seguidamente lanzaron outros temas como «Palabras llanas», «Oscura ciudad», «Instinto animal», «No me encuentro» etc. Para este álbum, tamén contaron coa colaboración de músicos como Daniel Anarte, Agustín Carrillo, Manuel Machado, Juan Heredia, Tony Cantero, Joaquín Migallón, Víctor Vallejo e tamén con cantantes como Cristie e Juan Antonio Parra Zurita (Zuri).

Ao pouco tempo despois de terminar a súa primeira xira por diversas cidades, Niño Raro disolveuse.

Operación Triunfo 2008

Tempo máis tarde, á idade 24 anos, saltou á fama ao lograr ser un dos concursantes da sexta edición do programa de televisión Operación Triunfo 2008 emitido pola cadea Telecinco. Tras o seu paso por un total de 15 galas logrou alcanzar a gran final, terminando en segunda posición por detrás da gañadora, Virginia Maestro. Pablo López afirmou que foi unha grande experiencia que lle serviu para crecer artisticamente.

Alí tras o seu paso polo programa televisivo xunto aos dez concursantes finais, asinaron o álbum Agua, a medias co produtor Kike Santander e as compañías discográficas Vale Music e Sony BMG. Neste álbum, Pablo foi un dos compositores da principal canción «Agua», cantada por todo o conxunto, que se converteu na canción oficial do programa e da Exposición Internacional de Zaragoza dese ano. Tras o seu lanzamento, tamén estiveron de xira asinando e dando concertos por diversas cidades españolas.

2009-2014: álbum debut

Ao finalizar a súa andaina como concursante de Operación Triunfo e tras lanzar un álbum e facer unha xira co seu grupo Niño Raro, Pablo López explicou que comezaría seriamente a compoñer e que quería facer cancións como as que el escoitaba de pequeniño, dos artistas que foron a súa influencia musical: unha mestura de cantautores como Silvio Rodríguez, Joan Manuel Serrat, Joaquín Sabina, e rock británico dos anos 70, Supertramp, Queen, Pink Floyd e sobre todo, The Beatles.

En 2009 participou Los mejores años de nuestra vida canción a canción, programa producido por Gestmusic, onde xunto a outros exconcursantes de Operación Triunfo cantou cancións de diferentes épocas da historia de España.

Entre 2011 e 2012 o cantante David Bustamante convidouno a cantar en varios dos seus concertos. Tamén gravou dúos con el e foi dalgún modo un dos seus padriños artísticos.

Xa no ano 2013, asinou o seu primeiro contrato discográfico co selo Universal Music Group (UMG), co que conseguiu publicar o seu primeiro sinxelo en solitario titulado «Vi», que recibiu numerosas críticas positivas tanto de profesionais da música como do público, o que levou a Pablo a converterse nun dos artistas revelación do momento. Seguidamente sacou o seguinte sinxelo, «Dónde» e obtivo a expectación suficiente para a creación do seu primeiro álbum como solista, titulado Once historias y un piano, producido entre outros por Kim Fanlo (Nena Daconte), que foi gravado en Barcelona e masterizado en Londres. Na mesma semana de lanzamento do álbum, xa se colocou no posto número catro na lista oficial dos álbums máis vendidos en España e as cifras de vendas obtiveron un gran resultado. Conseguiu ser disco de Ouro no país e reeditouse en 2014 con contido extra e algúns temas inéditos. Tamén recibiu numerosos galardóns outorgados por diversos medios de comunicación, gañou un dos Premios Dial 2013 e no mesmo ano o Premio ao Artista Revelación nos Premios 40 Principais 2013 e foi nomeado na categoría Premio Grammy latino ao mellor artista novo na entrega anual de 2014, que se celebrou nas Vegas. Iniciou unha xira de presentación xunto ao seu equipo de músicos conformado por Kim Fanlo, Vicen Martínez e Félix Fanlo. Visitou moitas das cidades españolas, actuou nalgúns festivais musicais de gran referencia e chegou a países como Chile e a Arxentina, onde ademais de facer a súa presentación foi artista convidado de David Bisbal nun concerto no Estadio Luna Park de Buenos Aires. Durante esta época, ademais de presentar o seu primeiro álbum, foi compositor e colaborador en discos de artistas como Jamie Cullum, Alejandro Sanz, Juanes, David Bisbal, Manuel Carrasco, Tiziano Ferro, Malú, Dani Martín, David Bustamante e Antonio Orozco. Na súa terra natal foi elixido para que escribise e cantase o himno do Club Baloncesto Málaga (Unicaja Málaga), que foi titulado «Tu bandera» e cuxo videoclip foi gravado no auditorio Sala María Cristina da mesma cidade.

