Troita lacustre americana
| Troita lacustre americana | |||||||||||||||||||
|---|---|---|---|---|---|---|---|---|---|---|---|---|---|---|---|---|---|---|---|
| |||||||||||||||||||
| Estado de conservación | |||||||||||||||||||
| Non avaliado | |||||||||||||||||||
| Clasificación científica | |||||||||||||||||||
| |||||||||||||||||||
| Nome binomial | |||||||||||||||||||
| Salvelinus namaycush (Walbaum, 1792) | |||||||||||||||||||
| Sinonimia | |||||||||||||||||||
| |||||||||||||||||||
Troita lacustre americana[1] (Salvelinus namaycush) é unha troita a de auga doce que vive principalmente nos lagos oligótrofos[2] do setentrión de América do Norte.
.jpg)
Distribución editar
Dende unha perspectiva zooxeográfica, a troita lacustre americana ten unha distribución relativamente reducida. É orixinaria do norte de América do Norte, atópase en case todo o Canadá, mais tamén de Alasca e nos estados dos Estados Unidos que bordean os Grandes Lagos [3]. A troita lacustre introduciuse amplamente en augas non nativas do resto de América do Norte [4] e en moitas outras partes do mundo, en Europa xa se introduciu entre 1881 e 1885[5], pero tamén en América do Sur, Marrocos, o Xapón e Nova Zelandia[6]. Na década de 1890 introduciuse legalmente nos lagos Shoshone, Lewis e Heart do Parque Nacional de Yellowstone, e na década de 1980 introduciuse, accidental ou ilegalmente no lago Yellowstone, onde agora se considera invasora [7].
Descrición editar
A troita lacustre americana é un dos salmónidos máis grandes, xunto co salmón real e o Hucho taimen e a meirande troita; o seu crecemento varía segundo o alimento ao seu dispor e da latitude da masa de auga. Pode acadar máis do metro de lonxitude e pasar dos 30 kg de peso[8]. O maior exemplar coñecido capturouse no lago Athabasca en 1961, pesaba 46,3 kg e tiña unha lonxitude de 126 cm.[9] Así e todo, o normal é que a súa lonxitude estea entre os 61 e os 91 cm e o seu peso entre 7 e 18 kg, o maior capturado con pana de pescar tiña un peso de 32,65 kg e a súa captura foi en 1995 en Gran Lago do Oso [10].
Presenta un corpo longo cheo de pequenas manchas pálidas sobre fondo máis escuro, e que varía de verde claro ou gris a verde escuro, marrón ou case negro[11]. As súas aletas pectorais e pelvianas amosan no bordo unha banda branca. É un peixe de crecemento lento, chega á madurez tarde, entre os 6/7 anos no sur e os 13 anos no norte[12]. Animal lonxevo, pode vivir ata os 30 e como máximo 50 anos.
Hábitat editar
A troita lacustre americana require augas frías e ricas en osíxeno. Son peláxicos, sobre todo durante o período estival e nos lagos dimícticos, a miúdo viven a profundidades de entre 20 e 60 metros, aliméntanse no termoclima principalmente de corégonos de Artedi e de Osmerus mordax e agás moi raras excepcións non frecuentan as ribeiras nin o medio mariño [13]. Ao ser un peixe de crecemento lento, propio das augas oligotróficas, e moitas poboacións autóctonas resultaron gravemente danadas polos efectos combinados da actividade das instalacións eclosionadoras e da sobrepesca. Outra ameaza é a acidificación, que pode ter efectos a longo prazo sobre as poboacións tanto por danos directos como pola redución nas poboacións das súas presas (p. ex. Mysis relicta ) [14].
Hai tres subespecies de troita lacustre, a común Salvelinus namaycush namaycush , a Salvelinus namaycush siscowet e a menos común Salvelinus namaycush huronicus. Algúns lagos non teñen peixes de presa peláxicos durante o período de estratificación estival e a troita lacustre americana actúa como planctívoro, e nestes casos os exemplares abondan, medran moi lentamente e chegan a madurez con tamaños relativamente pequenos. Naqueles lagos que conteñen presas de augas profundas, a troita lacustre faise piscívora e os exemplares medran moito máis rápido, maduran a un tamaño maior e son menos abundantes.
