Escuela del Trabajo

Escuela del Trabajo foi unha revista pedagóxica mensual publicada en Ourense pola Asociación de Trabajadores de la Enseñanza de Orense (A.T.E.O.) entre 1932 e 1934.

Historia e características

Subtitulada Revista mensual de educación de la ATEO, apareceu en xaneiro de 1932. O seu primeiro director foi Albino Núñez Domínguez, tamén presidente da A.T.E.O. De tendencia socialista, pretendía aglutinar aos mestres ourensáns para tratar «todos aqueles temas de acento profesional que non quebranten a cordialidade da clase, nin ataquen as últimas conquistas do espírito liberal levadas a cabo nos territorios laicos do ensino». O entrecomillado corresponde ao editorial do primeiro número da publicación, onde se engade: «Os nosos colaboradores poden traer a ela, atentos ás anteriores limitacións, aqueles problemas de ámbito científico que, sen estar directamente ligados aos foros da Pedagoxía, sinalen unha posición solvente e unha inquietude en trámite». Como pode apreciarse, o propósito inicial caracterízase pola moderación e a profesionalidade. Incluíu artigos de carácter político e educativo, denunciou o auxe do fascismo, realizou unha defensa da paz e da escola campesiña e criticou as relacións entre política e relixión.

Desenvolvemento da revista

O 17 de xullo de 1932, nunha Asemblea da A.T.E.O., o membro do Consello de Redacción Eligio Núñez "tacha a actuación do Director de «Escuela del Trabajo» de moderada, respectuosa e personalista. Intervén Albino Núñez Domínguez para rectificar o devandito, negando a verdade de tales acusacións". Presenta a súa dimisión cando o número de agosto estaba en prensa. A partir de aquí, a revista pasou a denominarse Escuela de Trabajo, dirixida por Baltasar Vázquez. Os contidos radicalízanse e iso xera certo desacougo nalgúns sectores da docencia. Así mesmo prodúcense alternancias na Dirección e no Consello de Redacción. Coa dimisión de Baltasar Vázquez, pasaron a coordinar a publicación Luis Soto, Eligio Núñez e Manuel Luis Acuña. En maio de 1934, anunciouse que Albino Núñez Domínguez volvería facerse cargo da dirección da revista, pero esta non volveu editarse debido aos problemas políticos do momento.

Cesou a súa publicación co número 26, en marzo de 1934.

Colaboradores

Nela colaboraron, entre outros:

• Albino Núñez Domínguez
• Abel Carbajales Gutiérrez
• Baltasar Vázquez
• María Delia Osorio
• Concepción R. de Maceda
• Manuel Sueiro Iglesias
• Antonio Couceiro Freijomil
• Luís Soto
• Raúl González Gómez
• Amadeo López Bello
• Félix Salgado del Moral
• Manuel Vázquez Nóvoa

Véxase tamén

Bibliografía

• "Escuela del Trabajo". Gran Enciclopedia Galega (DVD). El Progreso. 2005. ISBN 84-87804-88-8. 
• Vilavedra Fernández, Dolores (ed.). Diccionario da literatura galega II. Editorial Galaxia. p. 175. 

Ligazóns externas

• Cid Fernández, X. (1986). "El debate político en la escuela del trabajo de Orense" Historia de la educación, 5. p. 415-421 (en castelán).
• A.T.E.O. enero 1936