Arthur Suhle
Arthur Suhle, nado o 21 de maio de 1898 en Berlín e finado o 14 de febreiro de 1974 na mesma cidade, foi un numismático alemán, especializado na moeda medieval e moderna, e tamén na medalla.
| Biografía | |
|---|---|
| Nacemento | 21 de maio de 1898 Berlín, Alemaña  |
| Morte | 14 de febreiro de 1974 Berlín Alemaña |
| Datos persoais | |
| País de nacionalidade | Alemá |
| Educación |  Universidade de Berlín. Universidade de Friburgo. |
| Coñecido por | Estudos de numismática medieval e moderna, e medallística. |
| Actividade | |
| Campo de traballo | Numismática. |
| Lugar de traballo | Berlín |
| Ocupación | profesor universitario , numismático |
| Empregador | Universidade Humboldt de Berlín |
| Lingua | Lingua alemá |
| Premios | |
| (1957): Medalla Huntington (ANS). | |
Traxectoria editar
Suhle naceu en Berlín o 21 de maio de 1898 fillo dun alto funcionario da Administración educativa. No distrito de Lichterfelde, na súa cidade natal, cursou a súa educación secundaria no Schiller-Gymnasium, onde se graduou en 1915. Pouco despois participou na primeira guerra mundial, onde resultou gravemente ferido.[1]
En 1917 comezou os seus estudos superiores de Historia, Literatura e Filosofía Alemás na Universidade de Berlín, que continuou na Universidade de Friburgo. Finalmente acadou o doutoramento en Berlín en 1921, cunha tese acerca da ocupación dos bispados alemáns baixo o papa Xoán XXII (1316-1334).[1]
En marzo de 1921 ingresou como colaborador voluntario no Gabinete Numismático de Berlín (Münzkabinett), por mediación do supervisor do seu doutoramento, o profesor Tangl. Nesta institución foi nomeado conservador en 1922 e profesor en 1928. Logo do falecemento en 1935 do daquela director do Gabinete, Kurt Regling, Suhle foi nomeado o seu sucesor no cargo, de xeito interino ata 1945, e xa como titular desde esa data ata 1973.[1]
Baixo a súa dirección do Münzkabinett transcorreron a segunda guerra mundial e a posguerra. Durante o conflito, Suhle agochou os fondos do Gabinete e a súa importante biblioteca, entre outros lugares nos sotos do Museo Bode, co que logrou protexelos dos bombardeos, mais na posguerra tanto a colección como a biblioteca foron requisadas e enviadas á Unión Soviética. Nesta conxuntura, Suhle conseguiu, con dificultades, construír unha nova pequena colección mediante adquisicións e préstamos e compilar unha biblioteca cos exemplares máis necesarios. Finalmente, os fondos do Gabinete regresaron desde Leningrado en 1958 sen grandes carencias, aínda que moi desordenados.[1][2]
Paralelamente ao seu labor no Münzkabinett, entre 1946 e 1962 ocupou un posto de profesor de Numismática na Universidade Humboldt de Berlín e, a partir de 1953, tamén impartiu docencia como profesor invitado na Universidade de Leipzig.[1]
Entre outras entidades de índole internacional, Arthur Suhle formou parte da Comisión Internacional de Numismática, foi membro honorario da Sociedade Numismática Romanesa e membro correspondente da Sociedade Numismática Austríaca, da Sociedade Numismática Checa, da Sociedade Numismática Bávara e da Sociedade Numismática Estadounidense. Así mesmo, tamén foi membro do Instituto Arqueolóxico Alemán.[1]
Recoñecementos editar
Publicacións editar
Arthur Suhle foi un prolífico autor de artigos numismáticos, con arredor de 200 referencias en moi diversas revistas do sector e en obras colaborativas, así como dunha decena de monografías[4][5][6]
Monografías editar
- (1936). Die deutschen Münzen des Mittelalters. Verlag für Kunstwissenschaft, Berlín.
- (1938). Münzbilder der Hohenstaufenzeit. Meisterwerke romanischer Kleinkunst. Hiersemann, Leipzig.
- (1950). Die deutsche Renaissance-Medaille. Ein Kulturbild aus der ersten Hälfte des 16. Jahrhunderts. Seemann, Leipzig.
- (1950). Das Münzwesen Magdeburgs unter Erzbischof Wichmann 1152-1192. Rat der Stadt Magdeburg, Magdeburgo.
- (1955). Deutsche Münz- und Geldgeschichte von den Anfängen bis zum 15. Jahrhundert. Deutscher Verlag der Wissenschaften, Berlín.
- (1963). Hohenstaufenzeit im Münzbild. Hirmer, Múnic.
- (1964). Petschafte des Munzkabinetts aus dem 13.-16. Jahrhundert. Staatliche Museen Berlin.
- (1965). Mittelalterliche Brakteaten. Insel-Verlag, Leipzig.
- (1969). Die Münze. Von den Anfängen bis zur europäischen Neuzeit. Koehler & Amelang, Leipzig.
- (1969). Kulturgeschichte der Münzen. Battenberg Verlag, Múnic.
Notas editar
- ↑ 1,0 1,1 1,2 1,3 1,4 1,5 Börner, L. (1968). Páxina 19.
- ↑ Kluge, B. (2004). Páxinas 25-28.
- ↑ "Recipients of the Huntington Medal Award". American Numismatic Society.
- ↑ Börner, L. (1968). Páxinas 20-23.
- ↑ "Suhle, Arthur 1898-". WorldCat Identities.
- ↑ "Arthur Suhle 1898 - 1974". Open Library. Internet Archive.
Véxase tamén editar
Bibliografía editar
- Börner, L. (1968). "Verzeichnis der Schriften von Arthur Suhle". En Forschungen und Berichte. 11. Staatliche Museen zu Berlin. Páxinas 19-33. [Outro acceso ao mesmo contido: aquí]
- Kluge, B. (2004). Das Münzkabinett - Museum und Wissenschaftsinstitut. Münzkabinett - Staatliche Museen zu Berlin. Berlín. ISBN 978-3886094943