Guillermo González Vázquez
Guillermo González Vázquez, nado en Vigo o 28 de maio de 1961, é un fotógrafo galego.
| Biografía | |
|---|---|
| Nacemento | 28 de maio de 1961  (62 anos)Vigo, España |
| Datos persoais | |
| País de nacionalidade | España |
| Actividade | |
| Ocupación | fotógrafo |
| Lingua | Lingua castelá |
Traxectoria editar
Na súa época de xuventude foi atleta. Entre 1976 e 1981 foi campión de España de 1500 e 2000 metros obstáculos en varias ocasións, ademais de ser internacional en diferentes competicións e lograr o récord dos campionatos de España en pista en 2000 metros obstáculos e a segundo mellor marca europea nesta distancia de 1982. En 1982 proclamouse campión absoluto de Galicia en 3000 metros obstáculos e 5000 metros lisos e foi elixido mellor deportista de Vigo.[1]
En 1987 gañou o concurso fotográfico sobre a nevada que tivo lugar en Vigo. Nese mesmo ano fundou a axencia publicitaria Carrizos Comunicación, que dirixiu durante 11 anos. A través desta empresa entrou no sector da pedra natural no Porriño, xa que a súa empresa asumiu a responsabilidade da comunicación das dez principais empresas galegas do sector, traballando para o Gremio de Graniteiros de Galicia.
En 1993 publicou un libro sobre as illas Cíes e moitas das imaxes adquiridas foron empregadas en campañas publicitarias a nivel nacional e internacional. En 1997 gañou o concurso da Ribeira Sacra á mellor imaxe promocional e as súas fotografías foron usadas en diferentes campañas promocionais do Concello de Vigo.
En 1998 deixou Carrizos Comunicación para embarcarse nos seus proxectos persoais. Puxo en marcha unha empresa do sector audiovisual coa que realizou spots publicitarios ou vídeos promocionais para concellos e outras institucións e empresas.
No ano 1999 fotografou arquitectura de España, e no ano 2000 conseguiu ser portada da revista americana Stone con este traballo. En 1999 realizou unha exposición na Casa das Artes, con máis dun centenar de fotografías da España histórica e monumental e tamén grandes construcións internacionais do arquitecto Antonio Palacios Ramilo, coincidindo coa celebración do primeiro congreso mundial sobre o granito.[2]
En 2004 publicou Galicia selecta[3], coa editorial España exterior, e en 2005 publicou o libro China, editado pola empresa Eurolatón, no que se recollen arredor de 700 fotografías sobre os costumes e o día a día de moitos lugares de dito país.[4]
No ano 2006, coa Xunta de Galicia, publicou o libro institucional Salida de la vuelta al mundo a Vela-Volvo Ocean Race, composto por 300 fotografías. O autor realizou fotos da saída da regata desde Vigo o 12 de novembro de 2005. As fotos foron tomadas desde un helicóptero entre as 10 da mañá e as 5 de tarde.[5]
En 2009 editou o libro Ría de Vigo: Mar de emprendedores, que recibiu boas críticas pola súa impresionante calidade, editada en papel estucado con verniz ultravioleta, liso ao tacto, que contrasta co aplicado sobre o papel, de sensación rugosa. O volume, de 199 páxinas, inclúe fotografías da ría de Vigo, con imaxes cheas de contrastes que amosan a cultura galega, as súas xentes e as súas tradicións, destacando, sobre todo, a pesqueira.[6]
No 2008 foi nomeado comisario internacional da exposición fotográfica Revela Degradación del Planeta, celebrada en Oleiros, e continuou como máximo responsable no 2009 (La violación como un arma de guerra) e no 2010 (Los niños como objeto de explotación).
No 2010 publicou Galicia, la tierra que abraza el mar, un libro que recolle a beleza de Galicia dende a terra e dende o aire. Este libro recolle todo o litoral Galego, dende A Guarda ata Ribadeo.[7]
No 2011 foi contratado polo concello de Pontevedra para tomar fotos de competicións internacionais de tríatlon, ademais de traballar para distintos eventos deportivos.[8]
No 2012 publicou Los centinelas del mar, un libro dedicado aos faros. O volume, en formato grande e con 273 páxinas, inclúe faros do litoral galego e do mar Cantábrico dende A Guarda ata o monte Igueldo.
Publicacións editar
- Illas Cíes (1993)
- Galicia selecta (2004)
- China (2005)
- Salida de la vuelta al mundo a Vela -Volvo Ocean Race (2006)
- Ría de Vigo: Mar de emprendedores (2009)
- Galicia, la tierra que abraza el mar (2010)
- Los centinelas del mar (2012)
Notas editar
- ↑ González Araujo, Jose (2010). El granito de Galicia y su historia. C.A. Gráfica. ISBN 978-84-614-0441-4.
- ↑ González Vázquez, Guillermo (Venres, 12 de novembro de 1999). "Una exposición fotográfica muestra más de cien edificios emblemáticos en granito". Faro de Vigo: 8.
- ↑ "Portafolio de Guillermo González Vázquez". Nikonistas. Consultado o 17 de maio de 2018.
- ↑ Guillermo González, Vázquez (Domingo, 5 de febreiro de 2006). "Una mirada diferentes de un país diferente". Diario de Arousa: 23.
- ↑ Guillermo González, Vázquez (Sábado, 20 de xaneiro de 2007). "Las fotos viguesas da la Volvo Ocean". Faro de Vigo: 3.
- ↑ ""Hablo de la belleza y la explotación de la Ría, algo compatible"". Atlántico. Consultado o 17 de maio de 2018.
- ↑ "Galicia, vista a través de los ojos de un fotógrafo vigués". Atlántico. Consultado o 17 de maio de 2018.
- ↑ González Vázquez, Guillermo (Martes,1 de febreiro de 2011). "Tan bello como duro". Diario de Pontevedra: 73.