Abrir o menú principal

American Numismatic Society

asociación numismática
Non confundir con American Numismatic Association.

A American Numismatic Society -ANS- (en galego: "Sociedade de Numismática dos Estados Unidos") é unha unha sociedade erudita e sen ánimo de lucro dos Estados Unidos dedicada ao estudo e a investigación en materia numismática.[1][2]

American Numismatic Society
(Sociedade Numismática dos Estados Unidos)
ANS logo.jpg
Logotipo da
American Numismatic Society
Presentación
Data fundación1858
LocalizaciónNova York
Flag of the United States.svg Estados Unidos
Area servidaEstados Unidos
MétodoInvestigación, publicacións, biblioteca e organización de eventos.
SloganParva ne pereant
Páxina webSitio web da entidade
PremiosOutorgados:
- Medalla Huntington.
- Medalla Saltus.

O obxecto da sociedade é o estudo das moedas, a circulación monetaria, as medallas, as fichas comerciais e diversos obxectos relacionados, procedentes de calquera rexión do mundo e de calquera momento histórico. A súa sede central, no número 75 de Varick Street, en Manhattan, Nova York, acolle a biblioteca e a colección dedicadas á investigación numismática máis importantes dos Estados Unidos.[3] Estes recursos serven de apoio a especialistas, académicos, coleccionistas, numismáticos profesionais e persoas afeccionadas.[4]

Índice

HistoriaEditar

A American Numismatic Society constituíuse en 1858 polo empeño dun grupo de coleccionistas neoiorquinos, nun momento de auxe na aparición de sociedades científicas en Norteamérica e en Europa. Aínda que o primeiro encontro destes coleccionistas tivo lugar no mes de marzo, a constitución formal da sociedade non tivo lugar ata o 6 de abril dese mesmo ano, cando se aprobaron os estatutos, e inmediatamente produciuse a adquisición das primeiras moedas que constutuirían a súa incipiente colección.[5] En 1865 o nome da sociedade ampliouse a American Numismatic and Archaeological Society (ANAS), aínda que en 1907 recuperou a súa denominación orixinal.[6]

Os fundadores foron Edward Groh, James Oliver, Isaac H. Gibbs, Henry Whitmore, James D. Foskett, Alfred Boughton, Ezra Hill, Augustus B. Sage, Asher D. Atkinson, John Cooper Vail, W. H. Morgan, Thomas Dunn English e Theophilus W. Lawrence. Benson Lossing escribiu en 1884 que os obxectivos principais da sociedade eran "o cultivo da ciencia numismática, a promoción do estudo de arqueoloxía americana e o coleccionismo de moedas, medallas e espécimes de restos arcaicos”.[7] Máis tarde, ANS reconduciu o seu obxectivo para se centrar principalmente en todos os aspectos de moedas e medallas.

Baixo a dirección dos seus primeiros presidentes, caracterizados polo seu dinamismo, o seu enxeño e a súa xenerosidade, a ANS foi medrando ata se converter nun importante centro internacional de investigación numismática. Un destes presidentes, Archer M. Huntington, descendente da familia que construíra o Southern Pacific Railroad e un gran coleccionista, dooulle á sociedade uns terreos en Broadway e contribuíu á construción do edificio neoclásico que se inaugurou en 1908. En 1929, Huntington sufragou tamén a ampliación da construción, que dobrou o seu tamaño. Outro dos seus presidentes senlleiros foi Edward T. Newell (entre 1916 e 1941), unha autoridade na moeda grega, que fixo que a sociedade cobrase sona internacional, ademais de deixar a súa importante colección nparticular como legado para a institicón.

Non foi ata a segunda metade do século XX cando a ANS chegou a ser a entidade de investigación numismática máis importante dos Estados Unidos. O seu gabinete alberga case un millón de obxectos e supón un recurso extraordinario para os estudantes de humanidades, e a súa biblioteca temática de arredor de 100.000 referencias é a máis completa das existentes.[8]

ColecciónEditar

Fondo numismáticoEditar

A colección de moedas, medallas e papel moeda está constituída por arredor de 800.000 pezas procedentes de todos os períodos e culturas, o que a fai a máis completa do mundo en determinados campos e unha das máis significativas en xeral. A colección abrangue desde perimitivos obxectos premonetarios e monetarios da Grecia Antiga e da República Romana, a partir do ano 700 a. de C., ata unha importante representación de moedas e billetes americanos, europeos e do Oriente Medio e Extremo. Ademais, pódense atopar tamén medallas e condecoracións, as máis antigas das cales datan do cuarto milenio antes da nosa era. O departamento de conservación da ANS conserva, estuda e documenta a extensa colección. Este labor inclúe o mantemento e a actualización da base de datos MANTI, que recolle todas as pezas, en moitos casos con imaxes incorporadas. Esta base de datos en liña supón unha oportunidade significativa para o estudo de numismática, xa que é unha das máis completas do seu tipo e é de acceso libre.[9][10]

