Tomás Leal da Câmara

Tomás Júlio Leal da Câmara, coñecido en Francia como Camara, nado en Panaji no Estado da India portuguesa o 30 de novembro de 1876 e finado o 30 de xullo de 1948, preto de Sintra, foi un pintor e caricaturista portugués famoso no París da Belle Époque.

Tomás Leal da Câmara

Nome orixinal	(pt) Tomás Júlio Leal da Câmara
Biografía
Nacemento	30 de novembro de 1876 Pangim, India (pt)
Morte	21 de xullo de 1948 (71 anos) Rinchoa, Portugal (pt)
Actividade
Campo de traballo	Artes visuais
Lugar de traballo	París
Ocupación	caricaturista, artista visual, debuxante, editor de postais (pt) , pintor, litógrafo
Período de actividade	(Con vida en: 1900 )

Traxectoria

Câmara chegou a Lisboa con catro anos. Dotado para o debuxo, matriculouse no Instituto de Agronomía e Veterinaria, que abandonou en 1896 para dedicarse á defensa do ideal republicano, xurdido entón no país. Xunto a Bordalo Pinheiro foi un dos máis destacados humoristas gráficos en Portugal.

Desde 1898 publicou numerosas viñetas dirixidas contra a monarquía e a aristocracia. Estas publicacións portuguesas moitas veces foron prohibidas ou afectadas pola censura, e pronto viuse obrigado a exiliarse en Madrid, onde fixo amizade con Rubén Darío, e comezou a publicar en Madrid Cómico.

Alí presenciou o enfrontamento verbal e físico nun café entre os escritores Manuel Bueno Bengoechea e Ramón María del Valle-Inclán o 24 de xullo de 1899. O primeiro agrediu a Valle-Inclán co bastón na cabeza e o brazo, a ferida gangrenouse e provocaría que lle tivesen que amputar o brazo. Segundo o libro publicado en Laiovento por Javier del Valle-Inclán, neto do autor galego, Ramón del Valle-Inclán entre Galiza e Madrid (1912-1925), o portugués tería sido o causante involuntario do incidente, reflectido tamén nunha carta do propio Câmara. Ademais de a Valle-Inclán, en Madrid debuxou a outros galegos como Wenceslao Fernández Flórez e Emilia Pardo Bazán

Leal da Câmara residiu en París de 1900 a 1910, onde participou activamente no movemento anarquista e publicou debuxos e caricaturas en L'Assiette au Beurre. Despois instalouse en Bélxica.

En outubro de 1910, a proclamación da república en Portugal permitiulle volver a casa e estableceuse en Porto. En 1912 expuxo os seus cadros e debuxos nunha galería de Lisboa e nos distintos actos organizados polos Salões dos Humoristas e Modernistas de Porto.

Durante a primeira guerra mundial mantívose preto do grupo de artistas humoristas e non perdeu nada da súa verve satírica.

Regresou a Lisboa en 1922, após dunha viaxe ao Brasil, e alí dedicouse a pintar e ilustrar libros infantís. Desde 1930 e até a súa morte o 30 de xullo de 1948 viviu en Rinchoa, preto de Sintra. A súa vivenda, que fora do Marqués do Pombal , foi transformada por Leal da Câmara e a súa esposa en escola primaria, e hoxe un agrupamento de escolas leva o seu nome . Logo do seu pasamento, a vivenda converteuse en casa museo (CMLC) grazas á súa viúva Júlia de Azevedo (1894-1965). Alén da mostra permanente, a CMLC acolle exposiciòns periódicas, como "Leal da Câmara projetista", de febreiro a maio de 2022.

Un coro do conservatorio de Sintra tamén leva o nome de Leal da Câmara.

Galería

Obras

• 
  Emile Chautemps apareceu en 1903 en L'Assiette au Beurre.
• 
  O rei Leopoldo II dos belgas apareceu en Le Cri de Paris.
• 
  Muller cun abano xaponés
• 
  No casino (1904)
• 
  'Les Diplomates' no L'Assiette au Beurre
• 
  Caricatura de Henri Letellier, socio de André Citroën
• 
  Capa do nº 160 de L'Assiette au Beurre

Casa Museu Leal da Câmara

• 
• 
• 
• 
• 
• 
• 

Véxase tamén

Outros artigos

• Anarquismo
• Belle Époque
• Valle-Inclán
• L'Assiette au Beurre
• Simplicissimus

Ligazóns externas

• Freire, João (15 de abril de 2014). "CÂMARA Tomaz Leal da". Dictionnaire des anarchistes (en francés). 
• "Casa-Museu Leal da Câmara". Câmara Municipal de Sintra (en portugués). Arquivado dende o orixinal o 21 de febreiro de 2014. Consultado o 22 de febreiro de 2022.