Hildegart Rodríguez Carballeira

Hildegart Rodríguez Carballeira, nada en Madrid o 9 de decembro de 1914 e finada o 9 de xuño de 1933, foi unha nena prodixio, concibida pola súa nai como o modelo de muller do futuro. Con tres anos escribía e con oito falaba seis idiomas. Acabou a carreira de Dereito con 17 anos e foi membro activa do PSOE e despois do Partido Republicano Democrático Federal. Cando comezaba a ser coñecida a nivel internacional, ante o intento de separarse do proxecto que a súa nai tiña para ela, o 9 de xuño de 1933 a nai matouna de catro disparos mentres durmía. Tiña entón 18 anos e estaba a estudar medicina. Era curmá do tamén neno prodixio Pepito Arriola.

Hildegart Rodríguez Carballeira

Biografía
Nacemento	9 de decembro de 1914 Madrid, España
Morte	9 de xuño de 1933 (18 anos) Madrid, España
Causa da morte	Homicidio  (Ferida por arma de fogo e infanticídio (pt) )
Datos persoais
País de nacionalidade	España
Educación	Universidade Central Instituto Cardenal Cisneros
Actividade
Ocupación	educadora sexual (pt) , avogada , tradutora , política , sexóloga
Partido político	Partido Socialista Obrero Español Partido Republicano Democrático Federal
Membro de	Lyceum Club Femenino
Lingua	Lingua castelá, lingua inglesa, lingua alemá, lingua italiana, lingua portuguesa, Grego antigo e lingua latina
Obra
Arquivos en	Instituto Internacional de História Social (pt)
Familia
Nai	Aurora Rodríguez Carballeira
Parentes	Pepito Arriola (curmán)
Sinatura

Infancia

Hildegart foi concibida en Ferrol pola socialista Aurora Rodríguez Carballeira e un home escollido por súa nai unicamente para ese fin. O pai biolóxico de Hildegart resultou ser un sacerdote castrense de Lleida chamado Alberto Pallás Montseny. Cando estivo embarazada mudouse a Madrid, onde naceu Hildegart no número 3 da rúa Juanelo. Malia súa nai ser atea militante, foi bautizada o 23 de marzo de 1915. Aurora tamén pensaba que os nenos non debían ser inscritos no rexistro, aínda así fíxoo o 29 de abril do mesmo ano. Até os 4 anos visitouna o seu pai, ata que Aurora comezou a sospeitar da súa influencia e prohibiullo.

Na súa partida de nacemento consta como Hildegart Leocadia Georgina Hermenegilda María del Pilar Rodriguez Carballeira, aínda que só usou o primeiro dos nomes. A súa nai sempre dixo que Hildegart significaba "xardín de sabedoría" en alemán, pero nada xustifica esa afirmación. En realidade é unha invención ou unha versión mal escrita do nome alemán Hildegard, que significa "virxe heroica, que dá abeiro na batalla".

Activista

Desde moi nova militou activamente no PSOE e na UGT. Tiña un amplo apoio entre as bases, aínda que a cúpula intentaba minimizar a súa presenza pública. Foi expulsada do partido pola publicación en 1932 dunha carta no xornal La Libertad en que criticaba duramente unha posíbel alianza do PSOE cun candidato reaccionario. Tras disto converteuse en membro do Partido Republicano Democrático Federal e nunha fervente crítica dos "socialenchufistas".

A Revolución Sexual

Imaxe do xuízo a Aurora Rodríguez Carballeira polo asasinato da súa filla

Hildegart foi moi activa no movemento pola reforma sexual e a euxenesia na España do seu tempo. Estivo conectada coa vangarda europea no tema e mesmo mantivo correspondencia co sexólogo británico Havelock Ellis, de quen era tradutora. Cando se fundou a Liga Española pola Reforma Sexual, presidida polo doutor Gregorio Marañón, ela foi escollida secretaria. Publicou moitos textos, entre eles a monografía La Revolución Sexual que vendeu 8.000 exemplares só en Madrid na semana da súa publicación. Mantivo unha extensa correspondencia con personalidades europeas da época, entre eles con H.G. Wells, a quen acompañou cando este visitou Madrid. A pretensión de levar a Londres a Hildegart como secretaria súa, coa intención de que se separase de súa nai e desenvolvese o seu potencial, provocou as paranoicas conspiracións en Aurora.

