Rombencéfalo

O rombencéfalo (ou cerebro posterior) é unha porción do encéfalo embrionario que forma a parte do encéfalo que rodea o cuarto ventrículo e conecta coa medula espiñal, e está formado polo metencéfalo e o mielencéfalo. Comprende o bulbo raquídeo, a ponte de Varolio, e o cerebelo. O rombencéfalo mantén procesos corporais vitais como a respiración, sistema cardíaco, coordinación muscular, entre outros.^[1]

As tres partes derivadas do rombencéfalo: cerebelo, ponte e bulbo.

O rombencéfalo pode subdividirse nun número variable de avultamentos transversais chamados rombómeros. No embrión humano poden distinguirse oito rombómeros, que desde o caudal ao rostral son: Rh8-Rh1. Rostralmente, o istmo marca os límites co cerebro medio ou mesencéfalo.

Existe unha rara enfermidade do rombencéfalo chamada "rombencefalosinapse", que se caracteriza pola ausencia de vermis, o que orixina un cerebelo fusionado. Os pacientes xeralmente presentan ataxia cerebelar (falta de coordinación muscular).

O rombencéfalo caudal foi xeralmente considerado o sitio de iniciación do peche do tubo neural.^[2]

Mielencéfalo editar

Os rombómeros Rh8-Rh4 formam o mielencéfalo.

O mielencéfalo forma o bulbo raquídeo no cerebro adulto, e contén:

unha porción do cuarto ventrículo,
o nervio glosofarínxeo (par cranial IX),
o nervio vago (X),
o nervio accesorio (XI),
o nervio hipogloso (XII),
e unha porción do nervio vestíbulo-coclear (VIII).

Metencéfalo editar

Os rombómeros Rh3-Rh1 forman o metencéfalo.

O metencéfalo está composto pola ponte de Varolio e o cerebelo, e contén:

unha porción do cuarto ventrículo,
o nervio trixémino (V),
o nervio abducens (VI),
o nervio facial (VII),
e unha porción do nervio vestíbulo-coclear (VIII).

Evolución editar

O cerebro posterior é homólogo dunha parte do cerebro dos artrópodos chamada ganglio subesofáxico, en canto aos xenes que se expresan e a súa posición entre o cerebro e o cordón nervioso.^[3] Baseándose nisto suxeriuse que o cerebro posterior evolucionou primeiro nos Urbilaterianos, que son os últimos antepasados comúns de cordados e artrópodos, hai entre 570 e 555 millóns de anos.^[3]^[4]