Baíña, Baiona

Santa Mariña de Baíña é unha parroquia do concello de Baiona. Limita coas parroquias de Belesar, Baredo, Santa Cristina da Ramallosa e Baiona e pertence á comarca do Val Miñor e ó arciprestado de Miñor.

Baíña
Igrexa de Santa Mariña de Baíña.
Concello	Baiona
Provincia	Pontevedra
Coordenadas	42°06′33″N 8°51′32″O
Poboación	1749 hab. (2015)
Entidades de poboación	8
[ editar datos en Wikidata ]

Segundo o IGE , tiña 1749 veciños en 2015 e os seus lugares máis destacados son: O Burgo (518), O Cruceiro (178), Os Eidos (150), As Fontes (231), A Igrexa (121), As Laxes (442), O Río (104) e San Cosme (5). Algúns dos seus casais son: A Moura, O Rial, A Sirimba, As Laxes de Quinós, Almirante Fontán (253) e Santa Marta (331).

Patrimonio

Capela de Santa Marta.

Existen petróglifos en puntos moi diversos, algúns obsérvanse a simple vista, como os do Outeiro dos Lameiros e os da ermida de Santa Marta. Moitos outros atópanse semienterrados e non divulgados para os protexer dos estragos humanos. Tamén se conservan os restos dunha calzada romana e restos dun poboado castrexo na península de Santa Marta.

O nome da parroquia aparece documentado na Idade Media como Vayna. Pertenceu ao mosteiro de Oia até 1482, e daquela agregouna a Baiona o bispo de Tui Diego de Muros.

Dispón de fragas autóctonas á beira do río, de rutas rurais sinalizadas e de varios muíños restaurados. A uns minutos do *merendoiro da Chan da Lagoa, existen restos de muros, de pontes e de vivendas do poboado medieval de San Cosme, referente histórico para Baíña e do que hai lendas vivas coma a da Fonte Santa. Na península de Santa Marta existe unha ermida que queimou e profanou o pirata Francis Drake, quen se hospedou nesta parroquia antes de tentar conquistar Baiona. Posteriormente, a veciñanza reconstruíu esta ermida.

Galería de imaxes

• 
  Espadana da igrexa.
• 
  Igrexa e palco.
• 
  Lateral da igrexa parroquial.
• 
  O palco ten a inscrición MCMXXI.
• 
  Escudo nun dos contrafortes da ábsida da igrexa parroquial.
• 
  Porta da igrexa parroquial
• 
  Cabalos no monte de Baíña.
• 
  Sinal
• 
  Escultura de Soledad Penalta Lorenzo, en Santa Marta.

Lugares e parroquias

Véxase tamén

Bibliografía

• Santa Mariña de Baíña e o Eremitorio de San Cosme, 2008, Comunidade de Montes de Baíña. De Juan Ramón Martínez Barbosa e Xoán Martínez Tamuxe.

Outros artigos

• Lugares de Baiona

Ligazóns externas

• Descrición na páxina da diocese de Tui-Vigo.