José Luis Martínez Vázquez
José Luis Martínez Vázquez, nado en León o 2 de xullo de 1943 e finado en Madrid o 19 de abril de 2004, foi un atleta galego, especializado en lanzamento de martelo. Foi dúas veces campión de España, bateu o récord nacional en cinco ocasións e competiu nos Xogos Olímpicos de 1968.
Biografía | |
---|---|
Nacemento | 2 de xullo de 1943 León, España |
Morte | 19 de abril de 2004 (60 anos) Madrid, España |
Datos persoais | |
País de nacionalidade | España |
Actividade | |
Ocupación | atleta |
Lingua | Lingua castelá |
Deporte | atletismo |
Participou en | |
1968 | Xogos Olímpicos de 1968 |
Traxectoria
editarFillo de pais naturais de Portomarín, naceu en León por estar traballando seu pai naquel momento no aeródromo Virgen del Camino, e ao pouco tempo a familia instalouse en Lugo.[1] Na capital lucense comezou a practicar lanzamento de martelo, adestrado no club por Gregorio Pérez Rivera, nunhas precarias instalacións deportivas.[1]
En 1962 recibiu unha bolsa para estudar enxeñaría industrial e adestrarse na Residencia Joaquín Blume de Barcelona,[2] na que estivo ata 1967, cando se trasladou a Madrid, onde foi adestrado por José Luis Torres.[3] En maio de 1965 bateu o récord de España de lanzamento de martelo, ata entón en posesión de Llorenç Cassi, cun lanzamento de 58,98 metros.[4] Con todo, este récord estivo vixente só durante nove días, pois foi superado na semana seguinte polo atleta do Deportivo da Coruña, José Otero. Ese mesmo ano participou na Universíada celebrada en Budapest.
En xullo de 1966 recuperou de novo o récord, superando en case un metro a anterior marca de Otero, e ampliándoo tres veces máis nos seguintes dous anos ata os 64,62 metros que logrou en xullo de 1968 no Estadio de Riazor.[4] Nos anos 1967 e 1968 proclamouse campión de España e conseguiu unha praza para os Xogos Olímpicos de Cidade de México, sendo un dos catro atletas galegos na cita olímpica xunto a Carlos Pérez, Ramón Magariños e Álvarez Salgado.[5] Na capital mexicana só puido lanzar o martelo ata os 63,40 metros, quedando fóra dunha final na que o ouro foi para o húngaro Gyula Zsivótzky.[6]
Nos Xogos Olímpicos coñeceu á que logo sería a súa esposa, Marta López, filla do ex-seleccionador español de baloncesto Anselmo López.[7] Instalado dende 1967 en Madrid, onde iniciou varios negocios inmobiliarios e de venda de coches, faleceu o 19 de abril de 2004.[7]
Notas
editar- ↑ 1,0 1,1 "José Luis Martínez Vázquez". El Progreso (en castelán). 23 de maio de 2019. Consultado o 16 de agosto de 2021.
- ↑ "José Luis Martínez -en camino de convertirse en ingeniero industrial- ha lanzado el martillo a 61,78 metros". La Voz de Galicia (en castelán). 8 de novembro de 1966. p. 13.
- ↑ "Cartas de México 68" (PDF). Real Federación Española de Atletismo (en castelán). Arquivado dende o orixinal (PDF) o 16 de agosto de 2021. Consultado o 16 de agosto de 2021.
- ↑ 4,0 4,1 "Progresión dos récords de España de lanzamentos" (PDF). Real Federación Española de Atletismo (en castelán). Arquivado dende o orixinal (PDF) o 16 de agosto de 2021. Consultado o 16 de agosto de 2021.
- ↑ "Campións de España de atletismo ao aire libre" (PDF). Real Federación Española de Atletismo (en castelán). Arquivado dende o orixinal (PDF) o 29 de xuño de 2021. Consultado o 16 de agosto de 2021.
- ↑ "Lanzamento de martelo nos Xogos Olímpicos de 1968". sports-reference.com (en inglés). Arquivado dende o orixinal o 17 de abril de 2020. Consultado o 16 de agosto de 2021.
- ↑ 7,0 7,1 "Fallece en Madrid el empresario y deportista olímpico lucense José Luis Martínez Vázquez". La Voz de Galicia (en castelán). 20 de abril de 2004. Consultado o 16 de agosto de 2021.
Véxase tamén
editarLigazóns externas
editar- Datos do atleta no sitio web do Comité Olímpico Internacional (en inglés).