Domingo Páramos Núñez
Domingo Páramos Núñez, nado en Tui cara a 1871 e finado en Mondariz o 4 de outubro de 1936, foi un sindicalista e político galego.
| Biografía | |
|---|---|
| Nacemento | c. 1871  Tui, España |
| Morte | 4 de outubro de 1936 (64/65 anos) Mondariz, España |
| Causa da morte | paseo, ferida por arma de fogo |
| Lugar de sepultura | Valle de Cuelgamuros (1959–) Mondariz (1936–1959) |
| Actividade | |
| Ocupación | sindicalista, político |
 | |
Traxectoria
editarExemigrante nos Estados Unidos e na Arxentina. Ferreiro de Caldelas de Tui de ideoloxía anarcosindicalista. Nos anos vinte foi presidente da Sociedad Agraria de Caldelas, encabezou unha protesta das sociedades obreiras e agrarias de Tui pola fraude nas eleccións a Cortes de 1923,[1] e foi detido en outubro de 1923 xunto co secretario da sociedade, Bernardo Troncoso Sotelo, acusados de coacción e sabotaxe.[2] Na República foi elixido concelleiro de Tui,[3] foi destituído logo da folga xeral revolucionaria de 1934. Foi detido en xuño de 1935 con Ramón Leopoldo Márquez Vázquez e outros, acusados do incendio da igrexa de Baldráns.[4] Foi reposto como concelleiro o 21 de febreiro de 1936.
Co golpe de Estado do 18 de xullo de 1936 foi detido en setembro, levárono ao seminario de Tui, e despois foi asasinado no Alto do Confurco xunto con Manuel Piñeiro Zúñiga, Manuel Pérez Besada, Fernando Rubio Estévez, Hipólito Gallego Camarero e Francisco Rodríguez Otero. Foron soterrados nunha fosa común en Mondariz. Os seus restos, xunto cos doutros 34 da provincia de Pontevedra, foron trasladados a Cuelgamuros o 26 de marzo de 1959.[5] Nos anos sesenta a súa viúva recibiu un comunicado da Xefatura do Estado no que se lle informaba que os restos do seu home estaban no Valle de los Caídos.[6]
Vida persoal
editarCasou con Juliana Riol Casado e foi pai de Ferrer, Libertad, Aurora, Armonía, Verdad, Floreal, Progreso, Espronceda, Domingo e Julia Páramos Riol.
Notas
editar- ↑ La Zarpa, 22-5-1923, p. 1.
- ↑ Galicia Nueva, 23-10-1923, p. 1.
- ↑ Tribuna, 10-9-1933, p. 3.
- ↑ El Pueblo Gallego, 22-6-1935, p. 13.
- ↑ "Han sido trasladados a Cuelgamuros los restos de 35 caídos pontevedreses", El Pueblo Gallego, 27-3-1959, p. 3.
- ↑ A familia dun represaliado de Tui reclama o traslado dos seus restos do Val dos Caídos á Galiza