Drenaxe linfática do membro superior
A drenaxe linfática do membro superior comprende toda a circulación linfática do membro superior humano. Drena a man, antebrazo, brazo e ombreiro, a través do vasos e ganglios linfáticos. Os ganglios linfáticos forman dúas redes, unha superficial e unha fonda.
Rede superficial de ganglios
editarA rede superficial está composta por ganglios pequenos e pouco numerosos. Na epitróclea umeral atópanse un ou dous ganlgios, por dentro da vea cefálica, son os ganglios linfáticos epitrocleares, que drenan a parte interna da man.
Por detrás da vea cefálica atópanse un ou dous ganglios linfáticos deltoidopectorais, entre os tendóns do músculo pectoral maior e do deltoide.
Rede fonda de ganglios
editarA rede fonda concéntrase en torno á axila, con vinte ou trinta ganglios. Tamén pode haber pequenos grupos por enriba do cúbito e do radio. En certas ocasións acompañan á arteria braquial no seu percorrido polo brazo.
Rede superficial de vasos linfáticos
editarA rede superficial de vasos comeza nos plexos linfáticos situados baixo a pel. Canto máis preto da man, os vasos son máis pequenos. A cada lado dos dedos hai unha fileira de vasos e se dirixen cara a palma da man. A rede que forman é tremendamente variable, con múltiples pólas e interconexións. De forma xeral, existen tres agrupacións máis densas, unha na zona lateral ou radial, outro na zona media e un terceiro na zona medial ou cubital. Cada grupo drena a unha serie de vasos linfáticos que acompañan ás veas fondas. Os do grupo lateral drenan á vea cefálica, os do grupo medio á vea mediana e os do grupo medial á vea basílica.
Nalgúns casos, os vasos cubitais drenan directamente aos ganglios linfáticos epitrocleares. Noutros, os vasos cubitais drenan nos ganglios linfáticos axilares. Os vasos radiais drenan a unha póla que acompaña a vea cefálica para drenar nos ganglios linfáticos deltoidopectorais. De aquí poden drenar directamente aos ganglios linfáticos axilares ou aos ganglios cervicais inferiores.
Rede fonda de vasos linfáticos
editarA rede fonda acompaña ás veas fondas da drenaxe venosa do membro superior. No antebrazo agrúpanse en catro porcións: radial, cubital, anterior e interósea posterior, seguindo o traxecto das arterias do antebrazo. Durante o seu percorrido emiten pequenos vasos cara ao sistema superficial. A maioría deles drena nos ganglios linfáticos axilares, pero algúns poden seguir á arteria braquial no seu percorrido polo brazo.
Véxase tamén
editarBibliografía
editar- Gray. Anatomy of the human body (en inglés). Edición de 1918 de dominio público.