Ramón Caamaño

Ramón Caamaño Bentín, nado en Muxía o 9 de novembro de 1908 e finado na mesma vila o 13 de maio de 2007, foi un fotógrafo galego.

Ramón Caamaño

Biografía
Nacemento	9 de novembro de 1908 Muxía, España
Morte	13 de maio de 2007 (98 anos) Muxía, España
Actividade
Ocupación	fotógrafo

Traxectoria

Formación e primeiros anos

Fillo único, o seu pai ao pouco de nacer el emigra a Cuba e México onde se dedica á venda de encaixe que elaboran na casa familiar. Ao facer os oito anos o seu pai mándalle unha máquina de cine con algunha película, que lles proxectaba aos rapaces e rapazas de Muxía, a quen lles cobraba a entrada en alfinetes que logo vendía ás palilleiras. Este rapaz, que quería ser electricista, cando ten dezaseis anos merca a súa primeira máquina fotográfica. Era unha máquina de caixa que tiraba as fotos sen enfocar.

A partir do ano 1925 comeza a fotografar o mundo máis próximo: mariñeiros, campesiños, paisaxes, solpores, romarías etcétera. Dous anos máis tarde 1927 compra unha máquina Pathe Baby para proxectar cine, e comeza a distribuír filmes pola Costa da Morte. Marcha a Santiago de Compostela nos invernos dos anos 29, 30 e 31, onde traballará co fotógrafo Ksado, de quen aprenderá entre outras cousas a técnica de colorear fotos con ácidos.

Casamento e fotoxornalismo

No ano 1932 coñece no Porto do Son a Tereixa Louro, coa que casará en 1937. Nese ano muda para Cee, onde monta un estudio e comeza a traballar facendo retratos. En 1938 é mobilizado co motivo da Guerra Civil e destinado á fronte de Aragón, onde leva canda si a cámara West Pocket. As súas fotos de guerra poden cualificarse como o primeiro exemplo de fotoxornalismo galego.

Á volta da contenda segue co estudio en Cee, pero a súa actividade esténdese a toda a comarca, principalmente ás vilas de Corcubión e Muxía.

Retirada e pasamento

Retirouse da vida profesional e da fotografía en 1975. Tiña un pequeno museo persoal na súa casa, mantido ata o seu falecemento. Foi soterrado no camposanto de Santa María de Muxía.

Obra

Nas súas fotografías emprega fundamentalmente o branco e negro, e é sobre todo coñecido polos seus retratos. Os fotógrafos de aldea, coma el, vivían de realizar fotografías por encarga a labregos e mariñeiros, que buscaban con elas manter o vínculo cos familiares da emigración. Tamén ten series de fotografías de defuntos, aos que retrataba a petición dos seus familiares. As fotos realizábanse no estudio, sobre uns decorados ficticios de pano, ou senón nas propias aldeas, con panos e telas que se colocaban de fondo en escenarios naturais. O contraste entre eses decorados e o realismo e austeridade das fotografías, case todas retratos formais e hieráticos, é unha das características do xénero.

Outro dos temas preferidos de Ramón Caamaño foi o das romarías, en especial as da Romaría da Virxe da Barca, de Muxía.

O seu arquivo fotográfico está formado por máis de 6.000 copias fotográficas e preto de 20.000 clixés. En 1982 publicou o libro Muxía. Guía turística enciclopédica, en edición de autor.

Exposicións

• 1989. Monográfica e antolóxica da súa obra. Centro Cultural Caixavigo (Vigo), itinerante.
• 2005. Retratos da Costa da Morte, de Ramón Caamaño. Centro Cultural Caixanova (Vigo). Nela xúntanse diversos retratos realizados entre 1928 e 1948

Véxase tamén

Bibliografía

• Sendón, Manuel (ed.) (1989). Ramón Caamaño. Álbum de fotos. Fotografías dende 1924 a 1970.
• Sendón, Manuel e Suárez Canal, Xosé Luís (ed). Ramón Caamaño. Retratos da Costa da Morte.
• Fernández Carrera, Xan (1999). Ramón Caamaño. Historia viva da Costa da Morte.
• Soutelo Vázquez, Raúl e Vázquez Lijó, José Manuel (2018). O Son que coñeceu Ramón Caamaño. Xentes e espazos dentro e fóra do marco fotográfico. Deputación da Coruña.

Ligazóns externas

• Galería de retratos Arquivado 20 de xullo de 2009 en Wayback Machine. na web do Centro de Estudos Fotográficos de Vigo.
• Biografía, na páxina do Concello de Muxía.
• Nova do seu pasamento
• Nova da apertura do museo que acolle a súa obra, en Muxía.
• Exposición na Igrexa da USC^{[Ligazón morta]}.