Xanto e Balio

Para outras páxinas con títulos homónimos véxase: Xanto.

Na mitoloxía grega, Xanto (en grego antigo Χάνθος) e Balio (Βαλίος) eran dous cabalos inmortais, fillos do deus do vento Céfiro e a harpía Podarxe, a súa irmá e amante.

Fresco de Franz von Matsch (1861-1952) que representa o carro de Aquiles arrastrando o corpo de Heitor

"Automedonte xunguiu baixo o xugo os veloces cabalos, Xanto e Balio, capaces os dous de voar coma o vento. Enxendrounos a harpía Podarxe na súa unión con Céfiro"

Ilíada XVI, 148-151

Ámbolos dous cabalos foron o regalo que o deus Poseidón fixera a Peleo cando casou con Tetis. Cando tivo lugar a Guerra de Troia, Peleo xa era maior e por iso foi Aquiles quen acudiu ó mando dos Mirmidóns, e Peleo regaloulle os cabalos inmortais, a armadura e a lanza. Durante a guerra os cabalos causaron o asombro de todos polas súas capacidades. No carro de Aquiles xunguíanse xunto a Pédaso, outro cabalo extraordinario, aínda que mortal, que o heroe capturou cando tomou a cidade de Eetión.

Homero relata na Ilíada unha conversa entre Aquiles e os cabalos. Trala morte de Patroclo a mans de Heitor e a reconciliación de Aquiles con Agamenón, o heroe volve á loita. Insta ós cabalos a grandes gritos para que os levaran a salvo (a el e a Automedonte) ó campamento aqueo, reprochándolles por non ter evitada a morte de Patroclo. Xanto, ó que Hera concedeu momentaneamente voz humana, respondeulle que non foi por seren lentos nin por preguiza que Patroclo morrera, senón que foi Apolo quen lle causou a morte. Xanto engadiu que o destino de Aquiles anunciaba a súa próxima morte a mans dun deus e dun home .

"Aquiles cortoulle a carne [a Heitor] que rodeaba os tendóns dos talóns. Logo pasou unhas tiras de coiro polos cortes, atounas ó seu carro e, fustrigando ós seus cabalos Balio, Xanto e Pedaso, arrastrou o corpo cara as naves a medio galope"

Graves, px. 726

Véxase tamén

Bibliografía

• Graves, Robert (2019). Los mitos griegos. Gredos. ISBN 9788424999940.  (en castelán)
• Homero (trad. Óscar Martínez García) (2010, 1ª ed; 2013, 3ª reimpr.). Ilíada. Alianza Editorial. ISBN 9788420678344.  (en castelán)