Dani Barcia
Daniel Barcia Rama, nado na Costa da Tapia (O Temple, Cambre) o 19 de xaneiro de 2003, é un futbolista galego que xoga como defensa central no Deportivo da Coruña, da Segunda División.
.jpg)  | |||||||||||||||||||||||||||||||||||||||||||||
| Nome orixinal | Daniel Barcia Rama | ||||||||||||||||||||||||||||||||||||||||||||
|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|
| Biografía | |||||||||||||||||||||||||||||||||||||||||||||
| Nacemento | 19 de xaneiro de 2003 (22 anos) A Costa da Tapia, España | ||||||||||||||||||||||||||||||||||||||||||||
| Actividade | |||||||||||||||||||||||||||||||||||||||||||||
| Ocupación | futbolista | ||||||||||||||||||||||||||||||||||||||||||||
| Nacionalidade deportiva | España | ||||||||||||||||||||||||||||||||||||||||||||
| Deporte | fútbol | ||||||||||||||||||||||||||||||||||||||||||||
| Posición de xogo | defensa central | ||||||||||||||||||||||||||||||||||||||||||||
| |||||||||||||||||||||||||||||||||||||||||||||
Traxectoria
editarNaceu o 19 de xaneiro de 2003 na Costa da Tapia, onde se instalaran antes de el nacer seus pais Sandra e Toni.[1] Seu pai, orixinario de Cabana de Bergantiños, fora futbolista de varios equipos da Liga da Costa, e militou tamén no Bergantiños de Xulio Díaz a finais da década de 1980.[1]
Socio do Deportivo da Coruña dende o seu nacemento,[1] comezou a xogar ao fútbol no equipo prebenxamín do Atlético San Pedro, co que marcou numerosos goles xogando no centro do campo. Aos oito anos incorporouse ao equipo benxamín do Deportivo e durante os seguintes anos foi subindo polas diferentes categorías inferiores do club. No infantil B foi un dos tres capitáns do equipo, xunto a Jairo Noriega e Álvaro Carreras, e portou tamén o brazalete nos conxuntos cadete e xuvenil.[2]
Na tempada 2020/21 formou parte do equipo xuvenil que con Óscar Gilsanz como adestrador conquistou a División de Honra Xuvenil e tamén a Copa de Campións, despois de derrotar na final ao FC Barcelona.[3] Na seguinte campaña disputou a Liga Xuvenil da UEFA, xa ás ordes de Manuel Pablo, sendo titular en todos os partidos, e xogou os 120 minutos do encontro fronte ao Dynamo de Kíiv, caendo xunto ao seu equipo na quenda de penaltis, nun Riazor con máis de 20.000 seareiros nas bancadas.[4]
Na tempada 2021/22 subiu ao Fabril, onde tivo como adestrador de novo a Gilsanz, e afianzouse na defensa titular do equipo. Na tempada 2022/23 formou unha sólida defensa xunto a Ángel Puerto, Marc Lachèvre e Iano Simão, encaixando só 18 goles, o que foi unha das claves do ascenso do equipo á Segunda Federación como campión de grupo.[5] Esa mesma tempada, o 12 de novembro de 2022, debutou co primeiro equipo do Deportivo da Coruña, da man de Óscar Cano, na primeira rolda da Copa do Rei ante o Guijuelo, na que integrou a defensa titular xunto a Trilli, Puerto e Retu.[6]
Para a tempada 2023/24 subiu definitivamente ao primeiro equipo e renovou co club ata o 2026.[7] Non contou con demasiadas oportunidades ás ordes de Imanol Idiakez, que só o aliñou en 12 partidos da liga regular, pero proclamouse campión da categoría, conseguindo así o ascenso á Segunda División.[2] Debutou na categoría de prata na sexta xornada de liga, nunha derrota ante o Burgos en Riazor, formando como titular no centro da defensa xunto a Pablo Vázquez.[8]
Selección española
editarO seu alto rendemento co Deportivo da Coruña Xuvenil levouno a debutar coa selección española sub-19 en setembro de 2021, nun amigable diante de México.[9]
Palmarés
editar- Fabril
- Terceira Federación (1): 2022/23.
- Deportivo da Coruña
- Primeira Federación (1): 2023/24.
Notas
editar- ↑ 1,0 1,1 1,2 Antelo, Iván (17 de novembro de 2021). "Así es Dani Barcia, la otra joya del Deportivo que desean los grandes". La Voz de Galicia (en castelán). Consultado o 11 de febreiro de 2023.
- ↑ 2,0 2,1 Pereira, Eder (25 de febreiro de 2025). "Capitán Barcia, un sueño cumplido en tiempo récord". DxT Campeón (en castelán). Consultado o 26 de febreiro de 2025.
- ↑ Antelo, Iván (27 de xuño de 2021). "Noel destroza al Barça y el Dépor alza la Copa de Campeones". La Voz de Galicia (en castelán). Consultado o 11 de febreiro de 2023.
- ↑ "Os penaltis cortan inxustamente o soño de #ANOSACANTEIRA na UEFA Youth League (2-2)". 9 de febreiro de 2022. Consultado o 10 de febreiro de 2022.
- ↑ Antelo, Iván (24 de abril de 2023). "Las claves del éxito del Fabril: la tropa de Marbella da otro paso". La Voz de Galicia (en castelán). Consultado o 26 de febreiro de 2025.
- ↑ "O Dépor cae en primeira rolda de Copa (2-0)". Deportivo da Coruña. 12 de novembro de 2022. Consultado o 11 de febreiro de 2023.
- ↑ "El Deportivo se asegura a Dani Barcia al menos hasta el 2026" (en castelán). 20 de setembro de 2023. Consultado o 26 de febreiro de 2025.
- ↑ Pereira, Eder (25 de setembro de 2024). "El premio a la paciencia de Dani Barcia". DxT Campeón (en castelán). Consultado o 26 de febreiro de 2025.
- ↑ "Trilli se lesiona en el psoas con la selección sub-19". La Voz de Galicia (en castelán). 5 de setembro de 2021. Consultado o 11 de febreiro de 2023.