Cadière de Ana da Bretaña
| Cadière de Ana da Bretaña [1] | |
|---|---|
 | |
| R/: Cruz renacentista con N uncial no centro e con cruces nos seus extremos entre pétalos de lirio.
Lendas: SIT * NOMEN * DOMINI * BENEDICTUM * |
A/: Ana da Bretaña sentada no trono, con cetro na man dereita, espada na esquerda e coroa na cabeza. Abaixo data.
Lenda: ANNA . D . G . FRAN . REGINA . ET . BRITONVM . DVCISSA |
A cadière de Ana da Bretaña é unha moeda de ouro do reino de Francia cuñada na ceca de Nantes a finais do século XV, caracterizada por amosar unha imaxe da raíña consorte Ana da Bretaña (1477-1514) sentada no seu trono.[2][3][4]
Contexto editar
A finais do século XV, Ana da Bretaña era duquesa da Bretaña e raíña de Francia viúva de Carlos VIII (1483-1498). Ana decidiu cuñar unha nova moeda —privilexio reservado ao rei e ao príncipe con rango de rei— en conmemoración da soberanía do Ducado da Bretaña e para confirmar a súa autoridade, antes do seu próximo matrimonio co novo rei, Lois XII (1498-1515).[5][6][7][8][9]
Caracterización editar
Trátase dunha moeda cuñada en ouro, cun peso de ca. 3,50 gramos e un diámetro de 28 milímetros.[1][8][9]
Anverso editar
No anverso, a duquesa Ana amósase sentada nun trono con maxestade, un motivo xa utilizado anteriormente por diversos monarcas franceses. Porta un cetro na súa man dereita e unha espada na súa man esquerda, e a súa cabeza está coroada. As súas roupaxes e o seu manto levan os símbolos de Bretaña —armiños— e de Francia —flores de lis—. Aos seus pés figura a data de emisión.[1][7][9]
A lenda que rodea este motivo é ANNA.D.G.FRAN.REGINA.ET.BRITONVM.DVCISSA ("Ana, pola graza de Deus, raíña dos franceses e duquesa dos Bretóns").[1][7][9]
Reverso editar
A figura central do reverso é unha cruz de inspiración renacentista, cargada no centro por un N uncial. A cruz está coroada en cada extremo por cruces entre senllos pétalos de lirio.[1][9]
A lenda en latín do reverso é SIT NOMEN DOMINI BENEDICTUM ("Bendito sexa o nome do Señor"), con pequenos armiños separando as palabras.[1][9]
Denominación editar
O termo cadière fai referencia ao trono en que senta a duquesa (do latín cathedra, en galego "cadeira"). A representación do soberano pódese comparar con outras moedas de ouro denominadas à la chaise na tradición numismática francesa, emitidas polos reis de Francia, especialmente por Filipe VI (1328-1350) e por Xoán o Bo (1350-1364).[6] No entanto, estoutras moedas pesaban arredor de 4,5 gramos e tiñan un diámetro de 29 milímetros.
Exemplares e tipos editar
Aínda que consonte a documentación de época se calcula que se cuñaron arredor de 10.000 exemplares da cadière de Ana da Bretaña, o feito é que poucos deles chegaron aos nosos días. Coñécense dous tipos, con reverso idéntico e executados aparentemente polo mesmo gravador, Jean Bourdichon (ca. 1456 - ca. 1520), pintor do rei.[6]
O primeiro tipo, do que se coñecen tres ou catro exemplares, amosa uns trazos máis propios da moeda medieval e carece de data expresa. O segundo tipo amosa un estilo máis renacentista e amosa a data de 1498 en cifras árabes baixo os pés da raíña, no seu anverso. Deste segundo tipo coñécese unha decena de exemplares.[6]
O exemplar do Museo da Bretaña editar
O Museo da Bretaña, en Rennes, posúe un exemplar deste segundo tipo, con data de 1498.[7] Este espécime foi roubado durante a noite do 13 ao 14 de abril de 2018[10] no Museo Departamental Thomas-Dobrée, de Nantes, onde estaba exposto formando parte dunha exposición titulada "Viaxe nas coleccións".[11]
Foi atopado o 21 de abril do mesmo ano en Saint-Nazarie, xunto co resto do botín.[12]
Notas editar
- ↑ 1,0 1,1 1,2 1,3 1,4 1,5 "1 Cadière - Anne". Numista.com
- ↑ "Cadiere d'or". En Münzen Lexikon (Reppa.de)
- ↑ "Cadière". En Frey, A. R. (1916). Páxina 38.
- ↑ "Cadiere Arquivado 20 de setembro de 2020 en Wayback Machine.". En Martinori, E. (1915).. Páxina 49.
- ↑ "Les RDV de Grand Patrimoine #3 : la Cadière d'or d'Anne de Bretagne". Département Loire-Atlantique.
- ↑ 6,0 6,1 6,2 6,3 Gildas Salaün (2018).
- ↑ 7,0 7,1 7,2 7,3 "Monnaie en or d’Anne de Bretagne dite cadière". Musée de Bretagne.
- ↑ 8,0 8,1 "La cadière d’or d’Anne de Bretagne". La Porte de Pierre.
- ↑ 9,0 9,1 9,2 9,3 9,4 9,5 "Cadière[Ligazón morta]". Musée Dobrée.
- ↑ "Liste prévisionnelle des œuvres volées". Musée Dobrée.
- ↑ "Nantes : l'écrin du cœur d'Anne de Bretagne volé au musée Dobrée". En France Bleu. 14 de abril de 2018.
- ↑ "Le reliquaire d’Anne de Bretagne retrouvé samedi soir dans la région de Saint-Nazaire". En Ouest France. 22 de abril de 2018.
Véxase tamén editar
Wikimedia Commons ten máis contidos multimedia na categoría: Cadière de Ana da Bretaña  |
Bibliografía editar
- Gildas Salaün. (2018). "La Cadière d'Anne de Bretagne". En Monnaie magazine. Xaneiro. Páxinas 50-55.
- Le Blanc, F. (1692). Traité historique des monnoyes de France. Vol. 1. Mortier, Amsterdam. Páxina 258.
- Frey, A. R. (1916). A dictionary of numismatic names; their official and popular designations. American Journal of Numismatics. Vol. 50.
- Martinori, E. (1915). La moneta. Vocabolario generale Arquivado 20 de setembro de 2020 en Wayback Machine.. Roma. Istituto italiano di numismatica.