Galipedia

Galipedia Wikipedia en galego
Wikipedia, A enciclopedia libre Portada da Wikipedia en galego do ano 2013.
Lingua:	Galego
Data de creación:	8 de marzo do 2003
Artigos:	154.586
Ligazón:	Wikipedia en galego

A Galipedia é o nome co que se coñece popularmente a Wikipedia en lingua galega^[1], unha enciclopedia en liña, de acceso libre, con todos os seus contidos en aberto e editados de forma colectiva en lingua galega. Botou a andar o 8 de marzo de 2003^[2] e ten agora mesmo 154.586 artigos, superando os 100 000 o 4 de marzo de 2013, catro días antes do décimo aniversario. A comezos do ano 2013 usábanse xa 101 305 imaxes distintas.^[3]

Para unha relación cronolóxica dos acontecementos da Galipedia pode consultarse o apartado Actualidade. Existen tamén diversas páxinas de estatística, entre as que figuran Especial:Estatísticas e Wikipedia:Estatísticas.

Índice

TraxectoriaEditar

Manual de colaboración (PDF).

HistoriaEditar

A Wikipedia en galego apareceu o 8 de marzo de 2003. Nese mesmo día, rexistrouse o usuario máis antigo, ILVI. Axiña comezou a traballar na que sería a primeira versión da Portada. E non sería até catro días despois cando creou o primeiro artigo da base de datos: grupo. Logo seguiría con outras entradas como ou, cal, ciencias experimentais, ciencias humanas, ciencias ocultas, ciencias aplicadas e botánico.

Meses despois rexistrouse Agremon e converteuse no primeiro administrador galego da Wikipedia en galego. El mesmo emprega por vez primeira o termo Galipedia para referirse amigablemente ao proxecto, que aínda contaba con menos dun ano de existencia. Aos poucos, mentres tanto, a Galipedia vai sendo citada por algunhas páxinas web de xornais e outras entidades, que se interesan polo labor realizado nela.

CaracterísticasEditar

Trátase dunha enciclopedia colaborativa en lingua galega aberta ás achegas de todo o mundo, con aceptación das diversas correntes de pensamento, sempre que estas non sexan agresivas coas demais. Canto ao contido, está aberta a todos os temas, dende o deporte ou a gastronomía de cada país até as biografías dos persoeiros da física, a astronomía, a lingüística ou a Historia do Reino de Galicia, por exemplo.

Dous puntos que a separan das enciclopedias ao uso son por unha banda un crecemento desorbitado e pola outra a súa capacidade para chuchar información e adaptala de maneira practicamente inmediata. Así, por exemplo, os obituarios ou as novas consideradas transcendentes e de carácter enciclopédico, en moitas ocasións, pasan a formar parte da Galipedia en cuestión de horas ou mesmo de minutos. Así mesmo, isto é posíbel grazas ao contacto co resto de wikipedias (máis de 270), de onde se tiran traducións e modelos, entre outros.

A licenza que emprega é a chamada licenza pública xeral de GNU.

En setembro de 2011, o 31% dos artigos da Galipedia estaban categorizados ou subcategorizados dentro da categoría Galicia.^[4]

ImaxesEditar

Número de novos artigos anuais.

Canto das imaxes, a Galipedia conta cun fondo propio ademais daquel común que achega Wikimedia Commons. Isto non sucede con todas as linguas da Wikipedia. Na actualidade hai cargados 9.318 ficheiros, a maioría deles imaxes, de forma interna. A comezos de febreiro de 2013 tiña 101 305 imaxes distintas entre todos os artigos do proxecto (244 226 contando as imaxes duplicadas), e as imaxes máis usadas, sen contar iconas, bandeiras etc, eran Concellos menos poboados de Galiza.PNG usada 1284 veces (incluída no modelo {{Concellos de Galicia en progreso}}), e Piazza del Campidoglio.jpg usada 1.082 veces (incluída no modelo {{Xeografía en progreso}}).^[3]

EdiciónEditar

O número de editores activos varía dende 2009 entre 260 e 330 aproximadamente. Destes, ao redor dunha vintena son moi activos e entre ningún e 3 son aqueles que polo xeral rebordan as 1.000 edicións mensuais. A media de creación de artigos des que se abrira o proxecto en abril de 2002 é de 8250 por ano; porén, se soamente temos en conta o último período (de 2007 a 2010, ambos os dous anos incluídos), daquela esta media aumenta até 11.400 novos artigos. Arredor dun 35% destes artigos foron creados polos 10 editores máis activos.