Recursos en liñaEditar

A American Numismatic Society tamén colabora con outras institucións do mundo para favorecer o acceso en liña ao estudo da numismática. En asociación co Institute for the Study of the Ancient World ("Instituto para o Estudo do Mundo Antigo") está a elaborar o proxecto Online Coins of the Roman Empire -OCRE- ("Moedas do Imperio Romano en Liña"), que aspira a rexistrar e facer accesibles en liña todos os tipos coñecidos das moedas deste período.[11]

A ANS tamén participa no proxecto Nomisma.org, que persegue proporcionar correspondencias dixitais estables de conceptos numismáticos segundo os principios da ligazón de datos abertos (Linked Open Data).[12]

Por outra parte, a sociedade mantén o sitio web The Jewish Museum in Cyberspace (“Museo Xudeu no Ciberespazo").[13]

ExposiciónsEditar

A ANS ten aberta ao público unha pequena exposición permanente de parte dos seus fondos, na súa sede central de Manhattan.[14] Por outra parte, a ANS presta obxectos das súas coleccións a outras institucións de todo o mundo para seren exhibidos, e unha boa parte dos seus fondos están expostos permanentemente no Museo Metropolitano de Arte de Nova York.[15]

BibliotecaEditar

A biblioteca da American Numismatic Society, unha das máis completas do mundo neste campo, componse de máis de 100.000 referencias, entre libros, publicacións periódicas, catálogos de poxas, manuscritos, fotografías e folletos. Unha parte salientable da biblioteca é a sala de libros raros, coa súa colección única de literatura numismática antiga.[16]

PremiosEditar

O ANS recoñece con diversos premios as persoas que contribúen á numismática e ao desenvolvemento da propia institución.[17]

Medalla HuntingtonEditar

Artigo principal: Medalla Huntington.

Outórgase anualmente, na honra de Archer M. Huntington, un importante colaborador e benefactor da ANS nos principios do século XX, que tamén presidiu a sociedade. Este premio recoñece as contribucións destacadas aos estudos numismáticos. O primeiro en recibila foi Edward T. Newell en 1918 e, desde entón foron recoñecidos con ela numismáticos relevantes como Ernest Babelon (1922), Harold Mattingly (1938), C.H.V. Sutherland (1950), Robert Carson (1977), ou os españois Mateu i Llopis (1979) e Leandre Villaronga (1993).[18]

Medalla SaltusEditar

Recibe o seu nome de J. Sanford Saltus, quen inaugurou este galardón en 1913. Este premio outórgaselles a escultores e gravadores pola súa distinción no campo da arte da medalla. Inicialmente tratábase dun recoñecemento exclusivo a artistas dos Estados Unidos, aínda que desde 1983 está aberto tamén aos estranxeiros. Por exemplo, o gañador en 2011 foi o portugués João Duarte.[19]

FormaciónEditar

En 1952, American Numismatic Society estabeleceu o seminario de posgrao que leva o nome do numismático norteamericano Eric P Newman, un dos membros notables da entidade. Este evento formativo en materia numismática ten lugar cada verán e moitos dos seus antigos alumnos exerceron posteriormente a súa actividade docente en diversas institucións universitarias.Ademais, a ANS administra unha serie de bolsas de estudos e subvencións destinadas á promoción do estudo e da investigación en numismática.[20]

PublicaciónsEditar

Tamén é misión da ANS a divulgación dos resultados das investigacións; de feito, é a maior editora mundial sen ánimo de lucro no terreo numismático. Con este propósito, publica libros, monografías, catálogos, artigos de conferencias e actas de encontros científicos, nunha grande variedade de series e números especiais.[21]

Publicacións periódicasEditar

Ademais, a ANS mantén tres publicacións periódicas: American Journal of Numismatics (1866-1924 e desde 1989), de periodicidade anual; Colonial Newsletter (desde 1960), trianual; e a revista trimestral ANS Magazine (desde 2001). Entre 1947 e 2007 publicou tamén o desaparecido Numismatic Literature.[22][23][24][25]

As súas publicacións electrónicas son ANS eNews e o blog Pocket Change.[26][27]

MonografíasEditar

Esta é unha escolla non exhaustiva das múltiples monografías publicadas pola ANS, na que se amosan, a modo de exemplo, dúas publicacións correspondentes a cada década:[28]

  • (1921): Newell, E. The octobols of Histiaea.
  • (1928): Bellinger, A. The anonymous Byzantine bronze coinage
  • (1931): Valentine, D. The United States half dimes.
  • (1933): Cox, D. The Tripolis hoard of French seignorial and Crusader's coins.
  • (1940): Brown, D. Temples of Rome as coin types
  • (1949): Hill, P. Barbarous radiates: Imitations of third-century Roman coins.
  • (1950): Miles, G. The coinage of the Umayyads of Spain.
  • (1954): Miles, G. The coinage of the Visigoths of Spain.
  • (1962): Bellinger, A. Victory as a coin type.
  • (1967): Fagerlie, J. Late Roman and Byzantine solidi found in Sweden and Denmark.
  • (1973): Buttrey, T. Coinage of the Americas.
  • (1979): MacDowall, D. The western coinages of Nero.
  • (1982): Troxell, H. The coinage of the Lycian League
  • (1985): Stahl, A. The Venetian tornesello: A medieval colonial coinage.
  • (1993): Mossman, P. Money of the American Colonies and Confederation: a numismatic, economic and historical correlation.
  • (1996): Metcalf, W. The silver coinage of Cappadocia, Vespasian-Commodus.
  • (2010): Huth, M.; Van Alfen, P. Coinage of the Caravan Kingdoms: Ancient Arabian Coins from the Collection of Martin Huth.
  • (2015): Elkins, N. Monuments in Miniature: Architecture on Roman Coinage.

