Requeixo, Chantada
Coordenadas: 42°36′47″N 7°52′09″O / 42.6129664, -7.86925267
Santiago de Requeixo é unha parroquia que se localiza no concello de Chantada. No ano 2020 tiña unha poboación de 128 habitantes (60 homes e 68 mulleres) segundo os datos do Instituto Nacional de Estadística[2]. Supón un descenso respecto ao ano 2011, cando contaba con 166 veciños, e 2004, cando tiña 192.[3]
| Requeixo | |
|---|---|
 Ábsida da igrexa de Santiago de Requeixo. | |
| Concello | Chantada[1] |
| Provincia | Lugo |
| Área | 10,04 km² |
| Poboación | 128 hab. (2020) |
| Densidade | 12,75 hab./km² |
| Entidades de poboación | 17[1] |
| [ editar datos en Wikidata ] | |
ToponimiaEditar
O nome da parroquia é un orónimo ben descritivo da súa xeografía, pois se atopa nas abas orientais da serra do Faro que descenden á conca do río Miño.
XeografíaEditar
A parroquia de Requeixo, con 10,04 km², é a terceira en extensión despois das da Laxe e de Nogueira. Está a 14 km da vila de Chantada, na parte baixa do monte Faro, que acada 1187 metros. A zona habitada da parroquia sitúase a unha altitude de entre 600 e 700 metros.
Dispón de abundantes mananciais e regatos. A montaña do Faro e as súas ladeiras están poboadas de árbores que supoñen unha fonte de riqueza para a zona. Destacan grandes exemplares de castiñeiros. Dende a montaña antes citada pódese gozar de amplas vistas panorámicas. En días claros chega a se albiscar a central térmica de Meirama, na comarca coruñesa de Ordes. Así mesmo esta montaña acubilla distintas especies de caza. Ultimamente pódense encontrar exemplares de caza maior, como o gamo ou o xabaril, entre outros.
HistoriaEditar
No monte Faro atópase a ermida dedicada á Nosa Señora do Faro, onde se celebran romarías os días 15 de agosto, e 7, 8 e 9 de setembro, xa descritas polo trobador Xoán de Requeixo nas súas cantigas de amigo no século XIII. O día 7 de setembro sóbese a Virxe en romaría deica a ermida, que dista uns 4 quilómetros da igrexa parroquial de Requeixo, mentres que o día 9 vólvese baixar.
A parroquia de Requeixo no momento de máximo esplendor chegou a ter preto de 1.000 habitantes. O val de Requeixo é moi rico en gandaría polos seus amplos pasteiros.
EconomíaEditar
Requeixo dispón de medianos saltos de auga onde se produce enerxía eléctrica e que outrora servían para mover as aceas. En tempos recentes descubríronse minas moi abundantes en estaño, as cales atraeron moitos foráneos para a súa explotación.
Tradicionalmente moitas mulleres de Requeixo traballaron como tecelás, entre as que se lembran especialmente as irmás Elvira e Evangelina. Os seus traballos eran coñecidos e apreciados en todo o país e mesmo tamén noutras rexións, como en Madrid. Tamén destacaron artesáns de ebanistaría.
PatrimonioEditar
Entre o seu patrimonio monumental, salienta a igrexa románica de Santiago de Requeixo, do século XII, situada no lugar de Fontela. Nela destaca o tímpano embutido nunha parede lateral, que pertenceu á portada románica actualmente desaparecida. Ten un repertorio variado de canzorros de grande calidade, e no interior, interesantes pinturas murais do século XVI[4].
Lugares e parroquiasEditar
Lugares de RequeixoEditar
| Lugares da parroquia de Requeixo no concello de Chantada (Lugo) | |
|---|---|
|
Alence | O Cabo | Caíbe | A Campaza | O Campo | Eiravedra | Fondoreses | Fontela | A Lama | O Pacio | O Pereiro | Río | Vila do Monte | Vilasusá | Viloira | Xillán de Abaixo | Xillán de Arriba |
Parroquias de ChantadaEditar
NotasEditar
- ↑ 1,0 1,1 Decreto 6/2000, do 7 de xaneiro, polo que se aproba o nomenclátor correspondente ás entidades de poboación da provincia de Lugo.
- ↑ "Instituto Nacional de Estadística. (Spanish Statistical Institute)". www.ine.es. Consultado o 2021-02-18.
- ↑ www.concellodechantada.org
- ↑ X. Lois García, Simboloxía do Románico de Chantada, Lugo, 2010, pp. 177-192