José María Sánchez Peteiro

José María Sánchez Peteiro, nado en Sobrado en 1923 e finado o 9 de outubro de 2001, foi un político e empresario galego.

José María Sánchez Peteiro

Biografía
Nacemento	1923 Sobrado, España
Morte	9 de outubro de 2001 (77/78 anos) Sobrado, España
Alcalde de Sobrado
Datos persoais
País de nacionalidade	España
Actividade
Ocupación	político , empresario
Partido político	Partido Liberal Partido Popular de Galicia Democracia Galega

Traxectoria

Propietario dunha canteira, foi membro do Partido Liberal. Nas municipais de 1979 encabezou en Sobrado a candidatura independente Agrupación de Veciños logrando a vitoria por maioría simple, se ben non conseigueu a alcaldía dado que os demais grupos apoiaron ao socialista Gerardo Sánchez López como alcalde. En 1983 encabezou PDL, pasando a sela terceira forza política tralo PSdeG-PSOE e AP, polo que permaneceu na oposición.

Nas municipais de 1987 foi candidato á alcaldía pola CPG, gañando con maioría simple e nesta ocasión foi elixido alcalde, gobernando co apoio de AP. Porén, os aliancistas acabrían por retirarlle o seu apoio e en novembro de 1988 presentouse unha moción de censura por parte de AP, PSdeG-PSOE e PNG que tiña como candidato ó aliancista Emilio Varela Bugallo. Para evitala súa votación, dimitiu en xaneiro de 1989, mais a súa formación non lograría conservala alcaldía e no mes de febreiro foi investido alcalde Varela Bugallo que conformou un goberno cos socialistas e os nacionalistas. Dita operación non contaría co aval dos órganos superiores de AP, en parte porque gobernaban a deputación provincial grazas ó apoio da CPG, polo que o novo alcalde se situou inmediatamente fora do partido.

Nas municipais de maio de 1991 foi de novo candidato á alcaldía, pero nesta ocasión polo PPdeG. Conseguiu gañar de novo as eleccións, pero de novo sen maioría absoluta. Non logrou a alcaldía, dado que parte da CNG (encabezada polo alcalde Emilio Varela Bugallo) e os independentes apoiaron ó exalcalde socialista Gerardo Sánchez López na investidura. Aínda así, Sánchez López presentou rapidamente a súa dimisión dada a febleza dos seus apoios, polo que en xullo Varela Bugallo e Sánchez Peteiro anunciaron un acordo de goberno polo cal se rotarían na alcaldía durante a lexislatura, asumindo na primeira metade o cargo Varela Bugallo, e a segunda Sánchez Peteiro. Porén, dito acordo acabou rachando, e Sánchez Peteiro non asumiu a alcaldía.

Nas municipais de maio de 1995 concorreu de novo como cabeza de lista do PPdeG, pero tras haberse pasado moitos dos seus compañeiros a unha candidatura independente xunto con anteriores membros da CNG, foi derrotado por esta candidatura que encabezou Jacobo Fernández García. Estes, lograron 5 edís, fronte a 3 dos populares de Sánchez Peteiro e outros 3 dos socialistas de Sánchez López. Desta forma, populares e socialistas pactaron un goberno de coalición, polo que Sánchez Peteiro recuperou a alcaldía. En novembro de 1997 os socialistas abandonan o goberno, pasando a gobernar Sánchez Peteiro co apoio dos independentes ata agosto de 1998, cando tamén o deixaron de apoiar e quedou con tan só respaldo do seu grupo e dun dos edís independentes. Ante esta situación, o resto de concelleiros independentes e 2 dos socialistas, entre eles o exalcalde Gerardo Sánchez López, presentaron unha moción de censura no mes de decembro, propoñendo como candidato ó independente José López Sánchez. En xaneiro de 1999 votouse a moción quedando investido López Sánchez como alcalde.

De cara ás municipais de xuño de 1999, os independentes pasaron a formar parte do PPdeG, xunto co ata entón socialista Gerardo Sánchez López, sendo o anterior cabeza de lista independente, Jacobo Fernández, o novo candidato á alcaldía. Ante isto, Sánchez Peteiro concorreu como candidato de Democracia Galega. Desta forma, os populares lograron unha ampla maioría absoluta fronte a 2 concelleiros socialistas e os outros 2 da Democracia Galega de Sánchez Peteiro, que se situou na oposición.

Vida persoal

Casou con María Sánchez López, coa que tivo 6 fillos. Faleceu en Sobrado o 9 de outubro de 2001.

Véxase tamén

Outros artigos

• Eleccións municipais en Sobrado