Xaime Quessada

Para outras páxinas con títulos homónimos véxase: Quesada.

Xaime Quesada Porto, coñecido artisticamente como Xaime Quessada, nado en Ourense o 14 de xullo de 1937 e finado en Vilar de Astrés o 30 de decembro de 2007, foi un pintor, escultor e escritor galego. É irmán do debuxante Fernando Quesada.

Xaime Quessada

Biografía
Nacemento	14 de xullo de 1937 Ourense, España
Morte	30 de decembro de 2007 (70 anos) Vilar de Astrés, España
Educación	Escola de Artes e Oficios de Ourense Real Academia de Belas Artes de San Fernando
Actividade
Ocupación	pintor, escultor, escritor
Membro de	Os Artistiñas
Alumnos	Toño Monteiro
Obra
Obras destacables (2001) Dorna
Familia
Fillos	Xaime Quesada Blanco
Irmáns	Fernando Quesada Antonio Quesada
Premios
(2004)  Medalla Castelao

Traxectoria artística

Dorna, 2001, en Pontevedra.

Formouse na Escola de Belas Artes de San Fernando, en Madrid. Nos anos cincuenta frecuenta o grupo de artistas ourensáns nucleados ao redor do Café Volter, denominado Os Artistiñas por Vicente Risco (formado por Arturo Baltar, Xavier Pousa, Virxilio, Xosé Luís de Dios, Acisclo Manzano e Buciños). Obtén a medalla de ouro na Exposición Nacional de Bellas Artes de 1959. Trasládase a vivir a París en 1962, e posteriormente móvese a Estados Unidos, onde traballa na década dos oitenta para a Unesco como artista nun proxecto sobre o Quixote.

Nas súas obras destacan as referencias mitolóxicas, as figuras naturalistas moi coridas, e os corpos esvaídos. Son constantes os motivos e cadros inspirados en Goya (como a súa serie negra) e máis en Picasso, con numerosas versións do Guernica e do minotauro.

O Mouchiño, 2002, en Ourense.

Exposicións e obras

Os seus murais e lenzos de gran tamaño están presentes en moitas pinacotecas europeas, como o Museo Nacional de Arte Moderna de México, o Museo do Pobo Galego, ou o Museo da Habana. Tamén ten obras como os teitos do Teatro Principal de Ourense, no Parlamento de Galicia e diversas esculturas públicas na cidade de Ourense ou a súa dorna homenaxe ao camiño de Santiago na cidade de Pontevedra.

Tamén realizou escenografías e vestiarios para montaxes teatrais, así como diversas ilustracións para libros.

A fada e o dragón, 2006, no Paseo de Alfonso XII de Vigo.

Obra literaria en castelán

Narrativa

• El recristo del Baraña: trágica y singular historia, La galería Novecento, 1981.
• Lucenza, Sotelo Blanco, 1989 (prólogo de Manuel Vázquez Montalbán).
• Cuentos crueles, Ronsel, 2005.

Obra escrita en galego

Conversas

• Conversas con Xaime Quessada, de Olegario Sotelo Blanco, Sotelo Blanco, 1991.

Datos persoais

O seu fillo, Xaime Quesada Blanco, tamén foi pintor. Xaime Quessada foi soterrado no camposanto de Señorín.

Foi un coñecido militante da UPG e posteriormente do Partido Comunista de Galicia en Ourense.

Premios

• Medalla Castelao en 2004.
• Premio da Crítica Galicia 2008 na categoría de "Ciencias e Artes da Representación".
• Fillo predilecto da provincia de Ourense a título póstumo (2009).

Véxase tamén

Bibliografía

• Conversas con Xaime Quesada, Olegario Sotelo Blanco, 1991

Ligazóns externas

• Xaime Quessada na Colección Afundación.