Asasinato

No tempo apareceron diferentes teorías sobre o asasinato de Hildegart, entre elas unha suposta relación sentimental con Abel Vilella. O que parece máis probábel, e coincide co relato da súa nai, é que a deterioración da relación entre ambas era profunda, principalmente polo avance da paranoia da nai. Hildegart intentou varias veces separarse dela, ao que a nai respondía con ameazas de suicidio. Cando viu que a súa filla se apartaba do proxecto que trazara para ela, decidiu destruíla: "O escultor, despois de descubrir a mínima imperfección na súa obra, destrúea". Pola noite, mentres Hildegart durmía, disparoulle tres tiros na testa e un no corazón. Aurora Rodríguez foi xulgada e condenada a 26 anos, 8 meses e un día no cárcere. Pasou dous anos no hospital psiquiátrico de Ciempozuelos, onde finalmente morreu.

Obras

Exemplar da Educación Sexual de Hildegart. 1931

• Educación sexual (1931), Gráfica Socialista, Madrid
• La rebeldía sexual de la juventud (1931) Madrid: Javier Morata. Reeditado con prólogo de Eduardo de Guzmán. Editorial Anagrama, Barcelona, 1977. ISBN 84-339-1302-6.
• Profilaxis Anticoncepcional (1931), Valencia
• Malthusimo y neomalthusismo (1932), Madrid
• Cómo se curan y cómo se evitan las enfermedades venéreas (1932), Valencia
• ¿Se equivocó Marx? (1932), Madrid, Edición Novela Proletaria
• ¿Quo vadis, burguesía? (1932), Madrid, Edición Novela Proletaria

Edicións póstumas

• El problema sexual tratado por una mujer española (1977). Madrid, Ediciones Morata. ISBN 84-7112-057-7
• Métodos para evitar el embarazo. (Maternidad voluntaria) (1978). Zaragoza, Guara. ISBN 84-85303-04-0

Obras inspiradas na súa vida

Novela

• Aurora de sangre (Vida y muerte de Hildegart), Eduardo De Guzmán 1972, Editorial Mundo Actual.
• Aurora de sangre o la virgen roja, Rafael Azcona Jet Films 1977. Guión do filme de Fernán Gómez baseado na novela de Eduardo de Guzmán
• Auroras Anlaß, Erich Hackl, Zürich, 1987
• La virgen roja, Fernando Arrabal, Barcelona, Seix Barral, 1987.

Cinema

• Mi hija Hildegart (Fernando Fernán Gómez, 1977)
• The red virgin (2014), dirixida por Sheila Pye.
• Hildegart oder Projekt: Superwoman (2016), dirixida por Barbara Caspar.

Véxase tamén

Bibliografía

• Alvarellos, Enrique (1993). Mulleres destacadas de Galicia. Alvarellos. pp. 269–270. ISBN 84-85311-96-5. 
• Cal Mártinez, María Rosa (1991). A mi no me doblega nadie: Aurora Rodríguez, su vida y su obra (Hildegart). Ediciós do Castro. ISBN 84-7492-542-8 (en castelán).
• Domingo Soriano, Carmen (2008). Mi querida hija Hildegart. Destino. ISBN 978-84-233-4028-6 (en castelán).
• Llarch, Joan (1979). Hildegart, la virgen roja. Barcelona: Producciones editoriales (en castelán).
• Llorca Freire, Guillermo (2005). "Rodríguez Carballeira, Aurora e Hildegart". Gran Enciclopedia Galega (DVD). El Progreso. ISBN 84-87804-88-8. 
• Marco, Aurora (2007). Dicionario de Mulleres Galegas. Edicións A Nosa Terra. pp. 385–386. ISBN 978-84-8341-146-9. 
• Rendueles Olmedo, Guillermo (1989). El manuscrito encontrado en Ciempozuelos. Ediciones Endymion. ISBN 84-7731-023-8.
• Sinclair, Alison (2007). Sex and Society in Early Twentieth-Century Spain. Hildegart Rodríguez and the World League for Sexual Reform. Cardiff: University of Wales Press. ISBN 978-0-7083-2017-4 (en inglés).
• Wittenzellner, Jana (2015). "Como escenificar la erudición: Hildegart Rodríguez y la sexología". Iberoromania 81: pp. 46-62.
• "Rodríguez Carballeira, Carme". Enciclopedia Galega Universal. Ir Indo. 1999-2002. ISBN 84-7680-288-9. 

Outros artigos

• Pepito Arriola

Ligazóns externas

• Cal, Rosa (2007). Hildegart Rodríguez - Tratada para ser unha excepción desde o momento no que foi concibida Álbum de Mulleres, CCG.
• "Cuatro años de militancia socialista" Arquivado 04 de xullo de 2008 en Wayback Machine., artigo de Hildegart en La Tierra (en castelán).