Tesouro de Ellerby
Coordenadas: 52°49′12″N 00°13′12″O / 52.82000, -0.22000
| Tesouro de Ellerby | |
|---|---|
 | |
| · Data do depósito: 1727.
· Período ou cultura: Época xeorxiana británica. · Lugar de aparición: Ellerby, East Yorkshire, Inglaterra. · Coordenadas: 52°49′12″N 00°13′12″O / 52.82000, -0.22000 · Data do achado: 2019. · Descubridor: . · Composición: 266 moedas de ouro e unha vasilla. · Materiais: ouro e gres vidrado. · Conservación: dispersado en mans privadas. |
O tesouro de Ellerby (tamén coñecido como tesouro de Ellerby Area) é un tesouro composto por 266 moedas de ouro dos séculos XVII e XVIII achadas empaquetadas no interior dunha vasilla de gres vidrada, nunha casa de Ellerby, East Yorkshire, Inglaterra, en 2019.[1]
Descuberta
editarO tesouro foi descuberto durante as obras de renovación dunha vivenda do século XVIII, debaixo do piso da cociña.[1][2]
O contido do recipiente foi retirado antes de informar as autoridades e non se fixo rexistro ningún da posición das moedas no seu interior. Xa que logo, non foi posible determinar a estratigrafía da disposición das moedas dentro da vasilla.[1]
Crese que o tesouro pertenceu a Sarah Maister, irmá do comerciante William Maister, de Hull. Sarah casou cun membro dos Fernley, outra das familias comerciantes da cidade, con prósperos negocios no Báltico, e sábese viviu en Ellerby logo de enviuvar e ata a súa morte en 1745.[2][3]
Contido
editarA vasilla
editarA vasilla que contiña as 266 moedas de ouro é de gres, do século XVIII, e presenta o selo fiscal do reinado da raíña Ana (1702-1714). O recipiente está case completo —unicamente lle faltaba unha asa—; e foi vidrado con sal esparexido de manganeso, o que lle deu un ton de cor marrón pálido, que se vai aclarando desde o bordo ata a base.[1]
A forma da vasilla é cilíndrica e coas paredes delgadas, coa base lixeiramente acampanada. Presenta unha decoración con marcas xeométricas estriadas, e preto dos restos da asa amósanse gravadas as iniciais AR,(presumiblemente correspondentes a ANNA REGINA, o nome da monarca naquel momento.[1]
As magnitudes da vasilla son as seguintes:[1]
- Peso: 174 g.
- Altura: 89,5 mm.
- Profundidade: 81,9 mm.
- Diámetro superior: 72 mm.
- Diámetro inferior: 73,3 mm.
- Grosor da parede: 2,9 mm.
As moedas
editarA moeda máis antiga data de 1610 e a máis recente é unha guinea emitida a nome de Xurxo I, cuñada en 1727. Estímase que o seu valor nominal, trasladado á época actual, roldaría as 100.000 libras esterlinas.[1]
A distribución das moedas por reinados é a seguinte:[1]
| Reinado | Período | Cantidade |
|---|---|---|
| Xacobe VI e I | 1603-1625 | 34 |
| Carlos I | 1625-1649 | 42 |
| Carlos II | 1660-1685 | 25 |
| Xabobe II | 1685-1688 | 14 |
| Guillerme e María | 1688-1694 | 10 |
| Guillerme III | 1695-1702 | 25 |
| Ana | 1702-1714 | 31 |
| Xurxo I | 1714-1727 | 84 |
| Xoán V (Portug.) | 1706-1750 | 1 |
Comercialización
editarAínda que inicialmente se entendeu que o achado cumpría as estipulacións da Lei do Tesouro, do Reino Unido, de 1996, polo que foi declarado formalmente como tesouro,[1] posteriormente esta declaración foi revogada, ao non cumprirse o precepto de que todas as súas pezas tivesen polo menos 300 anos de antigüidade, o que lles deu aos seus descubridores a posibilidade de vendelas libremente.[2]
A compañía de poxas numismáticas Spink & Son organizou a venda das moedas para as 16:00 horas do 7 de outubro de 2022,[4] e o resultado foi o seu esparexemento do tesouro entre diversos coleccionistas privados de todo o mundo. O prezo total da venda foi de 628.000 libras, que logo ascendeu ata as 754 000, ao lle sumar as comisións correspondentes.[3]
Notas
editar- ↑ 1,0 1,1 1,2 1,3 1,4 1,5 1,6 1,7 1,8 "Coin Hoard (YORYM-18E84)". Portable Antiquities Scheme (Finds.org).
- ↑ 2,0 2,1 2,2 Newton, G. (29022). "Ellerby Hoard: The incredible story of the once in a generation historic find beneath a Yorkshire kitchen floor". En The Yorkshire Post (Yorkshirepost.co.uk). 10 de setembro.
- ↑ 3,0 3,1 "Ellerby: Gold coins found hidden under kitchen floor sell for £754,000". En BBC (BBC.com). 7 de outubro de 2022.
- ↑ A Remarkable Hoard of English Gold Coins (1610-1727). Spink & Son. 2022.
Véxase tamén
editarOutros artigos
editarBibliografía
editar- Brown, I. D; Dolley, M. (1971). A bibliography of coin hoards of Great Britain and Ireland, 1500-1967. Special Publications of the Royal Numismatic Society 6. Royal Numismatic Society / Spink, Londres. ISBN 9780901405012
Ligazóns externas
editar- "Un tesoro da oltre 850.000€: ritrovate a Ellerby 266 monete d’oro" (Modoetianumismaticae.com)