Cromoplasto
Os cromoplastos son un tipo de plastos encargado da síntese e almacenamento de pigmentos. Estes orgánulos, como todos os plastos, son típicos de especies fotosintéticas eucarióticas.
Características editar
Atópanse cromoplastos, no senso habitual do termo, en órganos coloreados das plantas, como poden ser os froitos e, en moitos casos, os pétalos, e a eles débense as cores distintivas deses órganos, asociadas cunha acumulación masiva neles de pigmentos carotenoides . Pero hai que sinalar que nalgúns casos os pigmentos están acumulados en vacúolos e non en cromoplastos, como pasa cos pigmentos antocianos que lle dan cor a moitas flores.
Os cromoplastos sintetizan e almacenan pigmentos tales como o caroteno laranxa, ou as xantofilas amarelas e varios outros pigmentos; e a súa cor varía dependendo dos pigmentos que contén. O principal papel evolutivo que desempeñan os cromoplastos seguramente é atraer aos animais polinizadores e dispersores de sementes coas cores rechamantes das flores e froitos. Os cromoplastos permiten a acumulación de grandes cantidades de compostos insolubles en auga (carotenoides) en tecidos acuosos da planta.
Nos cloroplastos fotosintéticos os carotenoides tamén existen e úsanse como pigmentos accesorios na captación de luz na fotosíntese (os principais son as clorofilas), xa que incrementan a eficacia na captación de luz nos fotosistemas. O cambio de cor das follas en outono débese á perda das clorofilas verdes que enmascaraban os carotenoides que estaban xa presentes na folla, sen que se sinteticen cantidades importantes de novos carotenoides. Por tanto, o cambio nos pigmentos dos plastos asociados coa senescencia das follas é diferente da conversión activa de pigmentos observada nos cromoplastos de froitos e flores.
Os cromoplastos orixínanse a partir da transformación de cloroplastos, que perden a clorofila e acumulan carotenoides, como sucede durante a maduración de moitos froitos (tomate, laranxa), mais tamén poden orixinarse a partir de proplastidios indiferenciados. Nalgúns casos o cromoplasto pode converterse en cloroplasto, como sucede na parte superior das raíces de cenoria que quedan expostas á luz.
O termo cromoplasto tense usado en ocasións nun senso amplo para designar calquera tipo de plasto pigmentado, o que incluiría no termo tanto aos cromoplastos coma aos cloroplastos, para así distinguilos dos plastos non pigmentados ou incoloros, chamados leucoplastos, como os amiloplastos. Non obstante, o termo cromoplasto é moito máis a miúdo usado nun senso máis estrito como plasto coloreado que non contén clorofila.
Hai catro tipos de cromoplastos clasificados segundo a súa estrutura:
- Globulosos: os pigmentos acumúlanse en pingas xunto con lípidos. Por exemplo en Citrus e Tulipa.
- Fibrilares ou tubulosos: os pigmentos asócianse con fibriñas proteicas. Por exemplo en Rosa, ou no chile (Capsicum annuum).
- Cristalosos: os pigmentos deposítanse como cristaloides asociados coas membranas dos tilacoides. Por exemplo en tomate e cenoria.
- Membranosos: con membranas enroladas helicoidalmente. Por exemplo en Narcissus.
Véxase tamén editar
Bibliografía editar
- Henri Camefort, Morphologie des végétaux vasculaires : cytologie.anatomie.adaptations, Doin, 1996, 2 éd. (7 tirage), 432 p., p. 32-49 ISBN 2-7040-0395-5
- Cours de DEUG en ligne