Sylloge Nummorum GraecorumEditar

Artigo principal: Sylloge Nummorum Graecorum.

A Sylloge Nummorum Graecorum: The Collection of the American Numismatic Society (SNG ) é unha serie de publicacións a través das cales a ANS fai unha descrición sistemática da súa colección de moeda grega. Previamente, a participación da sociedade no proxecto global Sylloge Nummorum Graecorum comezara xa en 1961 coa publicación da colección Burton Y Berri, mais non foi ata 1969 cando a American Numismatic Society publicou o seu primeiro fascículo sobre os fondos da súa propia colección, comezando polas moedas de Italia. A derradeira publicación desta serie corresponde a 1998.[29]

Esta é unha serie detallada das publicacións da ANS dentro do proxecto Sylloge Nummorum Graecorum:[30]

  • (1961): Thompson, M. Sylloge nummorum graecorum: The Burton Y. Berry collection, pt. 1. Macedonia to Attica.
  • (1962): Thompson, M. Sylloge nummorum graecorum: The Burton Y. Berry collection, pt. 2. Megaris to Egypt.
  • (1969): Fisher, J. Sylloge nummorum graecorum: The collection of the American Numismatic Society.
  • (1972): Troxell, H. Sylloge nummorum graecorum: The collection of the American Numismatic Society, pt. 2.
  • (1975): Troxell, H. Sylloge nummorum graecorum: The collection of the American Numismatic Society, pt. 3.
  • (1977): Jaunzems, E. Sylloge nummorum graecorum: The collection of the American Numismatic Society, pt. 4. Sicily II: Galaria-Styella.
  • (1975): Thompson, M. Sylloge nummorum graecorum: The collection of the American Numismatic Society, pt. 5. Sicily III: Syracuse-Siceliotes.
  • (1981): Meshorer, Y. Sylloge nummorum graecorum: The collection of the American Numismatic Society, pt. 6. Palestine-South Arabia.
  • (1987): Waggoner, N. Sylloge nummorum graecorum: The collection of the American Numismatic Society, pt. 7. Macedonia I: Cities, Thrace-Macedonian tribes, Paeonian kings.
  • (1994): Troxell, H. Sylloge nummorum graecorum: The collection of the American Numismatic Society, pt. 8. Macedonia II: Alexander I-Philip II.
  • (1998): Bopearachchi, O. Sylloge nummorum graecorum: The collection of the American Numismatic Society, pt. 9. Graeco-Bactrian and Indo-Greek coins.

NotasEditar

  1. "About us". American Numismatic Society.
  2. "American Numismatic Society". En Atlas Obscura.
  3. "Contact information". American Numismatic Society.
  4. "American Numismatic Society". En American Council of Learned Societies.
  5. "Bylaws of the ANS". American Numismatic Society.
  6. "Certificate of Incorporation": "The corporate name by which this Association shall be known in law is 'The American Numismatic and Archeological Society'".
  7. Lossing, Benson. History of New York City: embracing an outline sketch of events from 1609 to 1830, and a full account of its development from 1830 to 1884. Volume II. Perine Engraving and Pub. Co. Nova York, 1884. Páxina 598.
  8. "History of the American Numismatic Society".
  9. "Collections Management Policy". American Numismatic Society.
  10. Base de datos MANTIS, cos fondos da sociedade.
  11. "Online Coins of the Roman Empire (OCRE)". En Numismatics.org.
  12. Información sobre o proxecto. Nomisma.org
  13. Información sobre o proxecto. Amuseum.org
  14. "Exhibits". American Numismatic Society.
  15. "Traveling Exhibits". American Numismatic Society.
  16. "The Harry W. Bass Jr. Library". American Numismatic Society.
  17. "Awards Given by the American Numismatic Society".
  18. "Recipients of the Huntington Medal Award". American Numismatic Society.
  19. "Recipients of the Saltus Medal Award". American Numismatic Society.
  20. "Graduate Seminar". American Numismatic Society.
  21. "Publications". American Numismatic Society.
  22. "American Journal of Numismatics". American Numismatic Society.
  23. "Journal of Early American Numismatics (was Colonial Newsletter)". American Numismatic Society.
  24. "ANS Magazine". American Numismatic Society.
  25. "Numismatic Literature". American Numismatic Society.
  26. "ANS eNews". American Numismatic Society.
  27. Pocket Change. The blog of the American Numismatic Society.
  28. "ANS Publications History". American Numismatic Society.
  29. "Sylloge Nummorum Graecorum: The Collection of the American Numismatic Society, 1969-98".
  30. "Sylloge Nummorum Graecorum". American Numismatic Society.

Véxase taménEditar