Portal:Ourense

Ourense é unha cidade galega, capital da provincia de Ourense e da súa comarca homónima. É a terceira cidade máis poboada de Galicia despois de Vigo e A Coruña. Segundo o IGE, en 2014 a poboación foi de 106.905 habitantes (107.597 en 2012). Situada preto da Vía Nova que unía Bracara Augusta (hoxe Braga en Portugal) con Asturica Augusta (hoxe Astorga) a cidade mantivo importancia tras a época romana pola súa ponte e situación central na antiga Gallaecia. Foi corte real dos suevos crese que durante o reinado de Carriarico/Teodomiro que foi o que fundou a primeira igrexa dedicada a San Martiño de Tours. Está atravesada polos ríos Miño, Barbaña e Lonia. É coñecida como "A cidade das Burgas" debido á sona das súas famosas fontes de augas termais (a auga sae a 60-68 °C). Tamén se lle coñece como Auria. Destacan como monumentos a Catedral de Ourense (s.XII) co seu Pórtico do Paraíso e o Santo Cristo, a ponte Romana, o claustro de San Francisco, a igrexa da Trindade e a de San Domingo, e o conxunto do seu casco antigo, en proceso de recuperación. Cidade termal por excelencia, ademais das Burgas o visitante pode gozar das augas termais do balneario da Chavasqueira (de inspiración xaponesa), O Tinteiro, Muíño da Veiga e Outariz. Están moi próximos á capital os centros balnearios da Arnoia, Baños de Molgas, Laias e O Carballiño. Amosar máis contido destacado Artigo destacado O Club Ourense Baloncesto, coñecido por motivos de patrocinio como Ourense Provincia Termal, é un club de baloncesto profesional da cidade de Ourense (Galicia). Fundado en 1979 e ascendeu por primeira vez á máxima categoría en 1988, na que competiu dez tempadas, nove delas consecutivas, ocupando a 32ª posición na clasificación histórica de clubs. Na tempada 2002-03 o equipo participou na FIBA EuroCup Challenge, milita na segunda categoría, a Liga LEB. Os seus xogadores visten un uniforme que consiste nunha camiseta cor azul celeste e laranxa cun pantalón da mesma cor. A súa pista de xogo é o Pazo Paco Paz, tamén sede oficial do club, e que conta con capacidade para máis de 5.000 espectadores. O seu actual presidente é Antonio Gavilanes. O club tamén dispón dun filial na liga EBA, así como con múltiples equipos que xuntan a rapaces de tódalas idades. Entre os títulos do equipo salientan cinco Copas Galicia e unha Copa Príncipe de Asturias conquistada en Granada na tempada 1999-2000. Lugar de interese As Burgas son uns mananciais de augas termais que se localizan na cidade de Ourense. Deles brotan unhas augas silicatadas, fluoradas, litínicas e hipertermais, a unha temperatura entre 64 e 68 °C cun caudal de 300 litros por minuto. Estas augas son aplicables a diferentes tipos de dermopatías. A composición da auga das Burgas foi determinada mediante análise polos doutores Souto e Bermejo en 1990, sendo as súas augas moi ricas en bicarbonato (462 mg/l), así como en sodio (102,2 mg/l). As Burgas constan de tres mananciais: a Burga de Arriba, a máis antiga, de estilo popular e pertencente ó século XVII; a Burga do Medio, pegada ao muro e de estilo moderno; e a Burga de Abaixo, de estilo neoclásico, século XIX, con dous canos laterais e unha pía labrada no centro con outro cano. Tamén se atopa neste conxunto a réplica das catro aras romanas atopadas na cidade, a primeira delas en honor das Ninfas desas augas ofrendada por Calpurnia Abana Aeboso, que é o primeiro nome coñecido dun habitante da cidade de Ourense. Estes mananciais foron declarados Conxunto Histórico-Artístico no ano 1975. Imaxe destacada Fonte na Praza do Ferro. Vexa o artigo Mosteiro de Santo Estevo de Ribas de Sil. Biografía destacada Florentino López Alonso-Cuevillas, nado en Ourense o 14 de novembro de 1886 e finado na mesma cidade o 30 de xullo de 1958, foi un historiador e escritor galego. En 1968 dedicóuselle o Día das Letras Galegas. Está considerado o Pai da arqueoloxía científica galega. Pertenceu á Xeración Nós, ao Seminario de Estudos Galegos e as Irmandades da Fala, compaxinando a actividade desempeñada nestas institucións cunha discreta participación política en pro do galeguismo, na época en que se volveu nacionalista trala fase rexionalista. Porén, a súa labor socio-política viuse profundamente trastornada trala guerra civil española e a chegada do franquismo, se ben continuou a divulgación da cultura galega a través da Real Academia Galega, da que foi membro numerario. Cuevillas reconstruíu a prehistoria galega dende un cientifismo rigoroso, partindo de cero. A vocación arqueolóxica de Cuevillas, incrementárase asistindo ás tertulias do Museo da Comisión de Monumentos, quedando reflectida no estudo "A mansión de Aquis Querquernis" (1921) que encerraba un vasto labor sobre a romanización de Galicia. Recorreu os montes catalogando calquera información, escavando por primeira vez con criterios estratigráficos modernos, buscando paralelos con outras culturas europeas, sen esquecer publicar os resultados en galego, usando a lingua galega por primeira vez como lingua de ciencia. En 1953 publicou La civilización céltica en Galicia, trazando cos datos de seis poboados castrexos un panorama da cultura castrexa galega dende as perspectivas máis diversas, como arquitectura, cultura material ou sociedade. Sabías que...? ... na madrugada do 25 de xuño de 1931 proclamouse a República Galega dende a Casa do Concello da cidade? ... o nome da cidade vén da época romana, cando foi bautizada como Auriense ("a cidade de ouro") pola abundancia dese metal precioso? ... a catedral de Ourense foi construída como unha fortaleza defensiva? Artigos de calidade e bos Artigos de calidade (0) Artigos bos (1) Florentino López Cuevillas Portais relacionados Galicia Galicia Lugo A Coruña Ferrol Ferrol Lugo Lugo Pontevedra Pontevedra Santiago de Compostela Santiago de Compostela Vigo Vigo Proxectos irmáns Wikimedia Commons en Commons