Aspron

O aspron (en grego: ἄσπρον, do latín asper) foi a denominación xenérica de diversas moedas bizantinas de prata ou de aliaxes deste metal.

Aspron trachy de electro de Andrónico I (1183-1185), cuñado con forma cóncava ("scyphate") en Constantinopla. Diámetro: 30 mm. Peso: 4,59 g.

Historia

A palabra latina asper significaba orixinalmente "áspero", aínda que foi ampliando gradualmente o seu significado cara a "fresco", "novo" ou "acabado de saír" (e, referíndose á prata, "branco").

Foi no século XII cando esta designación, na forma de aspron trachy, tomou o significado que hoxe mantén no ámbito numismático. Trátase de senllas moedas, de electro e de billón, introducidas por Aleixo I (1081-1118), de forma cóncava ("scyphate") e cuñadas ata o século XIV.

• De electro. Esta moeda equivalía ao valor dun terzo do hyperpyron de ouro, moeda introducida na mesma reforma monetaria de Aleixo I. Contaba con aproximadamente o 25 % de ouro e o 75 % de prata.

• 

  Aspron trachy de billón de Aleixo I Comneno (1081-1118). Diámetro: 23 mm. Peso: 4,25 g.

  De billón. Paralelamente, emitiuse o aspro de billón, co valor da corentaeoitoava parte do hyperpyron, batida con só un 7 % de prata e que mesmo chegou a ser de cobre puro. O aspron de billón equivalía tamén a 18 unidades de tetarteron de cobre e a 36 nummi (unidades de nummus).

A denominación de aspron reapareceu posteriormente nos séculos XIV e XV para se referir novamente de xeito xenérico á moeda de prata da época, en casos como o stavraton bizantino ou do akçe do Imperio Otomán. No século XV, o libro de contas do comerciante e Banco veneciano Giacomo Badoer fai mención de varias cidades e gobernos que cuñaban moedas con esta denominación, como Trebizsonda, Caffa (en Crimea), Samsun e Rodas.

Véxase tamén

Outros artigos

• Moeda bizantina
• Cecas bizantinas
• Moeda da Antiga Roma
• Moeda da Antiga Grecia

Bibliografía

• Alfaro Asins, C. et al. Diccionario de numismática. Ministerio de Cultura. Madrid, 2009. ISBN 978-84-8181-405-7
• Grierson, Philip. Byzantine coinage. Dumbarton Oaks. 1999. ISBN 978-0-88402-274-9
• Hendy, M. Studies in the Byzantine Monetary Economy c.300-1450. Cambridge University Press, 1985. ISBN 0-521-24715-2
• Hendy, M. The economy, fiscal administration and coinage of Byzantium. Londres, 1989. ISBN 0860782530
• Kazhdan, Alexander Petrovich, ed. The Oxford Dictionary of Byzantium. Oxford University Press, 1991. ISBN 978-0-19-504652-6
• Sabatier, Justin. Description générale des monnaies byzantines frappées sous les Empereurs d'Orient. 2 vol. París, 1862

Ligazóns externas

• "Aspron". Catálogo con imaxes e descricións en Coin Archives
• Ficha dun aspron trachy. Museo Arqueolóxico Nacional de España.
• Estudo dun aspron trachy de Manuel I Comneno. CoinWeek.com
• Moedas bizantinas catalogadas por orde cronolóxica de emperadores
• Moedas bizantinas catalogadas segundo a o bran de Sear: Byzantine Coins & Their Values
• Digital Library Numis Arquivado 05 de xullo de 2018 en Wayback Machine. (bibliografía en liña de numismática bizantina)