José Luis Mira Lema
José Luis Mira Lema, nado en Cabana de Bergantiños o 15 de agosto de 1954, é un profesor, técnico en administración educativa e político galego.
| José Luis Mira Lema | |
|---|---|
| Nacemento | 15 de agosto de 1954 |
| Cabana de Bergantiños | |
| Nacionalidade | España |
| Alma máter | Universidade de Santiago de Compostela |
| Ocupación | pedagogo |
| [ editar datos en Wikidata ] | |
TraxectoriaEditar
Licenciado en Ciencias Químicas pola Universidade de Santiago de Compostela (1972 -1977), foi profesor de Física e Química no corpo de profesores de Formación Profesional, con destino no Centro de Formación Profesional de Monte Alto, na Coruña (hoxe CIFP Ánxel Casal). Tras o proceso de fusión dos corpos de profesores de Bacharelato e de Formación Profesional, é Catedrático de Física e química de Educación Secundaria.
Foi Coordinador de Formación Profesional e da Reforma de Ensinanzas Medias en Galicia (1985 -1988). Na actualidade pertence ao Corpo de Inspectores de Educación.
En xuño de 1996 foi nomeado Director Xeral de Ensinanzas Profesionais e Formación de Adultos da Consellería de Educación e Ordenación Universitaria da Xunta de Galicia e, despois, Director Xeral de Ordenación Educativa e Formación Profesional na mesma Consellería, até xuño de 2000, cando se incorpora ao Ministerio de Educación, Cultura e Deporte de España, como Director Xeral de Educación, Formación Profesional e Innovación Educativa, cargo que desempeñou até 2004.
Participou na planificación e implantación da oferta de ensinanzas de Bacharelatos e Ciclos Formativos de FP en Galicia, a coñecida como "Rede de Centros", impulsou a implantación dos Ciclos Formativos da Formación Profesional. Participou no deseño e implantación do Plan de Orientación Educativa e Profesional en Galicia, do Plan de Formación do Profesorado, dun Plan de Atención á Diversidade, do Plan de Formación de persoas adultas. No "Plan de formación ao longo da vida", da promoción e desenvolvemento de Programas Europeos, e no deseño do Plan de Potenciación de Idiomas.
No Ministerio de Educación participou no deseño e coordinación do debate sobre o Memorándum da Aprendizaxe Permanente en España, e da elaboración do Informe Nacional, resultado do debate, que se presentou diante da Comisión Europea, e na elaboración da Lei orgánica das Cualificacións e da Formación Profesional (Lei orgánica 5/2002, de 19 de xuño), e dos Reais Decretos de desenvolvemento desta.
Participou activamente no proceso de Bruxas de mellora da transparencia e o recoñecemento das cualificacións a través dunha maior cooperación en materia de Formación Profesional, así como no proceso de Copenhague de reforzo da cooperación en materia de ensino e formación profesional en Europa; na elaboración do Programa de Traballo dos Futuros Obxectivos dos Sistemas Educativos Europeos, promovido pola Unión Europea.
Coordinou en España os Grupos de Traballo creados para o desenvolvemento do Programa de Traballo dos Futuros Obxectivos dos Sistemas Educativos Europeos e; promoveu e coordinou a participación de España nos Programas Europeos Sócrates e Leonardo da Vinci. Tamén participou en Accións de Cooperación de España con varios países iberoamericanos en materia de alfabetización, educación especial e formación técnico profesional. Coordinou o Informe da OCDE sobre a educación de adultos en España.
Coa volta do Partido Popular de Galicia ao goberno da Xunta, o novo conselleiro de Educación Xesús Vázquez Abad propono novamente como Director Xeral de Educación, Formación Profesional e Innovación Educativa, cargo do que tomou posesión o 26 de abril de 2009, e que desempeñou ata o 15 de xuño de 2012, cando foi substituído por Manuel Corredoira López[1][2]. A partir desa data, e logo de retomar por un breve período o seu posto na Inspección Educativa na cidade da Coruña, pasou a exercer o cargo de Conselleiro de Educación e Ciencia na Embaixada de España en Bélxica, ata abril de 2017, cando foi nomeado Conselleiro de Emprego na Embaixada de España en Bos Aires.[3][4]
NotasEditar
- ↑ "José Luis Mira cesa como director xeral de Educación y será sustituido por Manuel Corredoira". Europa Press. 14 de xuño de 2012.
- ↑ Portal da Transparencia. Ficha de Manuel Corredoira López, que sucedeu a Mira Lema na Dirección Xeral de Educación, Formación Profesional e Innovación Educativa.
- ↑ Datos de Mira Lema no directorio da web da Embaixada de España en Bélxica Arquivado 07 de abril de 2017 en Wayback Machine..
- ↑ Nova do seu nomeamento en Crónicas de la Emigración.
Véxase taménEditar
Ligazóns externasEditar
- Currículo de J. L. Mira Lema. El Correo Gallego.
- "Un biólogo y un químico, nuevos directores generales de Educación",a rtigo en El País, 5 de xuño de 2000 (en castelán).
- Sociedad Española de Pedagogía Entrevista con J. L. Mira Lema. Xullo de 2001
- Noticias relacionads con J. L. Mira Lema[Ligazón morta]
- Noticias relacionads con los Centros Integrados de FP[Ligazón morta]
- Noticias relacionadas con la Red Gallega de Centros Integrados[Ligazón morta]
- Noticias relacionadas con los Ciclos Formativos de Grado Superior
- Inauguración da Xornada As ensinanzas superiores de música e artes escénicas, na web do CCG, 10 de febreiro de 2011. Inclúe fotografía.