Terminator 2: O xuízo final

Terminator 2: O xuízo final (en inglés: Terminator 2: Judgment Day) é un filme de acción estadounidense dirixido por James Cameron que se estreou no 1991. É a segunda parte da saga cinematográfica e a secuela de Terminator (1984). Escrito por Cameron e William Wisher, Jr., está protagonizado por Arnold Schwarzenegger, Linda Hamilton, Robert Patrick e Edward Furlong. Terminator 2 conta a historia de Sarah Connor (Hamilton) e o seu fillo John (Furlong) que son perseguidos por un novo e mellorado Terminator, o T-1000 feito de metal líquido (Patrick), enviado atrás no tempo para matar a John e evitar que se converta no líder da Resistencia humana contra as máquinas. O modelo menos avanzado T-800 (Schwarzenegger) tamén é enviado atrás no tempo para protexer a John.

Terminator 2: O xuízo final
Ficha técnica
Título orixinal	Terminator 2: Judgment Day
Director	James Cameron
Produtor	James Cameron
Guión	James Cameron William Wisher Jr.
Intérpretes	Arnold Schwarzenegger Linda Hamilton Edward Furlong Robert Patrick
Música	Brad Fiedel
Fotografía	Adam Greenberg
Montaxe	Conrad Buff Mark Goldblatt Richard A. Harris
Estudio	Carolco Pictures Lightstorm Entertainment Pacific Western Canal+
Distribuidora	TriStar Pictures
Estrea	Century City: 1 de xullo de 1991 3 de xullo de 1991 21 de setembro de 1996 (TVG)
Duración	139 minutos
Orixe	Estados Unidos
Xénero	Acción, ficción científica
Orzamento	$94-102 000 000
Recadación	$519 843 345
Filme anterior	Terminator
Filme seguinte	Terminator 3: A rebelión das máquinas
Na rede

Despois dunha problemática pre-produción caracterizada polas disputas legais, Mario Kassar de Carolco Pictures fíxose cos dereitos de propiedade da franquía na década de 1990. Isto facilitou o camiño para a realización do guión escrito polo equipo de produción liderado por Cameron, e en outubro de 1990 comezou un calendario de rodaxe de 186 días, máis curto do orixinalmente pensado. A produción de Terminator 2 requiriu un orzamento sen precedentes de máis de $94 millóns, a maioría do cal foi gastado na filmación e nos efectos especiais. O filme estreouse o 3 de xullo de 1991.

Terminator 2, un éxito en recadación e en crítica, influíu na cultura popular e especialmente nos filmes de acción e ciencia ficción. Os efectos visuais inclúen imaxinería xerada por ordenador, o uso de movementos naturais humanos para unha personaxe xerada por ordenador e o primeiro personaxe xerado parcialmente por ordenador. Recibiu numerosos galardóns, entre os que destacan catro Premios Oscar por maquillaxe, son, edición de son e efectos visuais. Foi o filme con maior recadación de 1991, e numerosas publicacións como o American Film Institute clasificaron Terminator 2 como un dos grandes filmes de acción e ciencia ficción, e unha das mellores secuelas de tódolos tempos.

Estreouse en galego o 21 de setembro de 1996 a través da TVG.

Sinopse

Sarah Connor, a nai solteira do rebelde John Connor, está ingresada nun psiquiátrico. Algúns anos antes, un viaxeiro do tempo reveláralle que o seu fillo sería o salvador da humanidade nun futuro dominado polas máquinas. Converteuse dende entón nunha especie de guerreira e educou ó seu fillo John en tácticas de supervivencia. Esta é a razón pola que está recluída nun manicomio. Cando un novo androide mellorado, un T-1000, chega do futuro para asasinar a John, un vello modelo T-800 será enviado dende o futuro para protexelo.

Personaxes

Schwarzenegger (2015) e Hamilton (2009).

Patrick (2014) e Furlong (2009).

• Arnold Schwarzenegger como Terminator

Voz da dobraxe galega de Antón Cancelas.

• Linda Hamilton como Sarah Connor
• Edward Furlong como John Connor
• Robert Patrick como o T-1000
• Earl Boen como Doutor Silberman
• Joe Morton como Miles Dyson
• S. Epatha Merkerson como Tarissa Dyson
• Cástulo Guerra como Enrique Salceda
• Danny Cooksey como Tim
• Jenette Goldstein como Janelle Voight
• Xander Berkeley como Todd Voight
• Michael Biehn como Kyle Reese (só na Edición Especial)

Galardóns e nomeamentos

• 1991: 4 Oscars: Mellor son, efectos de son, efectos visuais, maquillaxe. 6 nomeamentos.
• 1991: 2 BAFTA: Mellor son, efectos visuais. 3 nomeamentos.

Dobraxe ó galego

A frase A rañala, raparigo (moitas veces citada erroneamente como Vai rañala, raparigo), que o Terminator pronuncia antes de acabar co T-1000, está considerada como a frase máis popular da historia da dobraxe en galego da TVG. Na versión orixinal (inglés) a frase é: Hasta la vista, baby, que mostra empatía cara ao neno John Connor, que lle ensinou castelán mexicano. Na versión en castelán europeo é Sayonara, baby, porén, a frase foi mantida en castelán de América. O American Film Institute colocouna na 76ª posición na Lista das mellores 100 frases de películas de todos os tempos.

Véxase tamén

Bibliografía

• Duncan, Jody; Cameron, James (2006). The Winston Effect: The Art & History of Stan Winston Studio. Londres: Titan Books. ISBN 1-84576-365-3. 
• Field, Syd (1994). Four screenplays: Studies in the American Screenplay. Dell Trade. ISBN 0-440-50490-2. 
• Hudson, David G.; Marsh, Ed W. (Directors) (1991). The Making of 'Terminator 2: Judgment Day' (Television production). Beverly Hills, California: Carolco Pictures. 
• Andrews, Nigel (2003). True Myths: The Life and Times of Arnold Schwarzenegger. Secaucus, Nova Jersey: Carol Publishing. ISBN 1-55972-364-5. 
• Cameron, James; Wisher, William (1991). Terminator 2: Judgment Day : the book of the film, an illustrated screenplay. Milwaukee, Wisconsin: Applause Books. ISBN 978-1-55783-097-5. 
• Keegan, Rebecca Winters (2009). The Futurist: The Life and Films of James Cameron. Nova York: Crown Publishers. ISBN 978-0-307-46031-8. 
• Shay, Don; Duncan, Jody (xullo de 1991). The Making of Terminator 2: Judgment Day. Londres: Titan Books. ISBN 978-1-85286-394-4. 

Ligazóns externas

• Terminator 2: O xuízo final na IMDb (en inglés).
• Ficha en AllMovie (en inglés)
• Ficha en Metacritic (en inglés)
• Ficha en BoxOfficeMojo (en inglés)
• Ficha en RottenTomatoes (en inglés)