2015-presente

En setembro de 2015, Pablo López publicou o seu segundo álbum, El mundo y los amantes inocentes. Neste álbum destacan temas como «El mundo», que apareceu como BSO na serie El Príncipe, e «Tu enemigo», canción cantada xunto a Juanes. Estas cancións tiveron grande éxito no panorama musical español. En novembro do mesmo ano, recibiu o disco de platino polo seu segundo álbum.

Recentemente, fixo algunhas colaboracións na cadea de Telecinco como asesor de David Bisbal no concurso de talentos infantil La Voz Kids. Tamén foi, xunto aos cantantes Xuso Jones, Álvaro Soler, Raúl Gómez e Pablo Alborán, favorito entre os candidatos nas votacións da selección interna nacional para representar a España no Festival da Canción de Eurovisión 2016, que se celebrou no estadio Globen Arena da cidade de Estocolmo (Suecia), pero manifestou que non iría a Eurovisión porque lle parecía unha responsabilidade moi arriscada, aínda que estaría disposto a participar en calidade de compositor da canción representante. Finalmente, non apareceu nin como cantante nin como compositor.

O 26 de agosto de 2016 confirmouse a participación do cantante na cuarta edición de La Voz España, esta vez como asesor de Malú na edición de adultos. O día 4 de novembro de 2016 foi publicado o tema «Hijos del verbo amar» que pertence ao seu disco El mundo y os amantes inocentes (edición especial). O 3 de abril de 2017 confírmase, como novo adestrador da quinta edición de La Voz. O 15 de decembro de 2017 presentou o seu álbum Camino, fuego y libertad. Once novos temas, compostos, gravados e producidos entre o Reino Unido en The Abbey Road Studios, os Estados Unidos —East West Studios (L.A.)—, Madrid (MG Studios) e Barcelona (Wiked Sound). A xira de presentación do disco, Gira Santa Libertad, comezou a principios de 2018 e continuou ata finais de 2019. En 2018 conquistou ao público Starlite Festival e o resto de cidades colgando o cartel de "esgotado" en todos os seus concertos. Nese mesmo ano colabora coa cantante Miriam Rodríguez, (terceira finalista do renovado formato Operación Triunfo 2017) nun impresionante segundo sinxelo da artista que recibe o título de "No!".

Discografía

Álbums de estudio

Álbum	Detalles	Certificación	Vendas certificadas
Once historias y un piano	Data lanzamento: 17 de setembro de 2013 Discográfica: Universal Music Formato: CD, Dixital	Disco de ouro	20.000
El mundo y los amantes inocentes	Data lanzamento: 31 de agosto de 2015 Discográfica: Universal Music Formato: CD, Dixital	Disco de platino	40.000
Camino, fuego y libertad	Data lanzamento: 15 de decembro de 2017 Discográfica: Universal Music Formato: CD, Dixital	Disco de platino	40.000

Edicións especiais

Álbum	Detalles
Once historias y un piano (edición especial)	Data lanzamento: 2014 Discográfica: Universal Music Formato: CD, Dixital
El mundo y los amantes inocentes (edición especial)	Data lanzamento: 2016 Discográfica: Universal Music Formato: CD, Dixital

Discos sinxelos

• 2013: Vi
• 2013: Dónde
• 2013: Ángel Caído (con Malú)
• 2014: Suplicando
• 2014: Te espero aquí (con Georgina)
• 2014: El mejor momento
• 2015: El mundo (BSO El Príncipe)
• 2015: Tu enemigo (con Juanes) x2 Discos deplatino
• 2016: Lo saben mis zapatos
• 2016: Hijos del verbo amar
• 2017: Dos palabras (con Paula Fernandes)
• 2017: El patio x1 Disco de platino
• 2017: El Camino
• 2018: No! (con Miriam Rodríguez)
• 2018: Igual que tú (con Antonio Orozco)

Premios e nomeamentos

Los 40 Music Awards

Ano	Categoría	Traballo musical	Resultado
2013	Artista revelación do ano		Gañador
2016	Canción do ano	"Tu enemigo" (con Juanes)	Gañador
2018	Mellor canción nacional	"El Patio"	Gañador

Cadena Dial

Ano	Categoría	Resultado
2015	Premio Cadena Dial	Gañador

Grammys Latinos

Ano	Categoría	Traballo musical	Resultado
2016	Mellor Álbum Vocal Pop Contemporáneo	"El Mundo y Los Amantes Inocentes"	Nomeado
	Mellor produción do ano	"El mundo y Los Amantes Inocentes" (Kim Fanlo)	Nomeado

Véxase tamén

Ligazóns externas

• Sitio web oficial
• Twitter oficial
• Facebbok oficial
• Ficha en iTunes Store