Malva

especie de planta
(Redirección desde «Malva sylvestris»)
Malva brava
Clasificación científica
Reino: Plantae
Subreino: Tracheobionta
División: Magnoliophyta
Clase: Magnoliopsida
Subclase: Dilleniidae
Orde: Malvales
Familia: Malvaceae
Subfamilia: Malvoideae
Xénero: Malva
Especie: M. sylvestris
Nome binomial
'Malva sylvestris'
L., Sp. Pl., vol. 2: 689, 1753 [1]

A malva brava ou malva común (Malva sylvestris) é unha planta herbácea da familia das malváceas, moi abundante en toda Europa nos beirados dos camiños e en terreos tanto cultivados coma incultos.

Malva sylvestris : Sementes soltas.

Descrición editar

É unha perenne herbácea ou algo lígnea na base, de até 2 m de altura. Xeralmente posúe hábito erecto, con ramificacións. O talo pode ser glabrescente a pubescente. As follas son palmatífidas, alternas e pecioladas.

Florea na primavera deica mediados do verán, producindo inflorescencias en forma de acio de cimas helicoidais; as flores, hermafroditas miden entre 2 e 6 cm de diámetro, con pétalos purpúreos ou rosa, con veas máis escuras. O periantio é pentámero, con calículo de 3 pezas soldadas na súa base. As flores fechan á noitiña e cando vai mal tempo para protexer o pole. A polinización é esencialmente entomógama, aínda que son capaces de se autopolinizar.

O froito é unha cápsula (esquizocarpo) formada por varios mericarpos, de forma de ril, de cor parda e con costelas laterais sinuadas en abano radial.

Hábitat e distribución editar

É moi abundante en terreos ermos, hortas, leiras, beiras dos camiños, entullos e xardíns cando están desleixados. O lugar de orixe é Europa, Asia occidental e norte de África. Introduciuse en América central e do Norte, onde a consideran planta invasora.

Usos medicinais editar

 
Malvae sylvestris, flores secas, para facer té

Existe unha industria farmacolóxica arredor da malva, pois se coñecen nesta planta principios activos de certa importancia como a arabinosa, a ramnosa e pequenas cantidades de taninos.

Adoitan utilizarse, na medicina popular, as follas,talo e flores coma emoliente para ser aplicada en enemas e furúnculos, e en forma de tisana contra a tose.[1]

 
Malva sylvestris, folla con puntos producidos por un fungo

Coas follas da malva faise un té que serve para aliviar a febre; tómanse de dúas a tres cuncas ao día.

Etnografía editar

É unha planta considerada máxica e medicinal nas tradicións e crenzas galegas, sendo unha das sete herbas de San Xoán.

Enfermidades da planta editar

Acostuma ser atacada por fungos do xénero Puccinia, producindo a roia alaranxada.

Citoloxía editar

Números cromosomáticos de Malva sylvestris é táxones infraespecificos:[2] 2n=42.[3]

Sinonimia editar

  • Althaea godronii Alef.
  • Althaea mauritiana Alef.
  • Malva ambigua Guss.
  • Malva erecta C.Presl in J.Presl & C. Presl
  • Malva erevaniana Takht.
  • Malva hirsuta C. Presl
  • Malva hirsuta auct. , non Aubl. nec Ten.
  • Malva grossheimii Iljin
  • Malva longelobata Sennen
  • Malva longepedunculata Sennen
  • Malva mauritiana L.
  • Malva polymorpha Guss.
  • Malva sylvestris subsp. ambigua (Guss.) P.Fourn.
  • Malva sylvestris subsp. erecta (C. Presl)Nyman
  • Malva sylvestris subsp. mauritiana (L.) Cout.
  • Malva sylvestris var. mauritiana (L.) Boiss.
  • Malva sylvestris subsp. vivianiana (Rouy) P. Fourn.
  • Malva tomentella C. Presl
  • Malva vivianiana Rouy[3][4][5]

Galería editar

Notas editar

  1. Font Quer, P. - Plantas Medicinales - El Dioscórides renovado, p. 404-405. Editorial Labor, SA, Barcelona, 1980
  2. Contribuiçao para o conhecimento citotaxonómico das spermatophyta de Portugal. XVI. Malvaceae Queirós, M. Bol. Soc. Brot. ser. 2 51: 187-199 (1977).
  3. 3,0 3,1 "Malva sylvestris". www.floraiberica.es. Consultado o 2022-04-19. 
  4. "The Plant List". Arquivado dende o orixinal o 10 de xullo de 2013. Consultado o 22 de xuño de 2013. 
  5. The Euro+Medit PlantBase

Véxase tamén editar

Ligazóns externas editar