Citotrofoblasto

O citotrofoblasto é a capa interna do trofoblasto (tamén chamada capa de Langhans) e tamén reciben ese nome as células que a constitúen. Está en posición interior respecto ao sincitiotrofoblasto e externa respecto á parede do blastocisto nun embrión en desenvolvemento.

Diagrama dunhas vilosidades coriónicas primarias.

Diagrama dunhas vilosidades coriónicas secundarias.

O citotrofoblasto considérase que é unha capa de células nai trofoblásticas porque a capa que rodea o blastocisto permanece mentres que as células fillas se diferencian e proliferan para realizaren diferentes funcións. Hai dúas liñaxes ás que as células citotrofoblásticas poden diferenciarse: de fusión e invasiva. A liñaxe de fusión orixina o sincitiotrofoblasto e a liñaxe invasiva dá lugar a células citotrofoblásticas intersticiais.^[1]

As células citotrofoblásticas exercen un importante papel na implantación dun embrión no útero.

Liñaxe de fusión

A formación do sincitiotrofoblasto prodúcese pola fusión de dous ou máis citotrofoblastos por medio da vía de fusión. Esta vía é importante porque o sincitiotrofoblasto xoga un importante papel no intercambio de gases materno-fetal, no intercambio de nutrientes e ten funcións metabólicas e inmunolóxicas.

Unha célula nai citotrofoblástica indiferenciada diferénciase nun citotrofoblasto viloso, que é o que constitúe a vilosidade coriónica primaria, e finalmente coalesce nun sincitiotrofoblasto viloso. A formación do sincitiotrofoblasto a partir do citotrofoblasto é un paso de diferenciación terminal das células trofoblásticas.^[2]

A sincitialización das células citotrofoblásticas pode ser inducida in vitro por múltiples moléculas sinalizadoras como o factor de crecemento epidérmico, os glicocorticoides e a gonadotropina coriónica humana.^[3]^[4]^[5]

Liñaxe invasiva

Histopatoloxía dunha vilosidade coriónica nun embarazo ectópico.

A liñaxe invasiva crea citotrofoblastos que son esenciais no proceso de implantación e formación dunha placenta totalmente funcional. Unha célula nai citotrofoblástica indiferenciada diferénciase nun citotrofoblasto extraviloso intermediario e despois nun citotrofoblasto intersticial. Un citotrofoblasto intersticial pode despois diferenciarse máis dando un citotrofoblasto endovascular ou formar un sincitio.^[2]

Citotrofoblasto intersticial

A función primaria dun citotrofoblasto intersticial é ancorar o feto en crecemento ao tecido uterino materno. Estas células poden invadir todo o endometrio e o terzo proximal do miometrio.

Unha vez que estas células penetran nas primeiras capas de células da decidua, perden a capacidade de proliferar e convértense en invasivas. Este arranque do ciclo celular parece deberse a factores como o TGF-β e a decorina. Aínda que estes citotrofoblastos intersticiais invasivos xa non poden dividirse, reteñen a súa capacidade de formar sincitios. As células xigantes multinucleadas (pequenos sincitios) encóntranse na base da placenta e o miometrio como resultado da fusión de citotrofoblastos intersticiais.^[2]

Os citotrofoblastos intersticiais poden tamén transformarse en citotrofoblastos endovasculares.

Citotrofoblasto endovascular

A función primaria do citotrofoblasto endovacular é penetrar nas arterias espirais maternas e dirixir o fluxo sanguíneo cara á placenta para que o use o embrión en crecemento.

Orixínanse a partir de citotrofoblastos intersticiais polo proceso de fenocopia. Isto cambia o fenotipo destas células de epitelial a endotelial. Os citotrofoblastos endovasculares, como os seus predecesores intersticiais, son non proliferantes e invasivos.

Papel na implantación

A función propia do citotrofoblasto é esencial na implantación dun blastocisto. Despois da eclosión, o polo embrional do blastocisto está orientado cara ao endometrio uterino. Unha vez que toman contacto o trofoblasto empeza a proliferar rapidamente. O citotrofoblasto segrega encimas proteolíticos para degradar a matriz extracelular das células endometrais para permitir que proxeccións dixitiformes do trofoblasto penetren ao seu través. As proxección do citotrofoblasto e do sincitiotrofoblasto empurran o embrión contra o endometrio ata que queda totalmente cuberto polo epitelio endometrial, agás o tapón de coagulación.^[6]

Trastornos asociados

O trastorno máis común asociado é a pre-eclampsia, que afecta aproximadamente ao 7% de todos os nacementos.^[7] Caracterízase por un fallo do citotrofoblasto para invadir o útero e a súa vasculatura, especificamente as arterias espirais que o citotrofoblasto endovascular debería invadir. O resultado disto é unha diminución do fluxo sanguíneo cara ao feto, o cal pode causar unha restrición do crecemento intrauterina. Os síntomas clínicos da pre-eclampsia na nai son principalmente unha alta presión arterial, proteinuria e edema.

