Zeugopterus regius

Zeugopterus regius é unha especie de peixe osteíctio da orde dos pleuronectiformes e familia dos escoftálmidos.

Taxonomía

A especie foi descrita por primeira vez en 1788 polo naturalista francés Pierre Joseph Bonnaterre, baixo o nome de Pleuronectes regius.
Ademais de por este nome, a especie foi coñecida tamén co sinónimo Phrynorhombus regius (Bonnaterre, 1788).

Características

As principais características morfolóxicas desta especie son:

• Corpo ovalado, deprimido e alongado, de até os 20 cm de lonxitude total.
• Boca terminal, ampla, e coa mandíbula inferior prominente.
• Os ollos, situados á esquerda, son grandes e están moi xuntos, separados por unha protuberancia ósea.
• A liña lateral preséntase en ambas as caras.
• A aleta dorsal comeza por diante dos ollos, e o seu primeiro raio é o máis longo de todos. A aleta caudal é arredondada.
• A cara ocular é de cor parda avermellada, con manchas de distintas tonalidadss, tamén presentes nas aletas. A súa coloración pode mimetizarse coa dos fondos onde repousa.

Hábitat e distribución

Hábitat

É unha especie bentónica que vive sobre fondoss areosos e limosos, onde se enterra. O individuos xuvenís son máis costeiros que os adultos, que poden chegar aos 300 m de profundidade.

Distribución xeográfica

Encóntrase nas costas do Atlántico nororiental (desde as illas Británicas até Marrocos), e no Mediterráneo occidental até o mar Adriático.

Bioloxía

Nutrición

Aliméntase vermes e crustáceos.

Reprodución

Ten lugar durante a primavera no Mediterráneo.

Véxase tamén

Bibliografía

• Nelson, Joseph S. (2006): Fishes of the World. Nova York: John Wiley & Sons, Inc. ISBN 0-471-25031-7.

Outros artigos

• Pleuronectiformes
• Escoftálmidos

Ligazóns externas

• Encyclopedia of Life (en inglés)