Ermelo, Bueu

Santiago de Ermelo é unha parroquia que se localiza no sur do concello de Bueu. Segundo o IGE en 2013 tiña 73 habitantes (36 mulleres e 37 homes) nunha soa entidade de poboación, o que supón unha diminución en relación ao ano 1999 cando tiña 92 habitantes.

Ermelo
Igrexa de Santiago de Ermelo.
Concello	Bueu
Provincia	Pontevedra
Coordenadas	42°18′10″N 8°45′58″O
Poboación	73 hab. (2013)
Entidades de poboación	1
[ editar datos en Wikidata ]

Patrimonio

Na parroquia atopábase o mosteiro de Santiago de Ermelo. Na igrexa parroquial consérvase unha lápida cunha inscrición, na actualidade partida en dúas pezas, colocadas sobre repisas metálicas aos lados da capela maior. O texto da inscrición menciona a reedificación do templo en 1104.

O texto foi estudado por Miguel Romaní Martínez (da USC), Pablo Otero Piñeyro Maseda e Ángeles Alvariño (do Instituto Padre Sarmiento do CSIC), e é unha das tres únicas inscricións en pedra referentes ao arcebispo de Compostela Diego Xelmírez, xunto cunha en Padrón, datada en 1133 (que non o cita explicitamente) e outra en Alba (Pontevedra), onde se le: «...Didacus Compostellanus Eps...» («Diego, bispo compostelán...»), malia que está moi gastada.

O pai Sarmiento xa se refire á lápida en 1745, xa daquela en dúas pedras separadas, pero non estudada a fondo por falta de tempo e as dificultadas á hora de examinala.

O texto, segundo os investigadores, podería ser traducido como: «Téñase por seguro que esta igrexa de Santiago Apóstolo foi restaurada na súa totalidade, tal e como agora está, en tempos dos abades Fernando e Arias Savariz. Reinando en Toledo o Emperador Afonso, [sendo] Raimundo [de Borgoña, conde] en terras de Galicia; [sendo] bispo [de Compostela] Diego Segundo [Xelmírez]. Era 1142 [ano 1104]. [O Mestre] Fernando edificou [esta igrexa]».

Pola feitura da inscrición, os investigadores apuntan a que sería un monxe coñecedor da documentación da súa época, escrita en caracteres visigóticos.

Galería de imaxes

• 
  Igrexa de Santiago de Ermelo.
• 
  Arco de medio punto no muro oriental da cabeceira da igrexa.
• 
  Lápida funeraria.
• 
  Campos de Ermelo.

Lugares e parroquias

Lugares de Ermelo

Lugares da parroquia de Ermelo no concello de Bueu (Pontevedra)
Ermelo

Véxase tamén

Outros artigos

• Lugares de Bueu.

Ligazóns externas

• SantiagodeErmelo.org