Al-Hoceima
Coordenadas: 35°14′50″N 3°55′56″O / 35.247222222222, -3.9322222222222
Al-Hoceima ou Alhucemas[1][2] (en árabe الحسيمة, Al-Hoceima que significa lavanda; en rifeño:ⴻⵍ-ⵃⵓⵙⵉⵎⴰ) é unha cidade capital da provincia homónima de Marrocos. Está situada na costa marroquí mediterránea, na parte oriental da baía de Alhucemas (ou de Al-Hoceima) e xunto ao Peñón de Alhucemas. Atópase, en liña recta, a uns 155 quilómetros ao leste de Ceuta e a 100 km ao oeste de Melilla.
| Al-Hoceima | |
|---|---|
| ⴻⵍ-ⵃⵓⵙⵉⵎⴰ الحسيمة Villa Sanjurjo | |
 | |
| Vista da cidade. | |
| Localización | |
  Al-Hoceima | |
| País |  Marrocos |
| Rexión | Taza-Al Hoceima-Taounate |
| Provincia | Al-Hoceima |
| Demografía | |
| Poboación | 56 756 hab. (2014) |
| Densidade | hab/km² |
| Outros datos | |
| Alcalde | Mohammed Boudra |
HistoriaEditar
A actual Al-Hoceima tivo a súa orixe nun asentamento precario no século XVII, pero non foi ata despois do desembarco de Alhucemas levado a cabo polas tropas españolas durante a guerra do Rif (1926) que se creou a actual poboación. Con todo, daquela chamóuselle Villa Sanjurjo, na honra do xeneral Sanjurjo, un dos protagonistas dese desembarco.
Durante a II República pasou a denominarse Villa Alhucemas, aínda que logo o réxime franquista restituíu novamente o nome de Villa Sanjurjo, que xa se mantivo durante o resto do protectorado español, ata o ano 1956 en que Marrocos accedeu á independencia. A partir desa data pasou a chamarse Al-Hoceima, en árabe, segundo a denominación marroquí.
Como legado da cultura española, quedan na vila numerosos edificios construídos durante a época do protectorado. Así, atópase nesta cidade o Colexio Español Melchor de Jovellanos, dirixido polo Estado español. Este conta cunha arquitectura similar a edificios do sur de España e foi en orixe un cuartel militar.
Na actualidade é unha cidade de vacacións de verán, frecuentada polo turismo, na súa maioría do norte de Europa, debido ás súas fermosas praias, en especial Praia Quemado, e á beleza da súa contorna, entre a cordilleira do Rif e as augas do Mediterráneo. Ten instalacións turísticas destacadas, como o Club Med, o complexo Chafarinas ou o Hotel Mohamed V.
Con todo, a cidade atópase afastada do nivel de desenvolvemento do resto do Marrocos turístico, cunha importante falta de infraestruturas e de promoción. Á marxe das estradas que chegan á cidade, no verán establécese un servizo marítimo que comunica a cidade con Málaga, nun treito de aproximadamente unhas 11 horas.
Al-Hoceima e os seus arredores sufriron un importante sismo de 6,5 graos na escala Richter o 24 de febreiro de 2004, que causou graves danos materiais e provocou a morte de cando menos 560 persoas.
DemografíaEditar
Malia que se estima en 60 000 habitantes a súa poboación, non se pode saber con exactitude, pois existe un alto índice de poboación que vive no campo.
NotasEditar
- ↑ Diccionario enciclopédico galego universal (2003): Alhucemas: Al => Hoceima; Hoceima, Al-: Provincia de Marrocos (3.550 km²; 383.000 h [estim 1994]). A súa capital é Al-Hoceima (55.216 h [1994]).
- ↑ Inés Santa María Otero e Noé Massó Lago: Atlas xeográfico e histórico de Galicia e do Mundo (2009), Edicións do Cumio, ISBN 978-84-8289-328-0: Alhucemas: 132 4E.
Véxase taménEditar
| Wikimedia Commons ten máis contidos multimedia na categoría: Al-Hoceima |