Orquestra Sinfónica de Melide
A Orquestra Sinfónica de Melide é unha orquestra sinfónica da localidade de Melide (A Coruña). Foi creada a finais de 1993 e o seu director dende a súa fundación é o melidán Fernando V. Arias.
| País |  Galicia |
|---|---|
| Cidade | Melide |
| Teatro | Auditorio Municipal de Melide e outros |
| Anos de actividade | Dende 1993 |
| Tipo de formación | Orquestra sinfónica |
| Xénero | Música sinfónica |
| Enderezo | Auditorio Municipal de Melide Rúa Campo grande, 38 |
| Membros actuais | Fernando V. Arias |
| Membros fundadores | Fernando V. Arias |
| Circunstancias de creación | Conservatorio Municipal de Melide 1993 |
| Sitio web | www |
Historia editar
A Orquestra Sinfónica de Melide naceu a finais de 1993 no seo do Conservatorio de Música de Melide.[1] Integrada inicialmente por alumnos do conservatorio, co paso do tempo acadou un maior gran de profesionalismo que lle permite afrontar proxectos artísticos e musicais dunha complexidade cada vez maior.[2]
A consolidación da orquestra levouna a converterse nunha referencia no panorama musical galego, chegando a ser considerada pola crítica como a terceira grande orquestra de Galiza. A súa actividade se centra en ofrecer concertos periódicos en Melide e xiras por algunhas das principais cidades galegas, así como atender á formación didáctico-musical da xuventude da comarca. Fiel á súa filosofía de apostar polos valores musicais nacionais, estrea numerosas obras de compositores galegos e convida a solistas de contrastado renome, especialmente nos xa tradicionais Concertos de Nadal, tendo retransmitido a RG en directo para toda Galiza o do ano 2001.
En 1997 participou nos concertos programados para Galicia Terra Única, organizado pola Consellería de Cultura e Comunicación Social da Xunta de Galicia, con diversas actuacións por toda a xeografía galega, salientando a realizada no Hostal dos Reis Católicos en Santiago de Compostela. Ese mesmo ano estrea o primeiro concerto para guitarra e orquestra escrito polo compositor galego Enrique Rodríguez e interpretado polo guitarrista Eulogio Albalat.
Un ano despois, en 1998, realizou unha xira en colaboración coa Universidade da Coruña e cos conservatorios da Coruña, Lugo e Pontevedra acompañando a solistas destacados de Galiza e a profesores destes conservatorios, cun grande éxito de crítica especializada e de público. En xullo dese mesmo ano estreou o espectáculo Antoloxía da Zarzuela con motivo da creación da Orde de Cabaleiros e Damas do Camiño de Santiago.
En 1999 estreou no Hostal dos Reis Católicos a Cantata Melidá composta polo seu director, Fernando V. Arias, para solistas, coro e orquestra sinfónico,[3] que foi obxecto dun monográfico no programa de RNE Clásicos Populares. Ese mesmo ano a orquestra realizou unha gala lírica co gallo do Xacobeo 99 que foi grabada integramente pola TVG.[2] No 2000 colaborou con distintos concertos dentro do programa Milenio Festival en Santiago de Compostela, destacando o realizado na Praza do Obradoiro, e no 2001 levou a cabo unha xira por Galiza co espectáculo A Música do Cine.
En 2003 a orquestra debutou no Auditorio Nacional de Madrid, repetindo o ano seguinte, cando estreou Platerías de Santos Bartolomé e Terra de Melide, obra do director da formación, Fernando Arias. Ambas obras eran adaptacións para formación sinfónica.[4]
Nos últimos tempos, a complicada situación económica do Concello de Melide levou á daquela alcaldesa María Socorro Cea Vázquez a retirar as axudas do concello á orquestra, o que provocou unha reestruturación da orquestra. A mediados do ano 2011 realizou a súa última xira ata o momento co espectáculo Gala Americana.
En 2013 Melide inaugurou o seu auditorio municipal cun concerto no que participaron a Coral Polifónica de Melide, o grupo de gaitas Froito Novo, así como a propia Orquestra Sinfónica de Melide.[5]
Notas editar
- ↑ "La Orquesta Sinfónica de Melide ofrece su «Antología de la zarzuela»". La Voz de Galicia (en castelán). 11 de agosto de 2005. Consultado o 14 de xuño de 2021.
- ↑ 2,0 2,1 "La Orquesta Sinfónica de Melide lleva al Auditorio su más clásico repertorio". Diario de León (en castelán). 29 de outubro de 2005. Consultado o 14 de xuño de 2021.
- ↑ "Esteban García Vidal, solista del Concierto para fagot y orquesta, en Fa M. Op. 75, de Carl Mª von Weber". El Correo Gallego (en castelán). 15 de decembro de 2019. Consultado o 14 de xuño de 2021.
- ↑ Noguerol, Natalia (22 de marzo de 2004). "La Sinfónica de Melide ofrece su segundo concierto en Madrid". La Voz de Galicia (en castelán). Consultado o 14 de xuño de 2021.
- ↑ Noguerol, Natalia (28 de decembro de 2013). "Melide estrena al fin su auditorio con aforo para 250 personas". La Voz de Galicia (en castelán). Consultado o 14 de xuño de 2021.
Véxase tamén editar
Ligazóns externas editar
- Sitio web oficial Arquivado 06 de febreiro de 2012 en Wayback Machine. (en castelán)