Reiseñor da auga
Reiseñor da auga Cettia cetti | |||||||||||||||||||||||
---|---|---|---|---|---|---|---|---|---|---|---|---|---|---|---|---|---|---|---|---|---|---|---|
Estado de conservación | |||||||||||||||||||||||
Pouco preocupante | |||||||||||||||||||||||
Clasificación científica | |||||||||||||||||||||||
| |||||||||||||||||||||||
Nome binomial | |||||||||||||||||||||||
Cettia cetti (Temminck, 1820) | |||||||||||||||||||||||
Subespecies | |||||||||||||||||||||||
| |||||||||||||||||||||||
Sinonimia | |||||||||||||||||||||||
|
O reiseñor da auga,[1] Cettia cetti, é unha especie de ave paseriforme, da suborde dos Passeri, infraorde dos Passerida, superfamilia dos silvioideos e familia dos cetíidos, pertencente ao xénero Cettia.
É un pequeno paxaro, de cor parda arrubiada polas partes superiores e abrancazada polas inferiores,[1] propio da rexión paleártica, que cría na Europa meridional e central,[1][2] no noroeste de África e na Asia temperada, desde Turquía e a Federación Rusa até a China e o Xapón, pasando por Afganistán, Turkmenistán e o Paquistán.[3][4]
Características editar
As principais características do reiseñor da auga son:[1][5]
- Mide de 13 a 14 cm de lonxitude.
- Ambos os sexos son iguais.
- A súa coloración é parda clara nas partes superiores, abrancazada nas inferiores, e coas costas e os flancos do ventre de cor lixeiramente apardazada.
- Presenta unha cella (lista supraocular) clara.
- As patas son rosadas.
- As ás son curtas, e a cola, longa, arredondada no extremo, e que ergue espasmodicamente.
Bioloxía editar
Hábitat editar
Adoita vivir entre arbustos moi mestos en zonas próximas á auga: ríos, regatos, lagoas e encoros. É moi difícil de observar debido aos seus hábitos retraídos de roldar polas zonas arbustivas onde habita.[1]
Costumes editar
O reiseñor da auga revela a súa presenza cun forte canto, ruidoso e explosivo, moi característico, cun "chií" seguido dun "chiqui" ou "cuchi".[1][5]
Durante o verán, os machos pasan a maior parte do tempo establecendo os seus territorios, e por iso pasan pouco tempo coidando os ovos ou aos pitos. Os machos xeralmente atraen a máis dunha femia ao seu territorio.
Nutrición editar
Cettia cetti aliméntase de artrópodos, como insectos pequenos e de corpo brando, e de larvas. Prefire os insectos pequenos porque os dixie máis rápido.[6]
Reprodución editar
Aniñan entre a vexetación moi mesta, xeralmente preto do solo.O niño, de pequeno tamaño, ten forma de copa. Nel a femia por de 3 a 5 ovos de cor rubia, que son chocados principalmente pola femia, durante 12 días. Os polos deixan o niño ao cabo de 10 ou 15 días. Teñen dúas roladas ao ano.[1]
Taxonomía editar
Descrición editar
A especie foi descrita en 1820 polo zoólogo neerlandés Coenraad Jacob Temminck, co nome de Sylvia cetti, na súa obra Nouveau Recueil de Planches coloriées d'Oiseaux, pour servir de suite et de complément aux planches enluminées de Buffon (1820-1839).
Etimoloxía editar
Os nomes da familia, o xénero e a especia foron dedicados ao naturalista italiano Francesco Cetti (1726-1778).
Clasificación editar
Segundo o ITIS, recoñécense as catro subespecies seguintes:[3][7]
- Especie Cettia cetti (Temminck, 1820)
- Cettia cetti albiventris Severtzov, 1873
- Cettia cetti cetti (Temminck, 1820)
- Cettia cetti orientalis Tristram, 1867
- Cettia cetti sericea (Temminck, 1820)
Status editar
A Unión Internacional para a Conservación da Natureza e dos Recursos Naturais (UICN) cualifica, desde o ano 2004 até a actualidade, o estado de conservación desta especie como LC (pouco preocupante), debido a que ten unha área de dispersión moi grande e, polo tanto, non se acerca aos limiares de vulnerábel baixo os criterios de tamaño da área (uns 20 000 km2), e o tamaño da súa poboación (máis de 10 000 individuos maduros), que se estima que está aumentando.[4]
En Galicia editar
En Galicia a especie é pouco común, aínda que está espallada por todo o territorio, especialmente polas zonas máis cálidas (vales da provincia de Ourense e as Rías Baixas).[1]
Notas editar
- ↑ 1,0 1,1 1,2 1,3 1,4 1,5 1,6 1,7 Penas Patiño et al. (1991), p. 248.
- ↑ Robinson, Robert A.; Freemen, Stephen N.; Balmer, Dawn E. & Grantham, Mark J. (2007): "Cetti's Warbler Cettia cetti: analysis of an expanding population". BTO 54: 230–235. (Resume).
- ↑ 3,0 3,1 Cettia cetti en Avibase.
- ↑ 4,0 4,1 Cettia cetti na Lista vermella da UICN. Versión 2016-3. Consultada o 12-04-2007.
- ↑ 5,0 5,1 Cetti's warbler en RSPB.
- ↑ Molina, Javier; Hodar, José A. e Camacho, Ismael (1998): "Diet of Cetti's warblers Cettia cetti (Temmink, 1820) in a locality of southern Spain" (PDF). Ardeola. 45 (2): 217–220.
- ↑ Cettia cetti (Temminck, 1820) no ITIS.
Véxase tamén editar
Wikimedia Commons ten máis contidos multimedia na categoría: Reiseñor da auga |
Wikispecies posúe unha páxina sobre: Reiseñor da auga |
Bibliografía editar
- del Hoyo, J.; Collar, N. J.; Christie, D. A.; Elliott, A.; Fishpool, L. D. C.; Boesman, P. & Kirwan, G. M. (2016): HBW and BirdLife International Illustrated Checklist of the Birds of the World. Volume 2: Passerines. Bellaterra (Barcelona): Lynx Edicions ISBN 978-84-96553-98-9.
- Penas Patiño, Xosé M.; Pedreira López, Carlos e Silvar, Carlos (1991): Guía das aves de Galicia. A Coruña: Baía Edicións. ISBN 84-87674-06-2.
Outros artigos editar
Ligazóns externas editar
- Cettia cetti en Avibase (en inglés); Mapa de distribución.
- Bouscarle de Cetti, Cettia cetti na Oiseaux.net (en francés).
- Cettia cetti na ADW.
- Cettia cetti Arquivado 13 de abril de 2017 en Wayback Machine. na EOL.