Partido da Terra

partido político galego

O Partido da Terra (PT) foi un partido político con sede en Galiza que se postulaba como partidario da democracia directa, da desprofesionalización da política, do decrecemento e da soberanía e a sustentabilidade en todos os ámbitos.[1]

Partido da Terra (PT)
Partido político de Galiza
Posicións políticas
IdeoloxíaDemocracia directa
Ecoloxía
Reintegracionismo
Na rede
http://www.partidodaterra.net/
Twitter: ptgaliza Editar o valor em Wikidata

O Partido da Terra constituíuse en Santiago de Compostela a 25 de xullo de 2011 e foi rexistrado oficialmente no Ministerio do Interior nesa mesma semana. Internamente, organízase en forma de mancomunidade, integrando organizacións de ámbito parroquial ou comarcal autoxestionadas e completamente independentes nas súas decisións.[2]

Eleccións editar

 
Papeleta de voto do Partido da Terra para as eleccións europeas de 2014. Versión usada en Cataluña.

O primeiro encontro electoral ao cal concorreu o PT foron as eleccións á Xunta Xeral do Principado de Asturias, en marzo de 2012. Presentouse só no distrito electoral occidental, onde se sitúa a rexión galegófona do Eo-Navia.[3] Con apenas 18 votos, situouse como vixésima forza electoral a nivel do Principado, superando unicamente ao Partido Familia y Vida.[4] A nivel da circunscrición occidental foi a décimo cuarta.[5]

En outubro de 2012 presentouse ás eleccións ao parlamento de Galiza, nas cales obtivo 3.307 votos (0,22%), situándose como undécima forza dun total de 26 grupos que concorrían ás eleccións.

En maio de 2014 preséntase ás Eleccións ao Parlamento Europeo.[6] Para a elección da candidatura foron realizadas unhas primarias abertas a toda a poboación, onde calquera cidadán podía resultar elixido para formar parte da lista.[7] É a única forza de ámbito galego que presenta candidatura en solitario. Obtivo finalmente 9.940 votos no ámbito da circunscrición única estatal.[8]

Nas Eleccións Municipais de maio de 2015 só presentou candidatura propia no concello de Lousame, acadando a súa primeira acta de concelleira co 12,38% dos votos e situándose como terceira forza por detrás de PP e PSOE.[9] O Partido da Terra de Lousame estabeleceu quendas de rotación de catro meses para cada concelleira e renunciou a cobrar por participar nos plenos.[10]

Nas Eleccións xerais de España de 2015 as súas candidaturas nas catro circunscricións galegas obtiveron 3.026 votos ao Congreso dos Deputados e 10.128 votos ao Senado (dos que 7.083 se corresponden cos votos da candidata máis votada en cada circunscrición). Os candidatos máis votados ao Senado foron Heitor Rodal, con 2.761 sufraxios en Pontevedra, e Joám Evans Pim, con 2.390 sufraxios na Coruña.[11]

Nas Eleccións Municipais de maio de 2019 perde a súa única representación institucional, no concello de Lousame, tras ceder máis da metade dos seus votos. A partir deste momento a organización fica disolta de facto[12] e sen ningunha actividade, non presentando candidatura nos seguintes procesos electorais.

Lingua editar

O PT asumía como propia a lingua galega, a cal entendían como indistinta da lingua portuguesa, usando a ortografía do Acordo Ortográfico da Língua Portuguesa para escribila.[13] O Partido da Terra adoptou como denominacións adicionais o nome do partido traducido a todas as linguas faladas no territorio do Estado.[14] Desta maneira, son tamén denominacións aceptadas Partido de la Tierra (en castelán), Partit de la Terra (en catalán), Lurraren Alderdia (en éuscaro), Partíu de la Tierra (en asturleonés), Partito de la Tierra (en aragonés), Partit de la Tèrra (en occitano), Hizb al-Ardh (en árabe) e Akabar n Wakal (en bérber).

Notas editar

  1. "Soberania e sustentabilidade" Arquivado 21 de maio de 2014 en Wayback Machine. na páxina web do Partido da Terra.
  2. "Somos mancomunidade, une-te!" Arquivado 21 de maio de 2014 en Wayback Machine. na páxina web do Partido da Terra.
  3. "Blogue electoral do Partido da Terra do Eu-Návia". Arquivado dende o orixinal o 20 de marzo de 2012. Consultado o 21 de maio de 2014. 
  4. Resultados das eleccións á Xunta Xeral do Principado de Asturias de 2012 no conxunto do Principado Arquivado 25 de decembro de 2014 en Wayback Machine. na páxina web asturias.es.
  5. Resultados das eleccións á Xunta Xeral do Principado de Asturias de 2012 na circunscrición occidental Arquivado 23 de novembro de 2012 en Wayback Machine. na páxina web asturias.es.
  6. Acuerdo de 28 de abril de 2014, de la Junta Electoral Central, de proclamación de candidaturas a las elecciones de Diputados al Parlamento Europeo, convocadas por Real Decreto 213/2014, de 31 de marzo, a celebrar el 25 de mayo de 2014..
  7. "O Partido da Terra abre as súas portas para elixir candidato ás europeas" no xornal dixital Galicia Confidencial.
  8. "Acuerdo de 11 de junio de 2014, de la Junta Electoral Central, por el que se procede a la publicación de los resultados de las elecciones de Diputados al Parlamento Europeo convocadas por Real Decreto 213/2014, de 31 de marzo, y celebradas el 25 de mayo de 2014, con indicación del número de escaños y de votos obtenidos por las candidaturas proclamadas" (PDF). 
  9. "Resultados Eleccións Municipais de Lousame". Arquivado dende o orixinal o 27 de maio de 2015. 
  10. Gallego, Grupo El Correo. "Iolanda Mato cede o seu cargo de concelleira ao seguinte da lista". El Correo Gallego - Diario de la Capital de Galicia. Arquivado dende o orixinal o 25 de febreiro de 2020. Consultado o 2016-01-29. 
  11. "BOE.es - Documento BOE-A-2016-867". boe.es. Consultado o 2016-01-29. 
  12. "Volta á terra?". adiante.gal. 29 de maio de 2020. 
  13. "Partido da Terra, nova formação política galega de praxe reintegracionista segundo o Acordo Ortográfico" no Portal Galego da Língua.
  14. "PT adota denominações em todas as línguas dos territórios sob administração" Arquivado 22 de maio de 2014 en Wayback Machine. na páxina web do Partido da Terra

Véxase tamén editar

Ligazóns externas editar