Juan López Fernández
Juan López Fernández, alcumado "O Negro", nado na Pobra do Caramiñal o 30 de outubro de 1929 e finado o 7 de setembro de 2017, foi un futbolista galego. Xogaba de dianteiro.
| Juan | |||
|---|---|---|---|
| Información persoal | |||
| Nome | Juan López Fernández | ||
| Nacemento | 30 de outubro de 1929 | ||
| Lugar de nacemento | A Pobra do Caramiñal | ||
| Falecemento | 7 de setembro de 2017 | ||
| Posición | Dianteiro | ||
| Carreira xuvenil | |||
| Orzán | |||
| Victoria | |||
| Español | |||
| Carreira sénior | |||
| Anos | Equipos | Aprs | (Gls) |
| 1949–1950 | Arousa | 18 | (8) |
| 1950–1952 | Racing de Ferrol | 43 | (14) |
| 1952–1955 | CD Málaga | 57 | (24) |
| 1955–1956 | Deportivo da Coruña | 8 | (5) |
| 1956–1957 | Xerez | 21 | (13) |
| 1957–1958 | Eldense | 31 | (9) |
| Espinho | |||
|
Partidos e goles só en liga doméstica. [ editar datos en Wikidata ] | |||
Traxectoria editar
Nacido na Pobra do Caramiñal trasladouse coa súa familia á Coruña con menos dun ano de idade. Na cidade herculina comezou a xogar ao fútbol na AD Huracán e no Amanecer, pasando despois polo Orzán SD, o Victoria CF e o Español SD.[1]
Con 20 anos debutou na Segunda División, formando parte do Arousa na histórica tempada 1949/50, a única do club na categoría de prata. No equipo de Vilagarcía compartiu dianteira entre outros con Ventura, López Vázquez e Nolito, e marcou 8 goles.[2][3]
En 1950 fichou polo Racing de Ferrol, adestrado por José Planas. Na súa primeira campaña en Ferrol formou na dianteira xunto con Marquínez, Fabeiro e Álvarez, entre outros, e marcou oito goles. Na seguinte os seus compañeiros máis habituais no ataque foron Alvarito e Roig. Fixo seis goles, que contribuíron a que o equipo rematase na terceira posición e disputase a fase de ascenso a Primeira División, na que meteu tres goles máis, pero sen conseguir ascender.
En 1952 fichou polo CD Málaga, co que debutou en Primeira División nun partido contra o Sporting de Gijón no Molinón. Disputou 13 partidos nos que marcou 5 goles, descendendo a Segunda ao remate da campaña. Na tempada 1953/54 marcou 11 goles na liga e outros 7 na promoción de ascenso, contribuíndo de xeito importante a que o club regresase a Primeira. Foi o máximo goleador do equipo na tempada 1954/55, con 8 goles en 18 partidos, pero o club rematou último e descendeu de novo.
En xullo de 1955 fichou polo Deportivo da Coruña, da Primeira División.[4] O 1 de setembro disputou contra o Athletic Club a décima edición do Trofeo Teresa Herrera, a primeira na que participaba o Deportivo. Formou na dianteira xunto con Arsenio, Pahiño, Lechuga II e Polo, e conseguiu proclamarse campión grazas a dous goles de Pahiño, no que a prensa da época definiu como un dos días máis memorábeis da historia do fútbol coruñés.[5] Xogou só 8 partidos oficiais co Deportivo, onde estivo á sombra de Pahiño e Bazán, e marcou 5 goles.
En 1956 fichou polo Xerez CD, de Segunda División. No equipo adestrado por Eguiluz recuperou a titularidade, disputando 21 partidos nos que marcou 13 goles. Na tempada seguinte xogou co Eldense, tamén en Segunda, marcando 9 goles. Máis tarde xogou no Sporting Clube de Espinho de Portugal.
Logo de retirarse, pasou a ser armador de barcos de pesca. Faleceu o 7 de setembro de 2017, aos 87 anos.[6]
Notas editar
- ↑ "Juan, el coruñés delantero del Málaga". La Voz de Galicia (en castelán). 11 de xuño de 1955. p. 5.
- ↑ "El Arosa sigue afirmando su recuperación". El Pueblo Gallego (en castelán) (8281). 17 de xaneiro de 1950. p. 4. Consultado o 18 de decembro de 2021.
- ↑ "Un penalty dio el triunfo a la Orensana sobre el Arosa, 1-0". La Región (en castelán) (10163). 14 de marzo de 1950. p. 3. Consultado o 18 de decembro de 2021.
- ↑ "Juan, del Málaga, al Deportivo". El Progreso (en castelán) (14917). 19 de xullo de 1955. p. 4. Consultado o 18 de decembro de 2021.
- ↑ "Con todos los honores, el Deportivo se adjudica el X Trofeo Teresa Herrera, al vencer al Atlético de Bilbao (2-1)". La Noche (en castelán) (10755). 2 de setembro de 1955. p. 4. Consultado o 22 de decembro de 2020.
- ↑ "Juan, o '9' do primeiro Dépor que gañou o Teresa Herrera, falece aos 87 anos". Deportivo da Coruña. 8 de setembro de 2017.
Véxase tamén editar
Ligazóns externas editar
- Datos do xogador en BDFutbol (en castelán).