No Lago Superior conviven a común S. n. namaycush e S. n. siscowet . A común adoita permanecer en augas menos profundas, mentres que a siscowet permanece en augas máis fondas. A troita lacustre común é máis delgada ca relativamente gordecha siscowet. O número de siscowet diminuíu moito ao longo dos anos por mor da extinción local dalgunhas das presas coregoninas de augas profundas e máis á sobreexplotación. Os siscowet tenden a crecer máis grandes e gordos e atraeron un grande interese comercial no século pasado. As súas poboacións repuntaron dende 1970.
Híbridos editar
Sábese que a troita de lago hibrida na natureza coa Salvelinus fontinalis; estes híbridos, son polo xeral estériles pero nalgúns lagos existen poboacións autosuficientes fértiles [15]. Tamén se crían artificialmente en criadeiros e introducíronse en moitos lagos de América do Norte[16].
Pesca comercial editar
A troita lacustre pescábase comercialmente nos Grandes Lagos ata que a introdución da lamprea, a sobrepesca e a contaminación extinguiron ou diminuíron ata o extremo o número de exemplares. A pesca comercial aínda existe nalgunhas áreas dos Grandes Lagos e lagos do norte do Canadá como o Gran Lago do Escravo ou o Gran Lago do Oso A pesca tradicional e comercial da especie polos ojibwe no Lago Superior está permitida en virtude de varios tratados e está regulada pola Comisión de Peixe e Vida Silvestre dos Grandes Lagos (GLIFWC)[17].
Notas editar
- ↑ Lahuerta, F. e Vázquez, F. X. (2000). Vocabulario multilingüe de organismos acuáticos. Santiago de Compostela: Xunta de Galicia. p. 61.
- ↑ Claude Lassus (1992). Évaluation des modes de gestion de la faune aquatique. Ministère du Loisir, de la Chasse et de la Pêche, Québec. p. 30.
- ↑ "Salvelinus namaycush Lake trout". Animal Diversity Web.
- ↑ "Salvelinus namaycush (Walbaum in Artedi, 1792)". USGS.
- ↑ Bruslé, Jacques e Quignard, Jean-Pierre (2013). Biologie des poissons d'eau douce européens. Lavoisier. p. 147.
- ↑ "Salvelinus namaycush (lake trout)". Invasive Species Compendium.
- ↑ Munro, Andrew R., McMahon, Thomas E. e Ruzycki, James R. (2006). "Where Did They Come From? Natural Chemical Markers Identify Source and Date of Lake Trout Introduction in Yellowstone Lake" (PDF). Yellowstone Science 14 (2).
- ↑ Fondation de la faune du Québec (1996). Habitat du poisson: le touladi (PDF). p. 4.
- ↑ Nelson, Joseph S. e Patez, Martin J. (1992). The Fishes of Alberta. The University of Alberta Press. p. 293.
- ↑ "Trout, lake (Salvelinus namaycush)". IGFA.
- ↑ Soctt, W. B. e Crossman, E. J. (1974). Poissons d'eau douce du Canada. Ministre des Approvisionnements et Services Canada. p. 238.
- ↑ "Touladi". MFFP-Poissons du Québec.
- ↑ Harris, Les N., Swanson, Heidi K. e Malley Brendan K. (2020). "Anadromy and marine habitat use of Lake trout (Salvelinus namaycush) from the central Canadian Arctic". Journal of Fish Biology 96 (6): 1489–1494. ISSN 1095-8649. doi:10.1111/jfb.14305.
- ↑ Ogden, Lesley Evans (9 de outubro de 2018). "Acid Rain: Researchers Addressing Its Lingering Effects". BioScience 68 (11). ISSN 0006-3568. doi:10.1093/biosci/biy113.
- ↑ Ihssen, P. E.; Spangler, G. R. (1980). "The splake, a hybrid charr Salvelinus namaycush x S. fontinalis". En Balon, E. K. Charrs, Salmonid Fishes of the Genus Salvelinus. Dr. W. Junk Publishers. pp. 841–887.
- ↑ "Salvelinus namaycush (Walbaum, 1792). Lake trout". fishbase.de. Arquivado dende o orixinal o 24 de abril de 2022. Consultado o 24 de abril de 2022.
- ↑ "Lake Superior Treaty Fishery". GLIFWC.