Termas romanas de Lugo

As termas romanas de Lugo son os restos do antigo balneario romano situado á beira do río Miño, preto da antiga ponte romana. Estas termas romanas foron declaradas Monumento Histórico-Artístico en 1931, e agora forman parte das instalacións do Hotel Balneario de Lugo. A construción destes baños é contemporánea á fundación da cidade, ao redor do ano 15 a.C.. O recinto mellor conservado das instalacións é o apodycterium, o vestiario.

Termas romanas de Lugo
Tipo	termas romanas, xacemento arqueolóxico e monumento
Parte de	Camiño Primitivo e Lucus Augusti
Cultura	Roma Antiga
Localización
43°00′06″N 7°33′40″O
Estado	España
Comunidade autónoma	Galicia
Provincia	provincia de Lugo
Concello	Lugo
Patrimonio cultural
Ben de Interese Cultural
Data	3 de xuño de 1931
Identificador	RI-51-0000710
Parte dun sitio do Patrimonio da Humanidade
Data	?
[ Wikidata ]

Descrición

A instalación de termas e balneario era esencial dentro da Roma antiga, polo que se abriron ao tempo que se fundaba Lucus Augusti. Recibían auga dun manancial termal con propiedades mineromedicinais, con augas sulfurado-sódicas e carbonatadas que abrollan a 43,8 °C. Estas augas son explotadas aínda hoxe dentro do Hotel Balneario de Lugo.

O apodycterium é a área mellor conservada. Este lugar para espirse consiste nunha gran sala con pavimento de opus signinum, material de uso común composto de rebo de tella e ladrillo con cal. Ao fondo da sala hai dúas portas en arcos que dan paso a diversas estancias, incluída unha parede composta de dezaoito furnas que se usaban a modo de armario para gardar a vestimenta e os obxectos persoais.

Outra das zonas visitables é a antiga sala de baños, con forma abovedada. Había tres áreas diferenciadas: o frigidarium, para baños fríos; o tepidarium, para baños mornos, e o caldarium, para baños quentes. En épocas posteriores esta sala foi convertida en capela cristiá.

Véxase tamén

Bibliografía

• Arias Vilas, F. e de Vega Rodríguez, A. (1997): "Las termas romanas de Lugo", en Peréx Agorreta, M. J.: Termalismo antiguo. Actas I Congreso Peninsular. ISBN 9788436236033
• Meijide Cameselle, G. e Herves Raigoso, F. (2000): "Un nuevo espacio en las termas de Lugo", en Fernández Ochoa, C. e García Entero, V.: II Coloquio Internacional de Arqueología en Gijón. Termas romanas en el Occidente del Imperio. Concello de Xixón. ISBN 9788489880379

Outros artigos

• Termas romanas
• Balnearios de Galicia

Ligazóns externas

• As Termas na páxina web do Hotel Balneario de Lugo
• "Termas Romanas" Turgalicia
• Termas romanas de Lugo na páxina web colaborativa Patrimonio Galego.