Xosé María Arias
Xosé María Arias Mosquera, nado en Santiago de Compostela o 3 de decembro de 1953 e finado en Madrid o 11 de decembro de 2023, foi un avogado, empresario e banqueiro galego, presidente do Banco Pastor e conde de Fenosa.
| Nome orixinal | (gl) Xosé María Arias Mosquera  |
|---|---|
| Biografía | |
| Nacemento | 3 de decembro de 1953 Santiago de Compostela, España |
| Morte | 11 de decembro de 2023 (70 anos) Madrid, España |
| Causa da morte | Morte natural |
| Datos persoais | |
| País de nacionalidade | España |
| Educación | Universidade de Santiago de Compostela |
| Actividade | |
| Ocupación | avogado , banqueiro |
| Lingua | Lingua castelá e lingua galega |
| Familia | |
| Pai | Joaquín Arias Díaz de Rábago |
Traxectoria editar
Fillo do empresario Joaquín Arias Díaz de Rábago e sobriño de Carmela Arias, condesa de Fenosa, estudou a escola nos Maristas da Coruña e bacharelato nos Xesuítas de Vigo. Despois licenciouse en Dereito pola Universidade de Santiago de Compostela. Anos despois, estudou Alta Dirección de Empresas no IESE. Ao rematar a carreira, casou e marchou a Madrid, en 1975 a prepararse para ser rexistrador da propiedade. O seu pai caeu enfermo, e regresou a Galicia en 1978.
Canda o seu irmán Vicente, comezou a traballar no Banco Pastor, na asesoría xurídica (1980). En 1983 foi nomeado subdirector dos servizos xurídicos, e en 1986, incorporouse ao consello de administración como letrado asesor. En 1988, foi nomeado subdirector xeral e secretario do consello de administración. Finalmente en 1991 converteuse en director xeral de Banco Pastor, e en setembro de 2001 relevou a súa tía na presidencia do Banco Pastor.
Paralelamente, convertíase en vicepresidente de Unión Fenosa e vicepresidente da Fundación Barrié, e no presidente desta última a partir do falecemento en 2009 da súa tía. Tamén foi vogal do padroado da Fundación Príncipe de Asturias e da Fundación Juana de Vega.
Xosé María Arias iniciou en 2001 unha forte reestruturación do banco que se iniciou co lanzamento dun primeiro plan estratéxico de 2002 a 2005, e que se continuou co Plan Delta, plan estratéxico que durará ata decembro de 2008. A crise do sistema bancario iniciada en 2008 acabou levando a integración do Banco Pastor no Banco Popular, en 2012. Polo acordo de integración, Arias pasaba a ser vicepresidente do Popular (posto que mantivo até 2017), o Pastor desaparecía como figura xurídica pero continuaba como marca en Galicia, onde asumía tamén as entidades do Popular. Nesa altura, a CNMV taxaba en 2013 o valor do Banco Pastor nun negativo de -497 millóns de euros[1].
Con todo, a crise empresarial continuaba, e logo dun intento de ampliación de capital, o Popular foi adquirido polo Banco Santander; con esta operación o Banco Pastor tamén desaparecía como marca e as súas oficinas e empregados en Galicia pasaban a selo do Banco Santander.
Pola súa xestión nestes procesos bancarios foi levado ante a xustiza. Primeiro foi imputado logo da denuncia[2] dun pequeno accionista do Pastor, proceso que finalmente foi desestimado porque o denunciante non achegou probas[1]; logo, foi investigado polo seu papel na creba e venda do Popular[3], investigación que se estendeu durante varios anos, ata despois do falecemento de Arias.
Galardóns editar
En 2011 herdou o título nobiliario de conde de Fenosa[4].
Presidiu o Consello Social da Universidade de Santiago entre 2014 e 2018. Formou parte de distintos padroados, como o do Museo de Pontevedra ou da Fundación Santiago Rey Fernández-Latorre; así como do plenario do Consello da Cultura Galega entre 2007 e 2020[5].
Membro de honra da Asociación de Xuristas Galegos en Madrid (2012).
Vida persoal editar
Casou con Pilar Romero Vázquez-Gulías, funcionaria, que foi vicepresidenta da Fundación Barrié[6]. Foi pai de Carmen Arias Romero, directora da Fundación Barrié; e mais Pilar e Joaquín. Botaba[7] os veráns na Pobra, como xa fixera a tía.
Notas editar
- ↑ 1,0 1,1 Obelleiro, Paola (2014-09-18). "Archivada la querella de un accionista contra la cúpula del Banco Pastor". El País (en castelán). ISSN 1134-6582. Consultado o 2023-12-13.
- ↑ "Imputado tras la querella de un accionista". Equipos y Talento. Consultado o 13-12-2023.
- ↑ "El exvicepresidente del Popular declara hoy por la gestión que llevó a la disolución del banco". Expansión (en castelán). 2019-11-12. Consultado o 2023-12-13.
- ↑ Orde JUS/1836/2011, de 15 de xuño, BOE, 2/7/2011.
- ↑ "O Consello da Cultura Galega expresa o seu fondo pesar polo pasamento de José maría Arias Mosquera". Consello da Cultura Galega. Consultado o 2023-12-13.
- ↑ Lorenzo, Ana (2023-12-12). "A Pobra pierde a José María Arias, heredero del mecenazgo de la condesa de Fenosa con la villa". La Voz de Galicia (en castelán). Consultado o 2023-12-13.
- ↑ "Fallece en Madrid el presidente de la Fundación Barrié, José María Arias Mosquera". La Voz de Galicia (en castelán). 2023-12-12. Consultado o 2023-12-13.
Véxase tamén editar
Bibliografía editar
- Barrera, Feliciano, ed. (2002). "Arias Mosquera, José María". Gallegos. Quién es quien en la Galicia del siglo XXI (en castelán). Santiago de Compostela: El Correo Gallego. p. 42. ISBN 84-8064-113-4.