Xacarandaina

Sede de Xacarandaina na Coruña.

Xacarandaina é unha asociación cultural que ten a súa sede na Coruña. Naceu en 1978 cunha finalidade educativa para os máis novos. Nos seus comezos a asociación tivo o seu local social no edificio "La Terraza", nos xardíns de Méndez Núñez. Na actualidade (2010) a asociación conta con 800 socios.

Actividades

Xacarandaina conta cunha escola na que se ensinan materias diversas, entre as que destacan baile tradicional galego, gaita, pandeireta e canto. Ademais da escola, a asociación mantén o coñecido Grupo de Música e Baile Tradicional Xacarandaina, que no momento da súa formación estaba composto por 30 persoas e dirixido por Rosi Ares e Lino Rivas. Na actualidade o grupo ten uns 50 compoñentes. Dende 1982 o seu director é Henrique Peón.

O Grupo de Música e Baile Tradicional Xacarandaina ten como cometido investigar e difundir o folclore galego. Para iso realízanse espectáculos en Galicia, pero tamén en toda España e en moitos festivais internacionais. Da escola de Xacarandaina saen moitos dos que logo serán integrantes do Grupo de Música e Baile, e que á súa vez son mestres dalgunhas actividades da escola da asociación.

Dentro do calendario anual da asociación hai unha serie de actividades fixas:

• Concurso Interno de música e baile. Actúan os alumnos de gaita, pandeireta e baile tradicional.
• Foliada e Romaría do Lecer. Clausura de actividades da asociación, con actuacións de grupos de baile tradicional, pandeireta, gaita etc.
• Día da Muiñeira. Os asistentes interpretan tres muiñeiras de cinco voltas e catro puntos.

Ademais Xacarandaina organiza dous concursos anuais de carácter aberto:

• Concurso de Música Tradicional.
• Concurso de Baile Tradicional.

Véxase tamén

Ligazóns externas

• Páxina web da A.C. Xacarandaina.