A categorización, tanto de artigos coma de imaxes, rolda o 100%.

Artigos de calidadeEditar

Artigo principal: Wikipedia:Artigos de calidade.

A Galipedia conta con 175 artigos de calidade. O primeiro en adquirir esta distinción foi o artigo Club Baloncesto Breogán, o 20 de xuño de 2010. Máis tarde pasarían a engrosar a listaxe os artigos de Castelao, Ramón Piñeiro, Lugo, Hórreo galego, Reino de Galicia, Estatuto de Autonomía de Galicia de 1936, Valentín Paz-Andrade, Alzamento de Pascua, Caso do metílico, Praga, The Beatles, Lenin, Alemaña, Real Club Celta de Vigo, Prestige, Catedral de Santiago de Compostela e Tristan und Isolde, e ós que se irían sumando moitos outros co paso do tempo. No ano 2018, coincidindo co 15 aniversario do proxecto, superáronse os 150 artigos de calidade.

No ano 2016 comezaron a escollerse tamén os artigos bos, dos que actualmente se conta con 68, sendo o primeiro escollido o artigo Slipknot.

Factor humanoEditar

Encontro en Culleredo para dar a coñecer a Galipedia.

A Galipedia deu pé a unha comunidade de persoas colaboradoras con vencellos comúns, a pesar das múltiples diferenzas de procedencia, como a idade, a xeografía ou a ideoloxía. Así, lévanse a cabo encontros de usuarios nos que se fala da historia da Galipedia, da súa realidade presente e dos seus obxectivos futuros. Con todo, tamén existe un grupo de amizade formado ao redor da enciclopedia, que deu pé a grupos en redes sociais como Facebook^[5] ou Twitter^[6]. A presenza feminina é reducida entre as persoas que editan na Galipedia, problema este común ás demais wikipedias.^[7].

Amais da actividade a través da rede, lévanse a cabo proxectos de difusión da Galipedia, como charlas en centros educativos ou encontros para aprender o seu manexo. Así, o 15 de xaneiro de 2011 (10º aniversario da Wikipedia), houbo unha xuntanza en Culleredo e outra en Ribadeo^[8]. En setembro dese mesmo ano desenvolveuse un obradoiro na Cidade da Cultura.

No 2011, o 15 de xaneiro (aniversario da Wikipedia) e o 8 de marzo (aniversario da Galipedia) leváronse a cabo retos de edición para acadar novos récords. En xaneiro propúxose facer 5000 edicións nun día (das que se fixeron pouco máis de 4500) e en marzo propúxose facer 500 artigos novos nun día (creándose uns 450).

O 9 de marzo de 2013 celebrouse o 10º aniversario da Galipedia cun encontro en Santiago de Compostela que incluíu varios relatorios relacionados co coñecemento libre e o activismo cultural.

Ao longo da súa historia, a actividade da Galipedia apareceu reflectida en diversos medios de comunicación, con entrevistas a persoas usuarias na TVG^[9] ou Radio Galega, e artigos en Xornal de Galicia, Vieiros ou Praza pública.

Póster do primeiro Wikimaratón do Día Internacional da Muller en Ourense.

En marzo de 2018 celebrouse o décimo quinto aniversario do proxecto co primeiro Wikimaratón polo Día Internacional da Muller e un galencontro en Ourense.

O 4 de xullo de 2018 escureceu as súas páxinas seguindo a actuación que comezara a Wikipedia en italiano, ante a votación no Parlamento Europeo dunha Directiva sobre dereitos de autor na Unión Europea.^[10]

E-dixgalEditar

E-dixgal é unha contorna virtual de aprendizaxe da Xunta de Galicia para usuarios rexistrados, nenos de 5º e 6º de Primaria e 1º e 2º de ESO, que inclúe unha ligazón directa á portada da Galipedia.^[11]

Logotipos conmemorativos da evolución temporalEditar

Wikipedia	GL		EN
celebración	nº artigos	aniversario	aniversario
6 de decembro de 2006	20.000
23 de xuño de 2007	25.000
3 de decembro de 2007	30.000
8 de marzo de 2008		5
15 de xaneiro de 2011			10
8 de marzo de 2011		8
6 de setembro de 2012	90.000
4 de marzo de 2013	100.000
8 de marzo de 2015		12
8 de marzo de 2018		15