Ramón González Figueroa
Ramón González Figueroa, nado na Coruña en 1898 e finado na mesma cidade o 4 de novembro de 1977, foi un futbolista galego. Xogaba de dianteiro e destacou especialmente no Vigo Sporting e no Deportivo da Coruña. Foi internacional coa selección española, coa que gañou a medalla de prata nos Xogos Olímpicos de 1920.
| Ramón González | |||
|---|---|---|---|
| Información persoal | |||
| Nome | Ramón González Figueroa | ||
| Nacemento | 1898 | ||
| Lugar de nacemento | A Coruña | ||
| Falecemento | 4 de novembro de 1977 | ||
| Posición | Dianteiro | ||
| Carreira sénior | |||
| Anos | Equipos | Aprs | (Gls) |
| 1914–1917 | Fabril | ||
| 1917–1918 | Real Club Coruña | ||
| 1918–1923 | Vigo Sporting | ||
| 1923 | Celta de Vigo | ||
| 1924–1931 | Deportivo da Coruña | ||
| Selección nacional | |||
| 1920 | España | ||
|
Partidos e goles só en liga doméstica. [ editar datos en Wikidata ] | |||
A súa fichaxe polo Deportivo da Coruña en 1923, xunto ás de Otero, Isidro e Chiarroni, pouco despois de que a fusión do Vigo Sporting co Fortuna dese orixe ao Celta de Vigo, provocou unha batalla legal entre os dous clubs e foi o detonante da actual rivalidade Celta-Deportivo.
Traxectoria editar
Comezou xogando no Fabril, dende o mesmo ano da creación do club, e tras un curto paso polo Real Club Coruña marchou a Vigo, onde xogou no Vigo Sporting.[1] Co club vigués disputou o Campionato de Galicia, proclamándose campión nas tempadas 1918/19, 1919/20 e 1922/23. Disputou ademais a Copa de España, marcando dous goles na edición 1922/23.
O 11 de marzo de 1923 foi o autor do único gol no derradeiro derbi entre o Vigo Sporting e o Fortuna de Vigo, pouco antes de que estes dous equipos se fusionasen para formar o Celta de Vigo.[2] Tras o nacemento do Celta, os xogadores do Vigo Sporting Otero, Chiarroni e Ramón González abandonaron o club e ficharon polo Deportivo da Coruña. O feito foi considerado unha afronta para o club vigués e sería un dos detonantes da histórica rivalidade co equipo coruñés. As protestas do Celta, que acusaron o Deportivo de ter subornado aos xogadores vigueses, levaron a Federación Galega a inhabilitar os tres futbolistas tránsfugas, acusándoos de profesionalismo, mentres que o Deportivo foi descualificado do Campionato de Galicia.[3] Porén, o Deportivo recorreu ante a Real Federación Española de Fútbol, a cal se pronunciou en favor dos herculinos e anulou a sanción contra o club por entender que non existira suborno, instando á FGF a que readmitise o Deportivo no campionato, aínda que si mantivo a sanción sobre os tres xogadores por existir duplicidade de fichas.[4][5] A FGF enviou un escrito de protesta á RFEF, mais esta reafirmouse na súa decisión,[6] polo que a FGF convocou unha asemblea extraordinaria[7] na que acordou por maioría aceptar o veredicto da RFEF.[8]
En 1924 puido xogar finalmente co Deportivo, converténdose xa en abril dese ano no capitán, e co tempo, nun dos xogadores máis emblemáticos do club.[9] Unha das súas primeiras grandes actuacións co club chegou en xuño dese mesmo ano, cando lle marcou 7 goles en dous partidos ao Dundee FC escocés.[10][11] En 1927 recibiu un forte golpe nun partido en Pontevedra, que o mantivo inconsciente durante case un día, motivo polo que estivo de baixa varios meses. Aínda que cun rendemento menor tralo seu regreso, continuou no club branquiazul ata 1930, xogando os dous últimos anos na Segunda División, trala creación das ligas nacionais.[12] En 1931 regresou para xogar un último partido contra o Racing de Ferrol no antigo Campo de Riazor, correspondente ao Campionato de Galicia.[13]
Selección española editar
Participou coa selección española nos Xogos Olímpicos de 1920 en Antuerpen, conseguindo a medalla de prata e converténdose no primeiro medallista olímpico coruñés.[14]
Familia editar
Casou con María Pereiro Rey, irmá do tamén futbolista do Deportivo Emilio Pereiro, coa que tivo un fillo, chamado tamén Ramón. Foi tío de Luis Precedo, futbolista e adestrador, que xogou tamén no Fabril, entre outros equipos.[15]
Palmarés editar
Vigo Sporting
- Campionato de Galicia (3): 1918/19, 1919/20 e 1922/23.
Deportivo da Coruña
- Campionato de Galicia (3): 1926/27, 1927/28 e 1930/31.
Notas editar
- ↑ "Ha muerto Ramón González". La Voz de Galicia (en castelán). 4 de novembro de 1977. p. 32.
- ↑ "El último Fortuna-Vigo Sporting". Faro de Vigo (en castelán). 24 de marzo de 2019. Consultado o 14 de setembro de 2021.
- ↑ "Ecos deportivos. El pleito del día". Galicia: diario de Vigo nº 384 (en castelán). 25 de outubro de 1923. p. 6. Consultado o 22 de xaneiro de 2021.
- ↑ "El pleito Federación-Deportivo. Texto integro del fallo de la Federación Española". El Ideal Gallego nº 1.952. 23 de decembro de 1923. p. 3.
- ↑ "Ecos deportivos. Un fallo de la nacional". Galicia: diario de Vigo nº 437 (en castelán). 26 de decembro de 1923. p. 6.
- ↑ "Ecos deportivos. El pleito gallego. Fallo de la nacional". Galicia: diario de Vigo nº 461. 23 de xaneiro de 1924. p. 6. Consultado o 22 de xaneiro de 2021.
- ↑ "Federación gallega. Nota oficial". Galicia: diario de Vigo nº 469. 1 de febreiro de 1924. p. 6.
- ↑ "Deportes. Asamblea de la Federación Gallega". El Ideal Gallego nº 1.993. 12 de febreiro de 1924. p. 3. Consultado o 22 de xaneiro de 2021.
- ↑ "Otras noticias". La Voz de Galicia (en castelán). 22 de abril de 1924. p. 1.
- ↑ "Los grandes encuentros internacionales". El Ideal Gallego (en castelán) (2100). 17 de xuño de 1924. p. 3. Consultado o 14 de novembro de 2021.
- ↑ "Notas deportivas". El Correo Gallego (en castelán) (16475). 21 de xuño de 1924. p. 1. Consultado o 14 de novembro de 2021.
- ↑ "Notas deportivas". La Voz de Galicia (en castelán). 31 de decembro de 1931. p. 5.
- ↑ "El Deportivo vence al Racing ferrolano". La Voz de Galicia (en castelán). 20 de outubro de 1931. p. 5.
- ↑ "El Ayuntamiento homenajea al futbolista Ramón González al cumplirse cien años desde que se convirtió en el primer olímpico coruñés" (en castelán). 4 de setembro de 2020. Consultado o 14 de setembro de 2021.
- ↑ "Murió Luis Precedo". La Voz de Galicia (en castelán). 10 de maio de 1975. p. 28.