Edificio da Escola Normal de Pontevedra
O edificio da antiga Escola Normal de Pontevedra (Escola Normal de Mestres e Artes e Oficios), en Pontevedra, é un edificio ecléctico de finais do século XIX que foi sede da escola de maxisterio desta cidade galega. Está situado na Gran Vía de Montero Ríos, entre a Alameda de Pontevedra e o Parque das Palmeiras.
Escola Normal de Pontevedra | |
---|---|
![]() Fachada vista desde a Gran Vía de Montero Ríos | |
Edificio | |
Nome inicial | Escola de artes e oficios de Pontevedra |
Tipo | Edificio institucional |
Estilo | Ecléctico |
Custo | 260.000 pesetas |
Enderezo | Gran Vía de Montero Ríos, s/n |
Localización | Pontevedra |
Coordenadas | 42°25′47″N 8°38′56″O / 42.429722222222, -8.6488888888889Coordenadas: 42°25′47″N 8°38′56″O / 42.429722222222, -8.6488888888889 |
Propietario | Deputación Provincial de Pontevedra |
Uso(s) | Edificio Administrativo da Deputación |
Construción | |
Inicio | 1896 |
Construción | 1901 |
Remate | 1901 |
Dimensións | |
Plantas | 4 (3 + semisoto) |
Equipo | |
Arquitecto(s) | Arturo Calvo Tomelén |
[ editar datos en Wikidata ] |
Historia
editarAta finais do século XIX, a escola de maxisterio feminina situábase en Pontevedra no pazo barroco dos García Flórez (hoxe propiedade do Museo de Pontevedra) e a escola de maxisterio masculina no pazo de Mugartegui, ou pazo dos Condes de Fefiñáns.
Na década de 1880, o concello de Pontevedra adquiriu a propiedade da familia Munaiz situada na Gran Vía, un terreo nunha avenida que fora trazada dez anos antes. Decidiuse construír un novo edificio para unha escola de artes e oficios que terminou por acoller a Escola Normal de Mestres así como o instituto provincial en distintas épocas.
En 1895 púxose en marcha o proxecto de construción do Instituto de Artes e Oficios. A obra encargouse ao arquitecto do Ministerio de Fomento Arturo Calvo Tomelén, que deseñara edificios como o Palacio de Joaquín Sánchez de Toca Calvo (actual Embaixada do Brasil en Madrid). En novembro de 1895 Arturo Calvo finalizou o seu proxecto. As obras foron adxudicadas o 1 de maio de 1896 ao construtor de Madrid García Dios.[1] O edificio foi construído fronte ao Pazo da Deputación de Pontevedra que fora inaugurado en 1890. O edificio terminouse e inaugurouse en 1901.[2][3]
O custo total da obra superou as 260.000 pesetas. En 1903 o edificio destinouse tamén ao Instituto de ensino Provincial de Pontevedra, para poñer fin aos numerosos gastos derivados das reparacións do antigo Colexio dos Xesuítas. O edificio acolleu a Escola Normal de Mestres na súa parte posterior e a Escola Normal de Mestras na súa parte dianteira.[4] Co paso dos anos, a súa función cambiou e converteuse temporalmente no instituto de ensino feminino da cidade a finais dos anos sesenta. A partir dos anos 70 foi sede da Delegación Provincial de Educación.[5]
Co traslado da Delegación Provincial de Educación a Campolongo en 2008 ao novo complexo administrativo de torres xemelgas da Xunta de Galicia, o edificio perdeu a súa función como Delegación Provincial de Educación e foi cedido á Deputación de Pontevedra, que o reformou por dentro. Foi inaugurado como edificio administrativo da Deputación de Pontevedra o 11 de febreiro de 2011.[6]
Descrición
editarTrátase dun grande edificio de estilo ecléctico cunha planta cadrada e con tres plantas e un semisoto. Inicialmente o edificio contaba con dúas plantas e un piso recuado que logo se converteu nun terceiro piso completo.[7] Antes de construír todo o espazo do terceiro piso por completo a fachada dianteira remataba no centro nun frontón circular de pedra no que estaba o escudo de España.
