Requila

Rei suevo de Galiza

Requila (? 448) foi o segundo monarca suevo do reino de Galiza, substituíndo o seu pai Hermerico[1]. Hai poucas fontes primarias para a súa vida, mais Hidacio foi un cronista cristián (mais non ariano) contemporáneo a el.

Requila
Rei do Reino Suevo de Galicia

Reinado438 - 448
Coroación438
Falecemento448
PredecesorHermerico
SucesorRequiario
DescendenciaRequiario
ProxenitoresHermerico

Moeda de ouro sueva datada entre os anos 410 e 500.

Subiu ó trono en 438 por desexo do seu pai Hermerico que estaba enfermo desde anos atrás (finou en 441). Adoptou unha actitude moi agresiva contra os galaicos nativos e a igrexa católica. Enfrontouse ós bispos e favoreceu ó clero priscilianista. Firmou un novo foedus con Roma e alianzas coas tribos bagaudas (bandoleiros do norte peninsular que traballaban como mercenarios). Dirixiu unha política expansionista con campañas por Lusitania e a Bética tratando de encher o baleiro deixado polos retirados vándalos e alanos. Derrotou no 438 a Andevoto (dux romano segundo Isidoro de Sevilla ou un xefe local segundo outras fontes) no río Genil (Singilis)[2]. Conquistou as capitais provinciais de Mérida en 439 e Sevilla en 441[3].

Dominios da monarquía sueva e extensión do reino de Galicia durante as conquistas de Requila (438-448 d.C.).

Durante o seu curto reinado chegou a facerse dono de case toda a actual Andalucía e de parte do Levante. Tamén fixo incursións na Tarraconense e no 446 derrotou ó xeneral romano Veto e as súas tropas auxiliares visigodas.

A súa morte produciuse en Mérida en 448 e sucedeuno o seu fillo Requiario.

NotasEditar

  1. Afonso IX (1289). Menéndez Pidal, ed. Estoria de España (PDF) (1977 ed.). Depues de la muerte de Hermerico finco Riquila su fijo por rey de Gallizia (..) 
  2. Thompson, Romans and Barbarians, 173.
  3. Thompson, Romans and Barbarians, 172.

Véxase taménEditar

BibliografíaEditar

  • López Carreira, A; Fernández Cal, T. Os reis de Galicia. A Nosa Terra. Vigo, 2003. ISBN 84-96203-27-1.
  • Thompson, E. A. Romans and Barbarians: The Decline of the Western Empire. Madison: University of Wisconsin Press, 1982. ISBN 0-299-08700-X.

Outros artigosEditar

Requila
Nacemento: ? Falecemento: 448


Títulos Reais
Precedido por
Hermerico


Rei de Galicia
438–448
Sucedido  por
Requiario