Alejandro Sesmero

Alejandro Rodríguez-Sesmero González (nalgunhas ocasións asinaba como Alejandro Sesmero), nado en Xixón en 1843 e finado en Córdoba (Arxentina) o 22 de outubro de 1913, foi un arquitecto que traballou en Galicia.

Alejandro Sesmero

Biografía
Nacemento	1843 Xixón, España
Morte	22 de outubro de 1913 (69/70 anos) Córdoba, Arxentina
Datos persoais
País de nacionalidade	España
Actividade
Ocupación	arquitecto
Lingua	Lingua castelá
Obra
Obras destacables (1878) Palacete das Mendoza (1879) Alameda de Pontevedra (1880) Casa Consistorial de Pontevedra (1884) Rúa García Camba (1890) Pazo da Deputación de Pontevedra (1892) Goberno Militar (Pontevedra)
Familia
Pai	Domingo Rodríguez Sesmero

Traxectoria

Fillo de Domingo Esteban Rodríguez Sesmero, arquitecto nado en Medina del Campo. Estudou Arquitectura en Valladolid, acadando o título de Mestre de Obras. Colaborou co seu pai entre 1866 e 1869 como delineante da Deputación Provincial. Nese ano o seu pai trasladouse a Vigo, nomeado arquitecto municipal nesa cidade. Alejandro Sesmero foi interino nese posto entre maio de 1875 e xullo de 1876, momento en que pasou a ser arquitecto municipal interino de Pontevedra, pola renuncia de Justino Flórez Llamas.

Pazo da Deputación de Pontevedra, 1890.

Nesta cidade proxectou a expansión urbana cara ao exterior, logo de ser derrubada a muralla medieval. Deseñou a Casa Consistorial de Pontevedra, a avenida de Santa María, o palacete das Mendoza, a Alameda e o parque das Palmeiras, o cemiterio de Santo Amaro, os depósitos da traída de augas en San Amaro e as fontes no casco urbano, o Pazo da Deputación (xunto co seu pai), un colexio que hoxe é o edificio da Subdelegación de Defensa na provincia de Pontevedra, o antigo Mercado Municipal de 1886 e reformou a capela da Virxe do Camiño. En 1880 foille concedida a Cruz da Real Orde de Carlos III. En 1887 parte da corporación local propuxo a súa designación como arquitecto municipal, mais a idea non saíu adiante porque non tiña o título oficial de arquitecto.

Fonte da Praza do Peirao de Pontevedra, 1876, coa estatua da deusa romana Fama.

Dimitiu do posto e solicitou a legalización do título ante a Dirección Xeral de Instrución Pública. Unha vez conseguido, abandonou a súa muller, Pilar Rubio Romea, e os seus fillos (Adelaida, Ricardo, Enrique, María del Pilar, Alfonso e Margarita) e en xaneiro de 1889 marchou a Arxentina, sendo nomeado profesor de Arquitectura e Debuxo Arquitectónico na Facultade de Ciencias Físico-Matemáticas da Universidade Nacional de Córdoba. Alí compaxinou a docencia co deseño de edificios públicos, e foi membro de tribunais de oposicións.

Galería de imaxes

• 
  Casa Consistorial de Pontevedra, 1880
• 
  Palacete das Mendoza, 1878, sede de Turismo Rías Baixas, Pontevedra.
• 
  Casa Odriozola (Axencia Comunitaria de Control da Pesca), 1875, Vigo.
• 
  Casas para Manuel Blanco García, 1878, Sede de Radio Vigo e Localia Vigo.
• 
  Goberno Militar de Pontevedra, 1892

Véxase tamén

Bibliografía

• García Filgueira, M. (2005). "Clasicismo, Neomedievalismo y Eclecticismo en la obra de Domingo Rodríguez Sesmero como arquitecto diocesano de Tui y Santiago de Compostela (1882-1897)" Cuadernos de Estudios Gallegos (CSIC), nº 118.
• García Filgueira, M. (2006). Eclecticismo y arquitectura en la Galicia del siglo XIX. La obra de Domingo Rodríguez Sesmero y Alejandro Rodríguez-Sesmero González. Tese de doutoramento.
• García Filgueira, M. (2006). "Arquitectura y urbanismo en Galicia. Alejandro Sesmero, arquitecto municipal de Vigo"Arquivado 28 de outubro de 2020 en Wayback Machine., pp. 115-136, Minius, Revista do Departamento de Historia, Arte e Xeografía da Universidade de Vigo, nº XIV.
• García Filgueira, M. (2007). "La Alameda de Vigo en el siglo XIX"Arquivado 28 de outubro de 2020 en Wayback Machine., pp. 97-116, Minius, Revista do Departamento de Historia, Arte e Xeografía da Universidade de Vigo, nº XV.
• García Filgueira, M. (2011). "La arquitectura teatral de los Sesmero en Vigo: El Rosalía de Castro y el Tamberlick", en Boletín do Instituto de Estudios Vigueses, Ano XVI, nº 16.
• García Filgueira, M. (2014). Eclecticismo, arquitectura y ciudad. La obra de los Sesmero en Vigo, Instituto de Estudios Vigueses. ISBN 978-84-89599-55-0 .
• Portela Sandoval, F.J.: "Alejandro Rodríguez-Sesmero, un arquitecto ecléctico de finales del siglo XIX: de Galicia a la República Argentina", Madrygal, 2008 (en castelán)

Outros artigos

• Domingo Rodríguez-Sesmero
• Gran Vía de Montero Ríos

Ligazóns externas

• Abal, Cesar. «Don Alejandro Sesmero. 1913, su centenario» 1/12/12.