Federación Internacional da Medalla de Arte
A Federación Internacional da Medalla de Arte (en francés: Fédération Internationale de la Médaille d'Arte; en inglés: International Art Medal Federation), coñecida tamén polo acrónimo FIDEM, é unha asociación profesional de ámbito internacional dedicada á práctica e a promoción da medallística artística.[1]
| Federación Internacional da Medalla de Arte | |
|---|---|
| Tipo | International cultural organization e sociedade científica |
| Data de fundación | 1937 |
| Presidente/a | Philip Attwood (-)  |
| Na rede | |
| https://www.fidem-medals.org | |
| [ editar datos en Wikidata ] | |
A entidade está presidida polo numismático británico Philip Attwood.[2]
Historia
editarA FIDEM fundouse en París en 1937 como un instrumento para a promoción e a difusión da arte de gravar medallas a nivel internacional, de maneira que se garanta o seu recoñecemento e a súa consideración entre as demais modalidades artísticas, principalmente mediante publicacións e a través da organización de acontecementos internacionais.[3]
Os seus membros son desde artistas medallistas ata institucións como museos, casas de moeda, fundacións, bibliotecas, asociacións, empresas do sector e universidades de todo o mundo.[4]
Funcionamento
editarA Federación Internacional da Medalla de Arte opera en arredor de 40 países, nos que conta coa figura dun delegado e un vicedelegado que manteñen contactos regulares cos artistas afiliados e con outras persoas e entidades relacionadas dun xeito ou doutro coa medallística.
Entre os principais eventos, a FIDEM organiza un congreso e unha exposición internacionais de periodicidade bianual sobre a arte da medalla, no transcurso dos cales se producen contactos e intercambios de ideas entre os artistas desta especialidade. O XXXV congreso, correspondente a 2018, tivo lugar en Otava, Canadá.[5][6][7]
Con ocasión de cada congreso-exposición, a entidade publica desde 1938 a revista Médailles, de difusión gratuíta entre os seus membros, que, entre outra información, agrupa artigos acerca dos temas tratados no congreso e sobre as medallas presentadas na exposición.[8][9]
Premios da FIDEM
editarGran Premio FIDEM
editarNo congreso que tivo lugar en Londres en 1992 instituíuse o Gran Premio da FIDEM, que se lle concede a unha das medallas presentadas en cada unha das exposicións internacionais bianuais, logo do seu exame por parte dun xurado escollido polo Comité Executivo e Consultivo da entidade, que atende a uns criterios prefixados por esta. A identidade dos gañadores coñécese en cada caso durante a cerimonia de clausura de cada congreso, momento no que se fai a entrega do galardón.[10]
Estes son os gañadores do premio:[11]
- 1992: Maria Lugossy (Hungría).
- 1994: Magdalena Dobrucka (Polonia).
- 1996: Guus Hellegers (Países Baixos).
- 1998: Joanna Troikowicz (Suecia).
- 2000: Tibor Budahelyi (Hungría).
- 2002: Bernd Göbel (Alemaña).
- 2004: Elisabeth Varga (Países Baixos).
- 2007: Helder Batista (Portugal).
- 2010: Elly Baltus (Países Baixos).
- 2012: Tetsuji Seta (Xapón).
- 2014: Irina Suvorova (Rusia).
- 2016: Ron Dutton (Gran Bretaña)
- 2018: Mashiko Nakashima (Xapón).[12]
Premio FIDEM AT 70
editarEn 2007 instituíuse este premio creado para conmemorar o 70 aniversario da entidade. Concédese a unha ou varias persoas que destaquen polo seu apoio ao mundo da medalla.
Desde a súa creación, máis dunha trintena de artistas foron galardoados con este premio. Na súa edición de 2018 resultaron galardoados os canadenses Lynden Beesley, Susan Taylor, Lorraine Wright, Michael Groves e David Dunlop.[13]
Notas
editar- ↑ Estatutos da FIDEM. No sitio web de FIDEM.
- ↑ "Contact FIDEM: President". No sitio web de FIDEM.
- ↑ "FIDEM history". No sitio web de FIDEM.
- ↑ "Associations membres". No sitio web de FIDEM.
- ↑ "XXXV Art Medal Congress - Ottawa". No sitio web de FIDEM.
- ↑ "XXXV Art Medal Exhibition". No sitio web de FIDEM.
- ↑ "International Medal Federation / Fédération International de la Médaille Arquivado 07 de xuño de 2020 en Wayback Machine.". En Ottawa School of Art. 30 de maio de 2018.
- ↑ "Médailles magacine". No sitio web de FIDEM.
- ↑ Acceso en liña a todos os números de Médailles desde 1938.
- ↑ "FIDEM awards". No sitio web de FIDEM.
- ↑ "Grand Prix archives: Previous FIDEM; Grand Prix winners". No sitio web de FIDEM.
- ↑ "Grand Prix: 2018 winner". No sitio web de FIDEM.
- ↑ Listaxe completa de premiados: aquí.