The Gabba
Coordenadas: 27°29′09″S 153°02′17″L / -27.485833333333, 153.03805555556
O Brisbane Cricket Ground, popularmente coñecido como The Gabba, é un estadio da cidade australiana de Brisbane, a capital de Queensland. O seu alcume provén do nome do barrio no que está situado: Woolloongabba. O terreo de xogo é elíptico, cunhas dimensións de 170'6 metros de lonxitude no seu eixo maior, e 149'9 metros no seu eixo menor. A capacidade das bancadas é de 42.000 persoas sentadas. Trátase do terceiro recinto deportivo con maior capacidade da cidade, tralo Lang Park (52.500 asentos) e o Queensland Sport and Athletics Centre (49.000 asentos).
| The Gabba | |
|---|---|
  Brisbane Cricket Ground | |
| Datos | |
| Localización | Brisbane, Australia |
| Construción | |
| Inauguración | 1895 |
| Renovación | Entre 1993 e 2005 |
| Estadio | |
| Superficie | Herba |
| Dimensións | 170'6 x 149'9 |
| Capacidade | 42.000 asentos |
| Propietario | Goberno de Queensland |
| Localía | Fútbol australiano: Brisbane Lions (AFL) Crícket: Queensland Bulls (Sheffield Shield) Crícket: Brisbane Heat (Big Bash League) |
| Eventos | |
| Copa do Mundo de Rugby League 1957 Copa do Mundo de Crícket 1982 Xogos Olímpicos de 2000 (fútbol) Xogos Olímpicos de 2032 | |
Construído en 1895 para acoller os encontros de crícket do equipo de Queensland, neste recinto deportivo tamén comezou a xogarse a fútbol australiano a comezos do século XX. Na actualidade emprégase para disputar encontros de fútbol australiano entre os meses de marzo e setembro, e encontros de crícket entre setembro de marzo, aproveitando que estes dous deportes desenvolven as súas competicións oficiais cada un nunha metade oposta do ano.
Cada un dos dous equipos de crícket representativos de Queensland (os Queensland Bulls de crícket clásico e o Brisbane Heat da disciplina Twenty20) disputa ó redor de 6 ou 7 encontros por tempada no Brisbane Cricket Ground durante as estacións de primavera e verán, mentres que o equipo de fútbol australiano (Brisbane Lions) celebra 11 ou 12 encontros por tempada durante as estacións de outono e inverno.
Ó longo da historia, The Gabba tamén ten acollido eventos deportivos de exhibición ou entre seleccións nacionais nas disciplinas de fútbol, de rugby union, rugby league, béisbol, ciclismo e mesmo equitación. Tamén serve como recinto para concertos.