A fachada ten o tradicional esquema bicolor de finos ladrillos avermellados e rosados e granito, incluídos os detalles decorativos de pedra ao redor das ventás e as pilastras.[8] Está rodeada por un zócolo de granito. Os ladrillos, moi de moda a finais do século XIX e principios do XX nas fachadas, proceden da antiga fábrica de ladrillos da Barca, moi preto da Caeira.[9] Tamén se atopan na fachada da praza de touros de Pontevedra e na mansión do Marqués de Riestra.[10]
O edificio posúe a peculiaridade de que todas as xanelas das catro fachadas son trixeminadas, excepto as fiestras dos corpos centrais das fachadas dianteira e posterior. No primeiro piso do corpo central da fachada posterior ten un balcón con decoración xeométrica con 4 estrelas de oito puntas en lugar de balaustradas e na fachada dianteira un balcón con 5 motivos florais. Todas as ventás da primeira planta están coroadas por decoración xeométrica no centro dos linteis. A porta balconeira do primeiro piso da fachada dianteira está flanqueada por pilastras xónicas e coroada por un escudo de España de pedra que marca a súa función institucional.
O interior do edificio foi remodelado sucesivamente para adaptar as instalacións a diferentes usos, primeiro educativos, logo administrativos.[11][12]
Galería
editar-
Fachada principal
-
Fachada na Gran Vía de Montero Ríos
-
Fachada este
-
Escudo de armas
-
Fachada este
-
Fachada traseira
-
Fachada oeste
-
Fachada principal
-
Entrada
Notas
editar- ↑ "Subasta de la Escuela de Artes y Oficios de Pontevedra. Adjudicación de las obras". La Opinión: Diario de Pontevedra (en castelán). 1 de maio de 1896. p. 1.
- ↑ "Ladrillo de lujo". Faro (en castelán). 10 de febreiro de 2011.
- ↑ "La Escuela de Artes e Industrias. Promesa del ministro". El Diario de Pontevedra (en castelán). 7 de xaneiro de 1901. p. 2.
- ↑ "Paseando la ciudad". Pontevedra Viva (en castelán). 5 de xuño de 2021.
- ↑ "Ladrillo de lujo". Faro (en castelán). 10 de febreiro de 2011.
- ↑ "La Diputación de Pontevedra gasta 670.000 euros en su segunda sedepáxina". El País (en castelán). 8 de febreiro de 2011.
- ↑ "Ladrillo de lujo". Faro (en castelán). 10 de febreiro de 2011.
- ↑ "Ladrillo de lujo". Faro (en castelán). 10 de febreiro de 2011.
- ↑ "Ladrillo de lujo". Faro (en castelán). 10 de febreiro de 2011.
- ↑ "EL COSO DE SAN ROQUE: las plazas de toros con más encanto". Por Soleá, Spanish Culture & Tradition (en castelán). 27 de xuño de 2018.
- ↑ "La Diputación de Pontevedra gasta 670.000 euros en su segunda sedepáxina". El País (en castelán). 8 de febreiro de 2011.
- ↑ "La Diputación diseña un túnel para conectar su sede con la vieja delegación de Educación". Faro (en castelán). 16 de xullo de 2009.
Véxase tamén
editarWikimedia Commons ten máis contidos multimedia na categoría: Edificio da Escola Normal de Pontevedra |
Bibliografía
editar- Aganzo, Carlos (2010). Pontevedra. Ciudades con encanto (en castelán). Madrid: El País-Aguilar. p. 92. ISBN 978-8403509344.
- Fontoira Surís, Rafael (2009). Pontevedra monumental (en castelán). Pontevedra: Deputación de Pontevedra. p. 425. ISBN 978-84-8457-327-2.
- Riveiro Tobío, Elvira (2008). Descubrir Pontevedra (en castelán). Pontevedra: Edicións do Cumio. p. 48. ISBN 9788482890852.
Outros artigos
editar- Gran Vía de Montero Ríos
- Praza de touros de Pontevedra
- Pazo da Deputación de Pontevedra
- Alameda de Pontevedra
- Instituto Valle-Inclán
Ligazóns externas
editar- Deputación de Pontevedra Edificio Administrativo Arquivado 14 de xullo de 2020 en Wayback Machine.