Inversamente, se hai demasiada invasión do tecido uterino polo trofoblasto despois pode orixinarse unha mola hidatidiforme ou coriocarcinoma.

Galería

Sección a través da área embrionaria do morcego Vespertilio murinus mostrando a formación da cavidade amniótica.

Notas

↑ Handwerger, S (8 de xullo de 2010). "New insights into the regulation of human cytotrophoblast cell differentiation.". Molecular and Cellular Endocrinology 323 (1): 94–104. PMC 2874088. PMID 20036312. doi:10.1016/j.mce.2009.12.015.
↑ ^2,0 ^2,1 ^2,2 Bischof, P; Irminger-Finger, I (xaneiro de 2005). "The human cytotrophoblastic cell, a mononuclear chameleon.". The International Journal of Biochemistry & Cell Biology 37 (1): 1–16. PMID 15381142. doi:10.1016/j.biocel.2004.05.014.
↑ Dakour, J., Li, H., Chen, H., & Morrish, D. W. (1999). "EGF promotes development of a differentiated trophoblast phenotype having c-myc and junB proto-oncogene activation." Placenta, 20, 119–126.
↑ Cronier, L., Alsat, E., Hervé, J. C., Delèze, J., & Malassiné, A. (1998). "Dexamethasone stimulates gap junctional communication, peptide hormone production and differentiation of human term trophoblast." Trophobl. Res., 11, 35–49.
↑ Yang, M., Lei, Z. M., & Rao, Ch. V. (2003). "The central role of human chorionic gonadotropin in the formation of human placental syncytium." Endocrinology, 144, 1108–1120.
↑ Schoenwolf, G.C. (2009). Larsen's Human Embryology (pp. 53, 4th Ed.). Philadelphia, PA: Churchill Livingstone.
↑ Genbacev, O., DiFederico, E., McMaster, M., & Fisher, S. (1999). "Invasive cytotrophoblast apoptosis in pre-eclampsia." Human Reproduction, 14, 59-66.

Véxase tamén

Outros artigos

Ligazóns externas

Imaxe de Histoloxía: 19908loa – Histology Learning System na Universidade de Boston - "Female Reproductive System: placental villi"
Diagram at McGill

[Handwerger-1] Handwerger, S (8 de xullo de 2010). "New insights into the regulation of human cytotrophoblast cell differentiation.". Molecular and Cellular Endocrinology 323 (1): 94–104. PMC 2874088. PMID 20036312. doi:10.1016/j.mce.2009.12.015.

[Bischof-2] 2,0 ^2,1 ^2,2 Bischof, P; Irminger-Finger, I (xaneiro de 2005). "The human cytotrophoblastic cell, a mononuclear chameleon.". The International Journal of Biochemistry & Cell Biology 37 (1): 1–16. PMID 15381142. doi:10.1016/j.biocel.2004.05.014.

[3] Dakour, J., Li, H., Chen, H., & Morrish, D. W. (1999). "EGF promotes development of a differentiated trophoblast phenotype having c-myc and junB proto-oncogene activation." Placenta, 20, 119–126.

[4] Cronier, L., Alsat, E., Hervé, J. C., Delèze, J., & Malassiné, A. (1998). "Dexamethasone stimulates gap junctional communication, peptide hormone production and differentiation of human term trophoblast." Trophobl. Res., 11, 35–49.

[5] Yang, M., Lei, Z. M., & Rao, Ch. V. (2003). "The central role of human chorionic gonadotropin in the formation of human placental syncytium." Endocrinology, 144, 1108–1120.

[6] Schoenwolf, G.C. (2009). Larsen's Human Embryology (pp. 53, 4th Ed.). Philadelphia, PA: Churchill Livingstone.

[7] Genbacev, O., DiFederico, E., McMaster, M., & Fisher, S. (1999). "Invasive cytotrophoblast apoptosis in pre-eclampsia." Human Reproduction, 14, 59-66.

[1]

[2]

[3]

[4]

[5]

[6]

[7]